Ушедсь приёмнай кампаниясь

20 июньцта сембе странань вуснень эса ушедсь приёмнай кампаниясь. Тяка шиня Н.П.Огарёвонь лемса МГУ-нь ректорсь Дмитрий Глушко ётафтсь пресс-конференция СМИ-нь представительхнень мархта и азозе, кода кармай мольфтевома Мордовскяй госуниверситету абитуриенттнень примамасна, кодама од специальностть эвондасть вузса, мзяра максови бюджетнай вастта и стак тов.
Кода содавсь, тядде университетса бюджетнай вастта арась 2782. Тя 70 вастта сяда лама ётай кизоть коряс. Бакалавриатонь и специалитетонь программатнень коряс панчф 1864 бюджетнай васта, магистерскяй программатненди—543, ординатурав—36, средняй профессиональнай образованиянь программатненди—230.
Эвондасть анокламань од направленият.
—Регионть инновационнайста виияфнеманкса аноклафтольхть высшай образованиянь тяфтама образовательнай программат, кода «Финансы и кредит. Финансовые технологии и аналитика»—тя магистратурань васенце онлайн-программась, «Менеджмент. Спортивный менеджмент»,—азозе ректорсь.—Тяда башка, международнай рынкаса образовательнай услугатнень экспортснон рамкаса аноклафтольхть английскяй кяльса магистратурань образовательнай программат «Менеджмент. Менеджмент в здравоохранении» анокламань направлениять и «Ветеринария» специальностть коряс.
Стане жа азфоль, што «Продукты питания животного происхождения» специальностть коряс, кона меля эвондась Аграрнай институтса, тяни ули кода тонафнемс питнефтома—тядде тяса панжевсь 21 бюджетнай васта.
Дмитрий Глушко азозень анокламань ся направлениятнень, конат лувондовихть сембода перспективнайкс. Нят колма сфератне: биотехнологиясь, IT-сь и инженериясь.
Тя кизоня Н.П.Огарёвонь лемса МГУ-сь сувафтсы тевс ЕГЭ-нь оцю балл мархта абитуриенттненди 100 тёжянь цалковаень лувксса депозитонь системать. Тяфтама депозит ули кода получамс республикань и Россиянь экономикати приоритетнай специальносттненди поступайхненди. Тяфта, анокламань инженернай направлениянь абитуриенттненди депозитть ули кода получамс, кда ЕГЭ-тнень пингста синь кочкайхть 70 балл. Гуманитарнай и ся специальносттнень коряс, коса пяк оцю конкурссь, баллда эрявксты сяда лама, условиятнень можна содамс вузть сайтстонза. Ня средстватнень студентти ули кода карьхцямс вузса тонафнемста университетскяй столовайхнень и кафетериятнень эса ярхцаманди, студенческяй общежитияса эряманди, дополнительнай образованиянь программатнень коряс тонафнеманди, вузонь спорткомплекснень эса абонементонди.
Улихть вузса и башка квотат. Синь коряваст максф 215 васта. Тя квотась максси права поступамс вступительнай экзаменфтома Российскяй Федерациянь Геройхненди, ломаттненди, конат казьфт Мужествань колма ордеттнень мархта, СВО-нь ранендаф или РФ-нь Героень званияса казьф участникнень шабаснонды, медицинскяй работникнень, конат кулость ковидть сюнеда трудовой обязанностьснон пяшкодемста, идьснонды.
Абитуриентти ули кода максомс кагодонзон приёмнай комиссияв несколька способса: дистанционнайста—университетть официальнай сайтсонза личнай кабинетть или Госуслугатнень вельде, лична самок университету или прважамок синь почтать вельде.
Приёмнай кампаниясь кармай молема 25 июльть самс.
Ольга ЕВДОКИМОВА.