«Акша келу» илась—Зубово-Полянскяй районца

12 июньцта, Тройцянь шиня, Зубово-Полянскяй райононь Вадовские Селищи велеса кунардонь койс коре ётафтовсь «Акша келу» республиканскяй национально-фольклорнай илась.
Праздниксь мольсь шиньберьф. Саласть мяль «Офтонь вий» бароцямась, декоративно-прикладной творчествань мастерхнень выставкасна, мокшень койхнень мяльса кирдезь пидеф-паньф ярхцамбяльхне, спортсметтнень выступлениясна, велень хозяйствань и сувенирнай продукциянь выставкатне, фотосъёмканди инсталляциятне, концертнай программась.
Илас сашендсь лама почётнай инжи. Ётксостоль Мордовиянь Оцюнять и Мордовиянь Правительствать Администрацияснон руководителенц аф лама пингс тевонзон тиендисна А.А.Богатов. Сон поздравляндазень пуромфнень МР-нь Оцюнять А.А.Здуновонь лемста. Пара валхт азсть Зубово-Полянскяй райононь оцюнясь В.А.Поршин, Мордовия Республикань Государственнай Собраниянь депутатсь А.И.Надейкин, Краснослободскяй и Темниковскяй Епархиянь епископсь Климент, Мордовскяй (мокшень, эрзянь) народонь Межрегиональнай общественнай организациять председателец Ю.А.Мишанин.
Сяда тов максфтольхть казнет велень труженикненди, конат эсь тевснон мархта кандыхть оцю лезкс марнек районти. Тя «Анаевское» ООО-нь работникне: А.А.Андронов, А.С.Андронов, Н.В.Фомичева. Райононь оцюнясь казезень асу од ломаттнень, конат арасть сяськикс бароцямать коряс спортивнай оцю пялькстомаса: М.Лёвинать, М.Байкинать, А.Лобуревать. «Офтонь вий» тюремаса сяськикс тядде арасть В.Бутузов, С.Овтин, А.Зубарев, В.Евграшкин, А.Мордакин, А.Галдин.
Концертнай программать эса примась участия пцтай 200 артист. Ётксост В.Сивовать и А.Гвоздецкяень руководстваснон ала Санкт-Петербургскяй культурань институтонь Русскяй хорсь.
«Акша келуть» сценанц лангса кеняртьфтсь моронзон мархта Россиянь и Мордовия Республикань Заслуженнай артисткась, Мордовия Республикань Народнай артисткась Нина Васильевна Маркова. Эсь асушиснон няфтезь райононь ламоц самодеятельнай коллектифне.
«Акша келу» илась васенцеда ётафтовсь 1984 кизоня, ушетксокс теенза арась национальнай тюремась—бароцямась. Ушедыкс и пуроптыкс лувондови Зубово-Полянскяй райононь ся пингонь оцюнясь Николай Евдокимович Брагин.
Фестивальсь 2004 кизоня Мордовия Республикань Оцюнять Указонц коряс получась республиканскяй национально-фольклорнай праздниконь статус.
О.Белкина.