380 кизонь топодемацень мархта, Перхляй мокшень веле!

18 июньцта Рузаевскяй муниципальнай райононь Перхляй мокшень велеса ётафтовсь тя велеть 380 кизонь топодеманцты лемтьф оцю праздник, конань лемоц «Родной велень ши».
Кой-кона источникнень эса пачфневи, што Перхляйть пуроптозь-тиезь XVII векста тяниень Темниковскяй райононь Конаково велень ломаттне. 1704 кизонкса «Саранскяй уездонь мокшэрзянь кереметейхнень и мольбищатнень кядьста пошлинань кочксемань книгаса» азф: Перхляйса эста эрясь 478 ломань. 1714 кизонкса «Саранскяй уездонь ясашнай населениять (руснень и мордвать) кядьста окладнай ярмакнень кочксемаснон коряс приходной книгаса» корхтави 37 пирьфонь колга. Кирдемок мяльса «Пензенскяй губерниянь населённай васттнень спискаснон» (1864 кизось), Перхляйсь—160 пирьфста ащи казённай веле (1289 ломань), эсонза ульсь церькав. 1913 кизонь даннайхнень коряс, Перхляйса ульсь 373 куд, коса эрясь 2887 ломань, церковно-приходской школа, кшинь мишенди 3 лавкат, пожарнай машина, вармань 14 меленця, ваень пихтемань и суронь тялямань колма вастт, овчинай и синильнай предприятият, кирпицень карда, 5 лавкат.
1931 кизоня мокшень тя велеса ульсь 508 хозяйства. 1930 кизотнень пуроптфоль колхоз, сяда меле—«Шишкеевский» совхозть отделенияц, «Подлесный» совхозсь. Тя, кда ёфси нюрьхкяняста азондомс сонь историянц колга.

Перхляйсь маряй гордость асу, ёню, содаф стирензон и цёранзон инкса. Тяса шачсть партийнай и профсоюзнай руководительсь П.Ф.Ерофеев, партийнай и хозяйственнай руководительсь В.П.Исаев, МАССР-нь Заслуженнай врачсь Т.Т.Келейникова, учёнайсь В.Т.Ерофеев, врачсь Л.Т.Польдяева, писательсь Л.Ф.Макулов, театрань певицась М.Е.Максимова, филологическяй наукань докторсь, профессорсь Т.И.Кубанцев, ламотне лиятне.
Мокшень тя велесь—ёмла родинац Мордовия Республикань культурань Заслуженнай работникть, трудонь ветеранть, асу педагогть и журналистть, пара ялганьконь Нина Васильевна Кубанцевать, кона нильгемоньда лама киза работась «Мокшень правдаса».
И вов Перхляйти топодсь 380 киза. Велень клубть малас «Родной велень ши» оцю праздникти пуромкшнесть аф аньцек тястонь, но и шабрань, лия велень, Рузаевкань, Саранскяень эряйхне. Ульсть инжихть Москустовок. Аф ваномок ичкозе эрямаснон лангс, Перхляйса шачфне аф юкснесазь ёмла родинаснон, сашендыхть тяза и стак шиня, и праздникста.
«Родной велень шить» аноклазь Перхляень клубть заведующаец Л.П.Качкалова, клубнай формированиять руководителец Л.В.Аршинова, Перхляй велень библиотекать заведующаец В.А.Тиньгаева. Эрь пуромксть ётафтомста эрявихть лездыхть. Тя мезть тяфтама ширень кирдикс арасть тяса шачф-касф мокшалясь, индивидуальнай предпринимательсь Н.В.Архипов, лиятне.
Мокшетне фалу ульсть инжиень примай-васьфти ломанькс. Тя мезтьке сембе сайхне каваняфтольхть пачаса, шову позаса, кургоняса, пярякаса, калонь шонгарямса и лама лия танцтиняса.
Рузаевскяй муниципальнай райононь оцюнять А.Б.Юткинонь лемста и эсь эздонза пуромфнень Перхляйть 380 кизонь топодеманц мархта поздравляндазень Рузаевскяй муниципальнай райононь оцюнять заместителец—АПК-тнень, ЛПХ-тнень и велень поселениятнень мархта работать коряс Управлениять начальникоц С.В.Горшков. Сонь валонзон коряс, арась цебярь койкс ётафнемс тя шиня велеть праздниконц. Перхляйсь—мазы веле, кона содаф ломанензон мархта.
«Ляйне» фольклорнай ансамбльсь кунара ни арась Перхляйти визитнай карточкакс. Тядде теенза топодсь 15 киза. И сембе пингть сонь руководителец мокшавась Л.В.Аршинова.
Тя коллективса пуроптомстонза сявомок морси В.И.Лукачева. Асу тя мокшавась—моронь ушедысь, сонць тяшни сиде моронят.
Тя мезтьке фольклорнай ансамбльсь тись музыкальнай лама казне.
Пуромфнень праздникть мархта поздравляндазень, а «Ляйнеть» эрь участницанц Благодарностьса казезе Культурань районнай центрать директороц (Рузаевка ошсь) Т.А.Хабарова.
Поздравляндамань лямбе валхт азсь Перхляй велень поселениянь оцюнять заместителец Е.Н.Тиньгаева.
Тя шиня башка мяль шарфтфоль семейнай династиятненди, конат ламос и виень аф ужяльдезь трудендайхть Перхляйть панчфокс панжеманц инкса. Сценать лангс тернефтольхть и чествовандафтольхть мирттне-рьвятне Трофим Фёдорович и Мария Петровна Ерофеефне, конат эряфснон лемдезь школаса иттнень тонафнемаснонды, браттне Николай Васильевич и Юрий Васильевич Сардаефне, конат вов ни 14 киза покодихть крестьянско-фермерскяй хозяйстваса.
Сяда тов пара валхт эсь лемозост кульсть мирттне-рьвятне-юбилярхне, конат васьфтезь зрнянь свадьбаснон. Нят Анатолий Егорович и Мария Максимовна Емелькиттне, Николай Михайлович и Нина Петровна Чигирёфне, Алексей Дмитриевич и Матрена Васильевна Кубанцефне, Николай Николаевич и Зинаида Ивановна Ильиттне.
Улихть тяфтама ёню валхт: «Тоса родсь-плямась цебярь—коса эряфкшуфнень мяльснон ванцазь». Перхляйса сиренятнень лангс шарфнихть башка мяль. И велети лемтьф оцю праздниксь тянь лац няфтезе. Седиста моли лямбе валхт кульсть А.Н.Польдяева, Н.С.Кубанцева, Н.Ф.Нарватов, конат васьфтезь ни 90 кизоснон. Шумбраши и сембе цебярть теенть, велень ламос эряйхть!
Лятфтафтольхть и Родинань аралайхне, конат тяни служайхть армияса.
Кда корхтамс велеть колга, то мялезот сайхть и тяфтама валхне: коса шачсь, тоса и кондястсь. И 18 июньцта Перхляйса апак юкстактольхть сят, кит эряфснон сотозь модать лангса покодемать мархта. Оцюдонга оцю сюкпря азфоль сембе труженикненди.
Сяльде марстонь праздникть мархта поздравляндафтольхть лама идень семьятне.
Мокшень велеть эряензон поздравляндама сашендсть Огарёвскяй клубонь «Мокшаночка» народнай коллективсь, Ключаревскяй клубонь «Берёзка» фольклорнай ансамбльсь, Шочкувонь клубонь «Росинка» фольклорнай ансамбльсь, А.В.Ухтомскяень лемса Культурань центрань артисттне (Рузаевка ошсь).
Шиньберьф Перхляйса азорондась праздниксь. Клубть ваксса работасть выставкат. Панжада менель ала библиотекаса ульсь кода морафтомс историческяй очеркт, а стане жа кадомс (тяштемс) лямбе мяльхть-арьсемат родной велети. Иттне комотнесть батуттнень лангса и арнесть машинаняса.
Няевсь, што тяса эряфсь лаказь-лакай и ся, што Перхляйть инь оцю козяшиц—сонь ломаненза, конат лама тиендихть ёмла родинаснон ванфтоманц инкса.
Т.АЛЬШИНА.

Последние новости

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть...

«Варяг» крейсерть подвигоц

9 февральсь—Россиять военнай историясонза мяляфтови дата. Тя шиня 1904...

Мазыхть мокшень стиреньке

Кельгома морафтыеньке! 2025 кизоня «Мокшень правда» газетась сяда тов...

Рославльскяй Краснознамённай 326-це стрелковай дивизиясь пуроптфоль Саранскяйса

Тядде васьфтьсаськ оцюдонга оцю илать—Великай Сяськомать 80 кизонь топодеманц....

Эрявикс кизефксненди—башка мяль

Ётай недялять Саранскяйса, Республикань Кудса, ётафтовсь Мордовия Республикань сисемце...

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя Администрации Главы Республики Мордовия и Правительства Республики Мордовия – руководителя Пресс-службы Главы Республики Мордовия Елены...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть эзга 4№ полициянь отделу пшкядсь ошень 65 кизоса авась, кона пачфтсь вете тёжяньда лама цалковаенц...