Кочкуровскяй райононь Сабаево велеса «Орбита» идень шумбрашинь кемокстамань лагерьса 9 июньцта сявомок 22 июнти молемс работась «Живи, родной язык» Межрегиональнай этнокультурнай образовательно-оздоровительнай лагернай сменась. Кода сембось ётась? Тянь колга тейнек азондсь сменать руководителец, Мордовия Республикань Заслуженнай учительсь, мокшавась Марина Миронова.
Марина Николаевнань валонзон коряс, «Живи, родной язык» сменати пуромкшнесь 50 ломань Мордовиять пцтай сембе райононзон и лия региоттнень, ошнень эзда: Казаньцта, Пензаста и Пензенскяй областьста, Владимирста, Ульяновскяйста, Москуста.
«Живи, родной язык» сменаса ульсть мокшень, эрзянь, татаронь кяльса олимпиадань сяськихне, призёрхне, научно-практическяй конференциянь, лувиень конкурсонь участникне, а стане жа сят, кит лама сатсть спортса.
Кода ётась лагернай тя сменась? Башка мяль шарфтома сянди, што иттне и подросткатне эрясть цебярь корпусса, коса улихть сембе условиятне.
«Орбита» идень шумбрашинь кемокстамань лагерсь тифоль 1970 кизоня. 2025 кизоня идень лагерьхнень одкстоптомаснон коряс проектть вельде тяса эвондасть эрямань кафта корпуст.
Лагерсь оцю мяльса примсесыне Мордовияста, Москуста, Татарстанцта, Чувашияста, Пензенскяй, Нижегородскяй областтнень эзда шабатнень.
Тядде тя лагерьса ульсть кафта сменат, фкясь эздост—«Живи, родной язык» Межрегиональнайсь этнокультурнайсь образовательно-оздоровительнайсь.
Эрь шить шабатне ётафнезь ладяф режимть мяльса кирдезь. Шобдава улендсть зарядкат, линейка, завтрак. Сяда тов аноклакшнезь пряснон занятияс. Меле ульсь мокшень, эрзянь, татаронь кяльса и литератураса интенсивсь. Шить омбоце пялестонза вожатайхне ётафнесть мероприятият.
Программати сувсесть образовательнай, интеллектуальнай мероприятият, мокшень, эрзянь, татаронь кяльса мастер-класст. Стирнятне и цёранятне тонафнезь мифологиять, фольклорть, аноклазь и ётафтозь «Акша келу», «Сабантуй» и национальнай лия илатнень, примасть участия квесттнень, этностилень элемент мархта национальнай дискотекаса, интенсифнень эса.
Лагерень сменань участникне усксть мархтост мокшень и эрзянь стилизованнай щапт, конатнень щашендозь дискотекас, лия мероприятияс, инжихнень мархта васьфтемста.
Марина Николаевна вятсь «Мордовская геометрия узоров» лем ала кружок.
Инжикс сашендсть «Ламзурь» фольклорнай ансамбльсь и Мордовскяй народть Межрегиональнай общественнай организациянц Исполкомонц Председателец Татьяна Ларина. Татьяна Ивановна казненди усксь рузонь, мокшень, эрзянь кяльса книгат.
Сменать пингста стирнятне и цёранятне анокласть специальнай военнай операциянь участникненди лемтьф проектт, конатнень меле аралазь. Тевс нолдазь поэтоньконь Раиса Орловать «Время Z» стихонь сборниконц.
Кой-кит «Живи, родной язык» лагерень сменати сашендсть васенцеда, но улихть и сят, кит омбоцеда и колмоцеда.
«Орбита» идень шумбрашинь кемокстамань лагерьса мархтост работасть сменать руководителец Марина Миронова, «Педагог13.ру» центраста методистсь Вера Маскаева, татаронь кяльса учительсь Фазия Боярова.
Татьяна АЛЬШИНА.