Александр ЖЕВАЙКИН:«Тясть колсе ки лангонь правилатнень!»

Тяниень эряфоньконь стака шарьхкодемс автомобильфтома. Ошне и велетне кизоста кизос коль сяда и сяда пяшкотькшнихть эрь-кодама транспортса, а ки лангонь правилатнень ломанць ушеткшни тонафнемост ёмластокиге. Но аварият-зиятт сембе сяка лисендихть. Сядонга пичефти, мзярда кульсак, што авариясь нельгсь идень эряф. Мезе тячи тиендеви республикасонк, штоба инголдамс тяфтама зияттнень и ванфтомс ломанень эряфнень, азондозе Мордовиять эзга МВД-нь Госавтоинспекциянь управлениять организационно-аналитическяй работать, ки лангонь безопасностть пропаганданц и оперативнай информациянь анокламань отделонц начальникоц Александр Жевайкин.

—Александр Викторович, ётась ни кизоть пяледа ламоц. Азк, пожалуйста, тя пингста республикасонк ки лангонь авариятнень эса сидеста-аф токсевсть шабатне?
—Тяддень 8 ковста Мордовияса кирсь кемготува кизода ёмла шабатнень участияснон мархта авариятнень лувкссна. Виде, шавфта ётай кизонь тяка пингть коряс, меколанкт, арась сяда лама. Сембоц тяфтама ДТП-да лиссь 59, пингстост шавовсть 10 шабат, 60-ць—токавсть. Ня иттнень ламошкасна ульсть пассажиркс. Шабатнень-пешехоттнень участияснон мархта 8 ковста лиссь 17 ДТП. Пингстост 2 иттне шавовсть, 15-сь токавсь. 7 аварият лиссь мототранспортонь вятихнень мархта: 2-тне шавовсть, 2-тне—токавсть.
—Госавтоинспекциянь покодихне сидеста улендихть школатнень и идень саттнень эса, коса корхнихть шабатнень мархта ки лангонь правилатнень колга. Кодама мероприятият ётафтсь ни ГИБДД-сь тонафнемань од кизоть ушедомста?
—Госавтоинспекциянь покодихнень коль сяда сидеста ули кода няемс тонафнемань учреждениятнень маласа. Минь корхнетяма кода синцень шабатнень, стане тядяснон-аляснон мархта. Тага и тага весть лятфнесаськ, мезти вяти ки лангонь правилатнень колсемасна. Пяк сидеста оцюфне, эряскодомок, лоткафнесазь машинаснон аф тоса, коса мярьгондеви тиемс тянь, а видеста кинь ётама вастть лангса или инголенза. Уленди, кадондсазь машинаснон коза-повсь. Тяфта эвондакшнихть аварийнай ситуациятне. Синь инголдаманксост минь ётафтоме ни рейтт и мероприятият. Синь лувкссост «Юный пешеход», «Детское автокресло» и лия акциятне.
—18 сентябрьста сявомок 22 сентябрти молемс ётафтовсь «Неделя безопасности» Всероссийскяй акциясь. Улема, Мордовияське ашезь ляда эздонза ширеса?
—Афкукс, республиканьке примась участия марнек странань тя акциять эса. Сон водендаф сянди, штоба шарфтомс ломаттнень мяльснон шабатнень участияснон мархта авариятнень инголдамаснонды. Мордовияса ня шитнень тонафнемань организациятнень эса аноклафтольхть и ётафтфтольхть тя темать коряс урокт, пялькстомат, викторинат, флешмопт. Эсост пряснон няфтезь аф аньцек синць шабатне, но и тядясна-алясна, педагогсна. Тяда башка, «Безопасностень недялять» мяльса кирдезь, 19 сентябрьста сявомок 15 октябрти молемс Учи.ру тонафнемань платформаса ётни 1-9 классонь тонафнихненди «Аф пелькс кит» Всероссийскяй онлайн-олимпиадась. Мордовиянь шабатневок оцю мяльса няфнесазь тяса содамошиснон.
—Шабатнень участияснон мархта авариятнень инголдаманкса кодама работа арьсекшни мольфтемс Госавтоинспекциясь сяда тов?
—ДТП-тнень профилактикаснон коряс работать Госавтоинспекциясь мольфтьсы апак лоткафнек, кода тонафнемань кизоть пингста, стане и каникуласта. Аф шуроста мероприятияньконь эса участвовандама серьгятькшневихть общественностень, ведомствань и организациянь представительхне, простой ломаттне. Тяддень 8 ковста республикань тонафнемань учреждениятнень эса сотрудниконьке ётафтсть тёжяньда лама мероприятия. Саранскяень школатненди и идень саттненди минь яксеме колмогемоньда ламоксть. Шабатненди инспекторхне азонкшнесть аф аньцек ки лангонь правилатнень колга, но и содафтозь дорожно-патрульнай службать работанц мархта, няфтезь патрульнай техникать. Шабатнень мяльс тушенды «ДПС-сь фалу вакссот» акциясь. Вдь пингстонза теест ули кода марямс пряснон афкуксонь инспекторкс. Иттне озсихть патрульнай автомобильть руленц ваксс и кайгиста корхтамань устройствать пачк пшкятькшнихть ки лангонь ардыхненди и пешехоттненди, кошярясазь аф колсемс правилатнень.
Стане жа мольфтеви профилактическяй оцю работа тядятнень-алятнень мархта. Пачфнесаськ теест, што шабась сяда курокста тонадсыне ки лангонь правилатнень и аф кармай колсемост синь, кда тянь коряс цебярь пример кармайхть няфнема родителенза. Кизоть ушетксста сявомок сотрудниконьке ульсть 200-та лама родительскяй собранияса. Тяса сяда сидеста азонкшнетяма автомобильнай креслатнень и лия кирдембяльхнень тевс нолямаснон эрявиксшинц колга, кодама правилатне кирдемат мяльса велосипедса или мотоцикласа ардомста, мезенди эрявихть щапнень лангса светоотражающай элементтне и стак тов.
Медицинскяй учреждениятнень эса ГИБДД-нь сотрудникне васетькшнихть пеки аватнень мархта. Кепотьксонди, Саранскяень шачфтома кудса фалу ётафневи «Ёмла пассажирсь—оцю ответственность» акциясь. Тяса сай пингонь тядятненди азонкшневи автолюлькатнень квалма, няфневи, кода сон маштозь нолдама тевс, кода ётнемс китнень туркс идень коляскать мархта.
Мордовия Республикать эзга МВД-нь Госавтоинспекциять ширень кирдеманц пингста сяда тов мольфтеви «Автогород-Азбука ППД» проектть эряфс ётафтомац. Тя работась вятеви марса «Наукань и техникань саранскяень кудть» мархта президентскяй грантонь фондть средстванзон лангс. Госавтоинспециянь сотрудникнень участияснон мархта ётафтф ки лангса зиянонь аф нолдамать коряс кафта сятта лама урок. Майста Саранск ошень округонь школьникненди ётафтфоль «Безопасное колесо» оцю мероприятия, коса эрь шабати ульсь кода няфтемс прянц аф аньцек ПДД-нь правилатнень содамаса, но и велосипедть маштозь вятемаса и васенце медицинскяй лезксонь максомаса. Пялькстоматнень итогснон коряс инь цебярь результатт няфтсь Саранскяень 11№ школань командась. Ня стирнятне-цёранятне кармайхть няфтемонза республиканьконь конкурсть всероссийскяй этапсонза.
Тя сембось—аньцек аф оцю пялькс ся работать эзда, конань фалу, эрь шиня пяшкотькшнесазь Госавтоинспекциянь сотрудникне.
—Александр Викторович, меколи кодама советт максолеть лувиеньконди?
—Советсь пяк тёждя—тясть колсе ки лангонь правилатнень. Водительхненди эряви мяляфтомс, што машинаса идень креслась—тя аф шолякоткшнема (прихоть), а законть мархта ладяф вешфкс. Сонь эздонза ащи шабатнень эряфсна и шумбрашисна. Идень эряфта и шумбрашида питни мезевок аш. А сяс креслань и лия кирдембялень рамаманди ярмакне аф ужялямат. Тядятненди-алятненди мярьголень фалу лятфнемс шабатненди ки лангонь правилатнень колга. Азонкшнесть сяда сиденяста, што кить туркс ётнема аньцек тоса, коса мярьгондеви, и аньцек эста, мзярда няйсак, што сембе машинатне лоткасть и нолдайхть эсот. Аф эряви налхксемс китнень ваксса, и нльне куд пирьфса ащемстовок аф юкснема—тясовок ули кода повомс шары алу.
Сёксенда курокста шоподи, ламоц шабатне мртцихть школаста шоподемшовор, а сяс петфтада, стада щамснон, рюкзакснон лангс светоотражающай элементт. Синь лездыхть водительти няемс идть ичкоздекиге и эсь пингстонза лоткамс.
Нинге весть ёралень пшкядемс машинань вятихненди. Мяляфтость! Школатнень, идень саттнень, спортивнай площадкатнень и лама шаба мархта лия васттнень вакска ётамста уледа пяк внимательнайкс. Идсь, уленди, лисенди кить лангс апак учсек. Кенереда лоткамс. Тяда арда вишкста кинь ётама васттнень маласа.
Сембонди арьсян аф пелькс кит!
—Сюкпря!
Марина СТЕШИНА.

Последние новости

Нацпроект и снижение смертности при ДТП

В рамках национального проект «Безопасные качественные дороги» в Мордовии...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта,...

Саранск встретил март «Весенней ярмаркой подарков» 

1 марта в столице региона, при поддержке Министерства экономики,...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение»...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29...

Благоустройство Дубенского района Мордовии

Центральная площадь вс. Дубенки, 2 общественные территории в с....

Нацпроект и снижение смертности при ДТП

В рамках национального проект «Безопасные качественные дороги» в Мордовии реализуется региональный проект «Безопасность дорожного движения». Одна из его задач – сокращение смертности в результате...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание построено в 1974 году и давно требовало ремонта. В 2023 году по национальному проекту «Культура»...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта, прошла дискуссия «БРИКС: новые вызовы в эпоху глобального развития». На мероприятии также прошли дебаты «Приоритеты и...