Покравсь оцю ила. Эрь мокшень и рузонь велеса васьфнесазь сонь эсь лацонза. Кепотьксонди, Атерь аймаконь Од Кярьга велеса тя шити тиендихть поза, пицихть пачат, якайхть фкя-фкянь пяли пиравама. Коса улихть гармонияса морайхть, шиньберьф кайгихть мокшень морот, кштимат. Крхтажса якайхть тя шиня фкя-фкянь пяли инжикс. Тяфта жа тиендихть поза, пицихть пачат, цюкорхт. А коста сась тя илась?
14 октябрьста православнайхне васьфнесазь оцю илать—Покравть. Лувондови, што тя праздниксь рузонь модать лангс сась Византияста. Легендать коряс, 910 кизонь 1 октябрьста (14 октябрьста од стильс коре) Византиять столицанц Константинопольть перьф пуромсть вражескяй войскат. Ломаттне кочкавсть храму вень службас и озондсть ваймоснон араламанкса. Ётксост ульсь и Андрей Юродивай. Ветемба, 4 частста, службать пингста эвондась Пресвятой Богородицась, кона святойхнень мархта мольсь менельге. Мархтонза ульсть пророксь Иоанн Предтеча и апостолсь Иоанн Богослов. Бого-родицась ушедсь озондома, сяльде валхтозе омофоронц (прястонза руцянц) и келептезе сонь ломаттнень вельхксса. Сонь покровсонза тавадомац и арась христиаттнень вракнень эзда араламаснон колга знамениякс. Надияматне тянь лангс пяшкодевсть: вракне кадозь ошть кодамовок тюремафтома.
Кода азондови Славянскяй календарьса, сась Покравсь—аделавсть велень хозяйствань сембе тефне, ушеды тялось. Тя пингть сидеста прашендсь васенце ловсь. Покравсь лувондови «стирень праздникокс».
Русьса тя иласта ушеткшнесь свадьбань пингсь. Покравонь шитнень пуроптф семьятне лувондовсть инь кемокс и павазукс. Стане жа тя шиня ванондозь кодама кармай тялось. Приметас коре, кда Покравста вармась уфай север или восток ширде, тялось кармай кельме, а кда юг ширде—лову и лямбе. Тя шиня Шкаенди кемай ломаттне якайхть церькаву. Праздникта инголе колма шит ванфтови пост, конань пингста аф мярьгондеви ярхцсемс сивольда. Ня шитнень пара лувомс Евангелиять и арьсемс цебярень колга. Покравти аноклакшнихть оцю шрат, тернихть инжихть, каванякшнесазь синь пачаса и пярякаса. Тяфта жа тя шиня макссихть ярхцамбяль и ярмак анцинятненди.
А вов кой-мезсь Покравста тиендемс аф мярьгондеви.
Кода и лия оцю праздникнень пингста, Покравста аф мярьгон-деви работамс.
Аф мярьгондеви кярьмоть-кшнемс тевс и стайхненди-кодайхненди, конат лувондсазь тянь ётка пингонь тевкс.
Покравть эряви ётафтомс мала ломанентень мархта лямбе, седи ваксстонь корхнемаса.
Тя шиня аф эряви сявондемс или макссемс шумос. Приметать коряс, сяльде кизоньберьф улят шумонь потмоса.