Мокшень алятне кунардонь пингста сявомок лац маштсть шуфтть мархта работама. Ламоц кудъётконь паршихне ульсть шуфтоннет. Атянь-атяньке и кутт шапондсть, и крандаст тиендсть, и куцюфтка шуфтста керсесть… Тяни эряфсь полафтсь. Семботь рамсесаськ лавкаста. Аньцек асушись родстонк-плямастонк козонга ашезь юма. Кда алять кядец моли, кодама инструмент теенза тят макса, сон вишкста тонады мархтонза работама. И курокста ня машты кяттнень алда ушедыхть лисендема мялень салай паршихть.
Тяфта лиссь и Темникавонь эряйть Борис Пиксинонь мархта. Шачемас коре сон Ковылкинскяй райононь Брочеевка велеста. Нинге шабакс семьянц мархта ётась эряма сяка аймаконь Изосимовкав. Школать аделамдонза меле поступась университету. Инженеронь-механиконь диплом мархта мрдась тяка вели и кота кизот покодсь главнай инженеркс. А меле эряфсь шарфтсь, семьянек савсь ётамс Темникав ошу, рьванц, Галина Сергеевнань шачема аймакозонза. Алясь тага поступась тонафнема, тяни ни юристокс. Борис Иванович комозьда лама киза покодсь следователькс.
2015 кизоня, мзяра Б.И.Пиксин лиссь пенсияс, цёрац апак учсек казсь теенза лобзик. Инструментсь стак ашезь пулиякшне. Алясь варжазе и нолдазе тевс. Шуфтть мархта покодемась тусь мялезонза. Тяни ульсь кода эсь кядьсонза и перяфксть одкстоптомс, и кудботмоть вагонкаса вачкамс, и узорхтка керомс, кда ваймось анай мазыши. А мокшалять ваймоц анась. Крфась седисонза творчествань цятконясь. Сась мяльс тиемс ёмла уноконянцты, Сашати, крандаскя. Ёфси стама, кодамотольхть сонь идькс пингстонза велеса, шуфтонь шарыня лангса. Лиссь пяк мазы и удалаф. Шабась пара мяльса налхксесь, мзярс ашезь каса. Тяни атяц арьсекшни тиемс теенза шуфтонь оцю кудня. Стама, кодамот няфнихть интернетса.
Пяк лездсть Борис Пиксинонь машты кяденза, мзярда покодсь Темникав ошень «Внешкольнай работань центраса». Сон вачкась-тись выставканди шуфтонь оцю пянакуд и лама мезе лия кабинетонь экспозицияти, штоба кепсемс мяльснон ся шабатнень, конат сашендыхть тяза эрь-кодама кружокс, занятияс или экскурсияс. Алять валонзон коряс, ламоц поделканза лядсть тозк, мзярда сон ётась покодема Советскяй Союзонь Геройть А.И.Семиковонь лемса школав. Но и тясонга улихть сонь экспонатонза. Сидеста мяльхть од паршиень тиемс максси рьвац, Галина Сергеевна.
Борис Иванович лямбе валса лятфнесы атянц, Фёдор Степановичень, кона цебярь плотниколь. Сон шапондсь и кутт, и картт, и банят. Атясь макссь уноконцты ёнь. Улема, эздонза и моли тя кельгомась шуфтти. Вдь, кода корхнихть ломаттне, шуфтсь тя аф кев, сон эрек, сонь эряви марямс. Эста шуфтста тиф паршись лиси удалаф и мазы.
—Аф ваномок сянь лангс, што тячи ламоть ули кода рамамс лавкаста, афкуксонь аляти маштома кемоста кирдемс кядьсонза узерть, содамс кода лаксема шуфтсь и стак тов. Тянди тонафнемат шабатневок. Тя маштомошись пяк кондясти теест сяда товолдонь эряфсост, лезды касомс афкуксонь алякс,—китькстазе Борис Пиксин.
Ирина Фадеева.