Аделавсь «Россия» выставкась-форумсь

Шумордавсь международнай уровенень инь оцю культурно-социальнай мероприятиясь—«Россия» выставкась-форумсь. Сон няфтезень странаньконь, сонь региононзон, эряензон сатфксснон. Выставкась, конань арьсезе Россиянь Президентсь Владимир Путин, работась кафкса кофт, и тя пингста ваномонза сашендсь 18 миллионда лама ломань.
6 июльста Москуса, ВДНХ-са, ётафтовсь торжественнай мероприятия, коса тифтольхть итокт «Россия» выставкати-форумти. Церемонияса примась участия Мордовия Республикань Оцюнясь Артём Здунов.
Выставкать Оргкомитетонц председателец Сергей Кириенко азозе, што «Россия» форумсь сувась планетасонк кемонь ся васттнень лувксс, коза сашенды сембода лама ломань. Выставкас сайхнень 96 процентсна азозь, што содасть мезе-бди одня эсь регионцнон, странаснон колга, 95 процентсна—марясть гордость сянкса, мес синь россиянитт.
Сергей Кириенко отмечазе выставкать-форумть ётафтоманцты Мордовиять и сембе региоттнень путксснон. Марнек республиканьконь и Мордовиянь ялгафты командать казезь тиф работанкса.
Аф лама статистикать эзда: Мордовия Республикань стендть ванозе 571175 ломань, тяса ётафтовсь 130 оцю мероприятия—культурнайхть, од ломанень, образовательнайхть, деловойхть и спортивнайхть, а стане жа питни казне мархта 200-та лама розыгрыш.
«Оцюдонга оцю сюкпря Президентоньконди тя проектть арьсеманкса и ширенц кирдеманкса, Наталья Виртуозовати, выставкань сембе командати—тя работанкса. Ялгат, сюкпря эрти участиянкса, марстонь тевоньконди путксонкса. И мяляфтсаськ—тя аньцек ушеткс!»—спасибась эсь Телеграм-каналсонза Артём Здунов.