Александр Видясов: «Мзярдовок тясть ноля кядентень»

Мокшалять Александр Видясовонь мархта содафтонь кафтошка ковда тяда инголе, мзярда улень журналистть и публицистть Николай Храмовонь «Карьхне ловда аф пелихть» од книганц презентацияса. Александр Фёдорович сувась ся ломаттнень ёткс, кинь колга азондсь авторсь эсь сборниксонза. Шарьхкотьф, книгань геройкс стакащемда кивок аф арси. Аф кржаль туфталда Видясовонь кочкаманцтывок. Васендакиге, мокшалясь няфни цебярь пример сянь коряс, кода аф мяндевомс эряфонь стакатнень-сталмотнень ала, сяськондемс кибряса васьфневи прябалатнень, улемс ваймонь и характеронь ширде кемокс и мзярдовок аф нолямс кяттнень.

Александр шачсь и кассь Старошайговскяй райононь Акшов мокшень велеса, кона ётай кизоня васьфтезе эсь 100 кизонь юбилеенц. Тячи велесь, кода корхнихть, арась дачнайкс—эряйхть тяза сашендыхть аньцек кизонда, тялонда Акшовсь шамонды. А Александронь идькс пингста эряфсь тяса лаказь лакась, велеса ламоль шабада, од ломаньда. Саша Видясов кассь ся пингть коряс аф оцю семьяса, колма шабатнень ёткста—оцюсель. Ёмластокиге ялгафнесь спортть мархта, сяс школада меле тонафнема вастонди кочказе М.Е.Евсевьевонь лемса МГПИ-нь (тяни МГПУ-нь) физическяй воспитаниянь факультетть. Шумордазе и нльне кенерсь работамс физкультурань учителькс васенда Саранск ошень 38№, а меле—Сире Шайгав аймаконь Староожгинскяй средняй школаса. И тяни аф содави ни, кода ладяволь цёрать судьбац сяда тов, кда эряфонц крутаста афолезе полафта апак учсек зиянць…
Александр тячемс лац мяляфтсы обрезста ляцемда инголе эрь минутать. Ёженза ашесть машне фкя секундаска…
Саша Женя дуганонц мархта эрязста лиссть кудста, мзярда пирьфсост марявсть юватькшнемат и ляцендемат. Пингсь нилешка част шобдаваль. Фкясь браттнень эзда комотсь ласькозь фкя шири, омбоцесь—каршезонза. Сери перяфксть ваксса, конань фтала кирдевсть Видясофнень жуватасна, Саша васедсь ляцендихнень мархта. Сельмованфонц «пидезе» няйфсь: двуствольнай ружьянь обрезсь ладяфоль дуганонц кргапарьс. Цёрась эзк лятфтазень боксть коряс тренеронц валонзон: аф сявондемс соперникть лангста ванфцень, аф няфтемс лафчашицень. Ляпе вайгяльса ушедсь сетьмофнемонза ружьянь кирдить. Но тяса ласьксь ляцендить ялгац и сембе вийса эрьхтезе Сашань шамас. Рукопашниконь опытоц ашезь макса кадомс тя эрьхтемать «ответфтома». Тона реськафтсь модати. А секундада меле ни вень сетьмошить колазе двустволкать вайгялец, и тол лаца пиди сярятьфсь срадсь Сашань копоренц келес. Пулятне угадясть карязбакарти…
Васенце операциять цёрати тиезь Старошайговскяй районнай больницяса. Ранать аруяфтозь, а пулятне стаки лядсть карязсонза. Сашань пачфтезь Саранскяи.
Нейрохирургиянь палатаса сондедонза башка ащесть нинге 8 ломатть. Омбоце шиня кулось фкясь эздост, колмоце шиня—омбоцесь, сяльде—нилецесь… Од ши—од кулы…
—Мзярда мон туян эряфста, васенцеть вейхкса шиц ни кармай,—арьсесь эста Саша Видясов.—И тя сембе эряфозе, тяфтама курокста, ёфси одста?.. Аф улемс тянди!
Ашезь кошарда мокшень цёрать нолдамс кядензон врачнень коридорста маряви корхтамасновок: «Ламос аф таргасы… шинза лувфт…»
—Мон теенть нинге няфтьса,—азозе эсь потмованза Саша и срхкафтсь афкуксонь тюрема эсь эряфонц инкса.
…Саша Видясов кассь трудонь кельги семьяса, сяс физическяй сталмотне лац содафтольхть теенза нинге ёмласта. Шабакс ни маштсь и тишень лядема, и пенгянь аноклама-лазондома. А нинге 10-11 класса тонафнемста теенза сашендовсь лама якамс ялга—Сире Шайгав велень школав, а тя 9 вайгяльбет фкя шири! Сембось тя ламода лездсь Сашанди эряфонц инкса тюремаса. Эрь шиня, аф ваномок оцю сярятьфть лангс, цёрась ашезь макссе эстеенза лафчемкшнемс, сонць арьсекшнесь вийс коре тренировкат и тиендезень синь апак лотксек. Нльне эстовок, мзярда ашезь стякшнев васта лангста, кемокснезе ронгонц велхкссонза повфтаф кшнинь трубати кирдезь кепсематнень вельде.
Больницяса Александр ащесь кафкса кофт, кирдсь аф фкя операция, рдазу свинцовай пулятнень инкса фкя пингть нльне срхксесь сепсис, лотксесть работамда пичемаренза. Но сон семботь сяськозе.
Эрь шинь физическяй упражнениятне поладовсть кудсовок. Больницяста Саша лиссь инвалидонь коляска лангса, а сисемшка ковда меле ни сась консультацияс эсь пильгонзон мархта. Врачне ашесть веронда няйфти!
—Велеряеньке И.И.Родайкин тись тейне кафта клюшкат, и мон синь вельдест ёмла шаба лаца одукс тонафнень якама,—лятфнесы Александр.—Шити ётнень несколька вайгяльбе, мзярс клюшкатне ёфси ашесть шовав.—Сяльде ёрдайне синь, тифтень токарнай станокса кшнинь байдек, сталмоц котошка килограммаль, кармань якама вельденза. Нльне шра ваксса озада ащемстовок ашине кадонда пильгонень покойс, коль кеворянь мезе-мезе мархтост.
Мярьгомс, што стакаль, тя аф азомс и пяленцка сянь, мезе савсь няемс-кирдемс Сашанди. И сембе тя пингть вакссонзотольхть инь мала и кельгома ломаненза. Васендакиге, Женя дуганоц, кона лезнесь аф аньцек тевса, но и фалу мушендсь ся пингть пяк эрявикс, мялень кеподи-касфты валхт. Синь тячивок фкя-фкянди инь мала ломатть, най марсот—и тевонь тиемста, и ваймамста.
Мрдафтомс работамшканц С.Видясовонди удалась зиянда меле аньцек кафксошка кизода меле, но шумбрашинц петеманц-кемокснеманц лангса сон работай тячемс. Виде, тя аф шорси теенза эрямс кода сембе и сатнемс стама сатфкст, конатнень аф эрь шумбра ломанти вийс коре сатомс. Тячи Александронь ули сонцень бизнесоц. Сире Шайгавса дуганонц мархта панчсть пилорама, шапондыхть кудонди, банянди срупт. Эряви азомс, теест оцю вешфкссь аф аньцек эсь регионцонк, но и ширеса—Москуса и Моску аймакса, Санкт-Петербургса, Самарскяй и Саратовскяй областтнень эса.
Кафта кизода инголе Александр Видясов строясь усадьба аф ичкозе Акшов шачема веленц эзда. Тячи тяса ули кода ваймосемс сембонди, кинь мялец. Акшовскяй усадьбась ащи пяк мазы вастса. Тястонь перьфпяльсь салси мяль, кода кизонда, стане и тялонда. Эрямань кудняда башка ули баня, кизонь веранда, пруд, коса можна кунцемс калхт и эшелякшнемс. Усадьбав фалу лама сайда аф аньцек Мордовиянь райоттнень, но и шабрань региоттнень эзда. Аньцек тяддень июнь ковста тяса ваймосесь 300 ломань. Маластонь пингть Александр арьсекшни усадьбаса панжемс мокшэрзянь культурань музей и ресторан.
Александр Видясов, аф ваномок сянь лангс, мезе теенза савсь кирдемс, лувондсы прянц павазу ломанькс. Тячи сонь ули сембось эряфти кеняртькшнеманкса—кельгома тевоц, цебярь ялганза и семьяц, кона максси теенза вийхть. Мокшалять колма цёранза, конатнень сон касфтсыне эсь лацонза трудонь кельгикс, сталмода аф пеликс.
—Эряфсь тя эряф, эсонза сембот улендихть, но фалу мяляфтома, што мзярдовок аф эряви нолямс кяттнень, фалу верондамс аньцек цебярьс, и эста сембось лиси,—мярьгсь Александр Видясов. И сон тянь няфнесы эсь примеронц лангса.
О.ЕВДОКИМОВА.

Последние новости

РОССИЯНЬ ВОИНСКЯЙ СЛАВАНЬ ШИСЬ

23 февральсь—Отечествань Аралаень шись. 1918 кизоня тифоль Рабоче-Крестьянскяй Якстерь...

Госкомпании увеличили закупки у малого бизнеса Мордовии почти на треть

Общероссийский объём закупок крупнейших заказчиков у субъектов МСП по...

В Мордовии завершается строительство дома-интерната для престарелых и инвалидов

В Ичалковском районе завершается большая стройка. В рамках федерального...

Мазыхть мокшень стиреньке

Бта нинге аф кунара, мелять песта, «Мокшень правдась» тись...

Родькиттнень семьясна сувась сяськихнень лувксс

Аф кунара Москуса «Россия» Международнай выставкать видеса ётафтовсь «Родные—Любимые»...

Ётась эряфонь кувака ки

Мокшень писательсь Тимофей Андреевич Кирдяшкин сась мокшэрзянь литературав 1950...

РОССИЯНЬ ВОИНСКЯЙ СЛАВАНЬ ШИСЬ

23 февральсь—Отечествань Аралаень шись. 1918 кизоня тифоль Рабоче-Крестьянскяй Якстерь Армиясь.1993 кизонь 8 февральста Российскяй Федерациянь Верховнай Советть Президиумоц примась «Российскяй Федерациянь знаменательнай шить—Отечествань Аралайхнень...

Команда проекта #ПатриотКрафт из Мордовии провела мастер-класс по разработке сценариев патриотических игр в Мытищах Московской области

19 февраля в г. Мытищи Московской области на площадке АНОО «Ломоносовская школа-Зеленый мыс» прошел очередной мастер-класс по разработке сценариев патриотических игр, организованный командой грантового...

Госкомпании увеличили закупки у малого бизнеса Мордовии почти на треть

Общероссийский объём закупок крупнейших заказчиков у субъектов МСП по итогам 2023 года вырос до рекордных 8 трлн рублей. Благодаря национальному проекту «Малое и среднее...