«Акша келуть» ушедыензон эзда фкясь

Николай Евдокимович Брагинонь мархта сотф Зубово-Полянскяй районть историясонза башка пялькс. Сон шачсь 1941 кизоня Ельниковскяй райононь Стародевичье велеса. 1990 кизотнень путфоль Зубово-Полянскяй районти оцюнякс. 1984 кизоня, мзярда Николай Евдокимович ульсь КПСС-нь РК-нь 1-це секретарькс, Зубово-Полянскяй районца васенцеда ётафтовсь «Акша келу» илась. Ушетксокс теенза арась национальнай тюремась—бароцямась. Вов кода Н.Е.Брагин азондсь тянь колга газетаньконди:
«1983 кизоня Тройцянь шиста ардонь Подлясово, Анаево велетненди, штоба ваномс анок-аф тишесь лядеманди. Ётнян Вад ляйть трванц малава и мезе няян—паксяса тюрихть 60 малава вии аля. Эстокиге гайфтень милицияв, мярьгонь кучемс 2-3 отряд, штоба лоткафтомс тянь. Монць ся пингс учень районнай газетать эстонь редакторонц Е.И.Суйкинонь ширеса. Сон тейне и азондозе, кле, тя карксонкса тюрема, сон аф фкя векста ладявсь.
Омбоце шиня кочкавоме партиянь райкомса. Азондонь тянь колга тоса. Корхтамада меле саме мяльс одкстоптомс карксть инкса тюремань праздникть, кона кунардонь пингста сявомок содаф Подлясово, Промзино, Вадовские Селищи, Зареевка, Анаево и Журавкино велетнень эса. Ушедоме акноклама, штоба 1984 кизоня ётафтомс оцю ила.
Тердеськ кинь тиихнень, ацафтоме 18 вайгяльбень кувалмоса асфальт, тиеме бетоннай седь. Эстокиге ётафтоме электроэнергия, штоба улель кода тиемс сцена, анокламс концерт. Тя илать мархта шачсь оцю кельгома национальнай спортти марнек Зубово-Полянскяй районца, колганк содасть республикаса».
Тяниень пингть, аф ваномок кизонзон лангс, Николай Евдокимович Брагин—Зубово-Полянскяй райононь оцюнять советникоц.
О. плотникова.