Улемс волонтёркс тяниень пингть—тя пяк эрявикс тев. Пцтай эрь пуромксса улендихть од ломатть, конат анокт лездомс эрь сайти: прважамс сонь эрявикс вастти, отвечамс кизефксонзон лангс и стак тов. Уленди, мзярда волонтёрхне синць мезе-бди ётафтыхть и тердихть эсь пуромксозост ломатть. Мяляфтса, мзярда Саранскяйса панжевсь «Мордовия Аренась», лама волонтёрда ульсь тя стадионца. Синь васьфнезь сайхнень и лезнесть пуромфненди. Волонтёрхнень ёткс сувси и Юлия Лазунина. Аф кунара минь корреспондентоньке васьфнесь мархтонза и Юлия Анатольевна оцю мяльса отвечась кизефксонзон лангс.
—Юлия, азонтт аф лама эсь колгат.
—Тонафнян М.Е.Евсевьевонь лемса МГПУ-са дополнительнай образованиянь педагогокс. Шачемас коре Ельники велестан. Студентан и волонтёран, сяс кафта ня тефне занцесазь сембе пингозень. Но, кода и ламоц лия ялгане, стакада-сталмода аф пелян.
—Мес кочкайть педагогонь профессиять?
—Пяк кельгсайне иттнень, мялезон работамс, кирдемс соткст мархтост. Нинге шабакс пингста вятень «урокт» ялганенди. Тяфта и кочкась вийхть, кемокстась педагогокс арамать колга мяльсь.
—А кода арать волонтёркс? Мезьста сембось ушедсь?
—Аказе волонтёроль. Сон и арась тейне тя тевса кепотьксокс. Арань волонтёркс 10-це класса. Ся пингть ялгане заняфтольхть ни тя тевса. Монга варжайне и пяк тусь мялезон. Ся пингста ётась 5 кизот.
—Юлия, кодама ломанькс улема, штоба сафтомс волонтёронь тевса?
—Эсь эсон васенце вастти путнеса коммуникабельностть. Тейне уленди тёждя корхнемс ломаттнень мархта. Пунктуальностсь лезды фалу кенерькшнемс и семботь тиендемс эсь пингстонза. И нинге, мзярдовок аф ётнян ся ломанть вакска, конанди эряви лезкс.
—Кодама организациятнень эса улендеть волонтёркс?
—Сембось ушедсь школаса, коса ётафнень класснай частт, акцият. Тя макссь тейне оцю опыт. Активистан Мордовия Республикань добровольчествань региональнай штабса.
—Улема, доброволецокс улемаське салсесыне мяльхнень?
—Виде тяфта, сяс мес ётафнеса пингозень цебярь тевонь тиендезь. Тя салси мяль. Тяда башка, ламоти удалси тонафнемс. Кирдян соткст ломаттнень мархта. Павазукс маряса прязень, мзярда ломанць, конанди хуш мезьсовок лездонь, пееди. Азса тяфта: эрти ули кода варжамс виензон доброволецонь тевса.
—А кодама пуромкснень эса улеть волонтёркс?
—Мзярс «арзянясон» аф пяк лама пуромкс. Школада меле тонафнень колледжса, тевозе аф ламос лотксесь. Мрдань волонтёрствати, мзярда поступань М.Е.Евсевьевонь лемса МГПУ-в. Волонтёролень «Культурная провинция», «Время Героев» и лия мероприятиятнень эса, озафнень шуфтонят «Аллея первых» мероприятияса.
—Кода содасаськ, тяни моли специальнай военнай операциясь. Примсеть-аш участия боецоньконди лезксонь максомаса?
—Кой-мезе удалась тиемс. Тяшнень сёрмат солдаттненди, кодань маскировочнай сетьть.
—Арьсят, тя сембось максы лезкс специальнай военнай операциянь участникненди?
—Мзярда синь фронтса морафтсазь сёрманьконь, кеподи мяльсна. Солдаттне няйсазь, што инксост пичедихть, учсазь синь кудса, озондыхть инксост. Кали тя сембось аф эждьсы ваймоснон? И эждьсы, и вийхть максы. А маскировочнай сетьтне теест тоса пяк эрявихть. Сяс пара, што тянь мархта заняф ломаттнень лувкссна касы.
—Мезти тонадоть волонтёркс улемстот?
—Содаса, мезсь путома васенце вастти, мезсь веши сяда лац работамс, сяда лама сатомс и тиендемс тефнень кенярдема мархта. А нинге шарьхкодине, конашкава эрявксни волонтёрть лезксоц ломаттненди.
—Ёрат улемс волонтёркс и сяда тов?
—Мялезе улемс волонтёркс фалу. Кельгса тя тевть. Кда ни ушедан работама лия организацияса, но лездома ломаттненди сяка карман.
—Юлия, кода арьсят: кодама волонтёрствать сай пингоц?
—Волонтёрствась кочкси вийхть, а волонтёрхнень лувкссна коль касы. Арьсян, тя тевсь кармай вятевома и сяда тов. Тяниень пингть волонтёрхненди вешфкссь оцю. Кеман, тяфта ули фалу.
—Спасиба!
Илья Первойкин.