4 июнць—Россиять военнай историясонза мяляфтови дата. Тя шиня 1916 кизоня Васенце Мировой войнать пингста ушедсь Алексей Брусиловонь командованиянц ала рузонь войскатнень врьгятемасна.
Рузонь войскатнень врьгятемань операциясна, конань арьсезе генералсь Брусилов Галицияса и Буковинаса австро-венгерскяй и германскяй войскатнень каршес, лувфоль Васенце Мировой войнань инь удалаф и цебярь операциякс.
Артиллерийскяй анокламаса 22 майста ушедсь Юго-Западнай войскатнень наступлениясна, кона сувась историяти «Брусиловский прорыв» лем ала. Эздонза ламода ащесь и ся, кода шумордави Васенце Мировой войнась.
Наступлениясь ушедсь тяфта. Маень васенце шитнень 41-це и 11-це корпусне врьгятсть и эрьхтсть Онут-—Доброновце участкаса. Своднай корпуссь срхкась кис 24 майста. Тяса, Нейтральнай пандть маласа, австриецне тисть газобалоннай атака, и 412-це пехотнай полкса токавсь нильгемонть малава ломань. Кафта суткат сембе ванондсть противникть ширес. Газкс лувондозь эрь коволнять или туманть. Ломаттне кеняртькшнесть, мзярда вармась уфась аф синь ширезост. Тевсь полафтсь 28 майста, мзярда врагть оборонань линияц сязьфоль.
Мзярс види флангсь шаштсь Садагурети и Котцманти, а тоста шарфтсь северо-западу Станиславти (Ивано-Франковскяйсь) и Делятинти, кержи флагоньке форсировандазе Прутть, фатязень Черновицатнень и ушедсь шаштома юго-западу и югу. 9-це армиясь мольсь тюрезь веер лаца, келептемок оперативнай эсь вастонц. 3-це кавалерийскяй корпуссь кучезень эсь дивизиянзон румынскяй границать кувалмос, керомок Румыниять Австро-Венгриять эзда, а пехотнай дивизияньке, сонь маластонь шабрац, ётазень Обчина-Маре и Обчина-Фередэу панда каряснень.
Австриецне фатясть перевалхненди. 9-це армиясь черновицкяй прорывть пингста юмафтозе личнай составть пцтай пяленц. Июльста и августста тапаме фкя вастса, а меле ёфси лоткаме. Весть генералсь Келлер анась штабонцты, кона ульсь Кимполунгса, охрана. Минь 409-це полконьке, кона резервасоль, тяни ульсь подчинениясонза. Кучфоль васенце батальонць, конанди оцюнякс тюрематнень эса лама офицеронь юмафтомда меле ульсь М.А.Василевскяй. Сон сась кавалерийскяй корпусть расположенияс и тись доклад штабонь начальникти. Ся дивандазь ванць лангозонза, кизефтезе, мзяра кизодонза (эста теенза мольсь 22 кизось) и тусь зданиять лия комнатас. Тоста лиссь Келлер, серьс оцю ломань, пеедезь ванць лангозонза, а меле кайгиста ювадсь: «Нинге войнань кафта кизот, и исяконь сембе прапорщикне миньцонк арайхть генералкс!»