24 ноябрьста Саранскяйса, Культурань республиканскяй Дворецса, кулхцонтфоль Мордовия Республикань Государственнай Собранияти МР-нь Оцюнять эрь кизонь Посланияц. Тяза пуромкшнесть РФ-нь Государственнай Думань, Мордовиянь Госсобраниянь депутатт, Россиянь Федерациянь Советонь представительхть, МР-нь Правительствань члетт, культурань, образованиянь, велень хозяйствань представительхть, Мордовиянь эряйхть. Сембоц—пцтай тёжянь ломань.
СВО-сь
Эсь Посланиянц МР-нь Оцюнясь Артём Здунов ушедозе тяниень пингть фкя инь пичефтить—специальнай военнай операциять эзда.
«Тячи сембе минь эрятама эсь лацонь условияса. Благотворительностсь, добровольчествась арасть тонатф тевкс бизнесонь азорхненди, предприятиянь директорхненди, трудовой коллектифненди, общественно-религиознай объединениятненди и сядот простой ломаттненди. Прважаф эрь посылкась, эрь лямбе паршись, снаряжениясь и оборудованиясь—путкс марстонь Сяськоманьконди. Лятфни цёраньконди-аляньконди, што синь кельгсазь и учендсазь кудса, што ширеснон кирнесы сембе Мордовиясь. Мялезе спасибамс эрти, кие ашезь ляда ширеса. Мордовиянь ламоц эряйхне лезнихть валса и тевса. Васенце шистокиге мархтонк од ломаттне—«#МыВместе» штабонь, Общероссийскяй народнай фронтонь доброволецне, конат работайхть аф лама пингс эрямань пункттнень эса, «пси линияса», лезнихть СВО-нь участникнень семьяснонды. Сембода активнай участия тя тевса примсихть аватне, боецоньконь тядясна, рьвасна, сазорсна.
Пяк ламотне тушендыхть военнай службас контрактс коре, эсь мяльса арсихть стройс. Тяфта синь тиендихть аньцек сяс, мес аф маштыхть ащекшнема ширеса, аф явфнесазь эсь пряснон странать, боецоньконь эзда. Меля, лама кизоста васенцеда, Мордовияса шачф-касф цёрати максф «Россиянь Герой» лемсь. Давид Малыйкинонди казнеть максозе Российскяй Федерациянь Президентсь Владимир Владимирович Путин. Специальнай военнай операциять ушедомста республикаса 123 шачфсь-касфсь казьфт Мужествань орденца, 27-сь—«За отвагу» медальса, колмотне—Суворовонь медаленц, вететне—Жуковонь медаленц мархта».
Мордовиясь максси шефскяй лезкс Херсонскяй областень Каланчакскяй округти. Ули социальнай объекттнень и инженернай инфраструктурать тиемаснон-петемаснон коряс работань план. Тонафнемань од кизоти Каланчакскяй округонь школатненди пачфтьфтольхть учебникт, художественнай литература, спортивнай оборудования, инвентарь, школьнай столоваи кядьгот, сценическяй костюпт. Республикать лезксонц вельде Каланчакса панчф адмиралть Фёдор Ушаковонь лемса часовня. Мордовиянь врачень бригадатне фалу улендихть подшефнай районца, тиендихть операцият, ётафнихть диспансеризацият и вакцинацият. «Мялезе спасибамс бизнес-сообществати, сембонди, кие примси участия тя работать эса»,—мярьгсь Артём Здунов.
Промышленностсь
Суверенитетть и национальнай безопасностть обеспечендамаснонды водендаф марнек республиканскяй экономикась. «Республикаса сяда тов ётафневи эряфс оптическяй волокнать производстванц пяшксе цикланц тиеманц коряс проектсь. Тя 10 миллиартт инвестиция и 120 од рабочай васта. Тядде тевс нолдаф импортонь полафты кабельхнень производствасна и од литейнай производства. «Рузхиммашсь» стаки лядонды лидеркс странаса подвижной составонь производствать коряс. «Биохимиксь» нолдазень производствас субстанциятнень и препаратонь од типнень. Пцтай кафтонь-крда касфтовсь «Электровыпрямительть», Саранскяй приборостроительнай заводть, «Орбитать», «Эпрометть», «Дормашть», «Нефтегазмашть», «Лидер-компаундть», «Рефлаксть», «Световой приборонь заводть» производствань объёмсна. Ламода полафтсь ситуациясь лёгкай промышленностьса. Тяса панчф 150-да лама од рабочай васта. Панчсевихть од предприятият»,—азозе Мордовиянь Оцюнясь.
Кадратне
Республикань Оцюнясь шарфтсь мяль миньцонк кадратнень аф сатнемаснон лангс. Тяниень пингть республикасонк пцтай 10 тёжятть вакансия! «Кошярясайне предприятиятнень ладямс эсь сотрудникснонды дополнительнай профессиональнай аноклама, тяконь лувксса переподготовкань нюрьхкяня курст и квалификациянь касфнемань программат»,—мярьгсь Артём Здунов.
Инвестициятне
Мордовиянь Оцюнять валонзон коряс, тядде основной капиталти инвестициятнень лувкссна арась 65 миллиард цалковай. Тяниень пингть миньцонк эряфс ётафневи 32 оцю инвестиционнай проект. Инвестициятнень марстонь лувкссна 100 миллиартта лама цалковай. Тядде уликсть колмоцекс пялькста келептьфт «Рузаевка» ТОСЭР-ть границанза. Тя лезды водендамс 2,5 миллиард инвестиция и панжемс 170-да лама од рабочай васта.
Касфневихть экспортонь
объёмтне
Артём Здунов кошардсь башка мяль шарфтомс Китайть и Индиять мархта сотрудничендамати. Азфоль, што тяниень пингть МГУ-са тонафни Индиянь 700-та лама студент. Китайть и Индиять мархта соткснень кемокстаманкса, кода мярьгсь Артём Здунов, эрявихть нолямс тевс Индийскяй культурань центрать и Российско-китайскяй ялгаксшинь обществать, конат панчфтольхть Саранскяйса тядде, ресурсснон.
Ёмла и средняй бизнессь
Республикань Оцюнясь пачфтезе, што мекольдень колма кизотнень касонды МСП-нь субъекттнень лувкссна, сон малаткшни 23 тёжянти. Сяда лама арси эсь прянь занци (самозанятый) ломаньда, кизоста синь лувкссна кассь кафтонь-крда и арась 20 тёжянь ломань. Артём Здунов кошардсь сяда товга сембе ширде лезнемс ёмла и средняй бизнести. Цебярь результатт няфтсь республикаса васенцеда регистрировандаф ёмла бизнесонь предприятиятненди и индивидуальнай предпринимательхненди налоговай тёждялгофтф системать коряс льготась.
АПК-сь
Экономикань важнайдонга важнай отраслятнень ёткста фкясь—велень хозяйствась. Тядде Мордовиянь аграрийхне кочкасть сёронь рекорднай урожай—2 миллионда лама тонна! Омбоце кизось мельцек Мордовиясь сатни рекорд и сянгяря снавть кочкаманц коряс. Цебярь результатсна якстеряпсонь касфнихнень—урядаф 1 миллион тонна сахарнай якстеряпс.
Мордовиясь лядонды лидеркс продукциянь основной виттнень производстваснон коряс. Тядде арьсекшневи нолдамс аф 445 тёжяньда кржа тонна жуватань и нармонень сиволь. Лофцть производствац тя кизоня арай 529 тёжянь тонна, алхнень—1,5 миллиард штука. Ноляви продукциять пцтай 80 процентоц пачфневи лия региоттненди и омба мастору.
Образованиясь
Кода азозе Мордовиянь Оцюнясь, тядде образованиянь системать виияфнеманкса водендаф 3,5 миллиард цалковай федеральнай бюджетста. Ётай кизоть коряс сяда лама 1,2 миллиард цалковайда. Тонафнемань эрь кизоня республикасонк панчсевихть образовательнай од организацият. Сяда тов мольфтеви школатнень капитальнайста петемаснон коряс программась—кафта кизоста петьф ни 32 школьнай здания. Маластонь колма кизотнень, кода азозе Мордовиянь Оцюнясь, эряви капитальнайста петемс нинге инь кржась 42 школа.
Активнайста виияфневи кизонь ваймосемань инфраструктурась. Федеральнай программать коряс строяфт 2 од корпуст Рузаевскяй районца «Изумрудный» лагерьса. Сай кизоня строявихть од корпуст Краснослободскяй райононь «Золотой колос» лагерьса и тиеви ремонт Кочкуровскяй райононь «Орбита» лагерти.
Средняй профессиональнай образованиянь сфераса «Профессионалитет» федеральнай проектть мяльс сявозь тифт 5 образовательно-производственнай площадкат фармацевтика, велень хозяйства, машиностроение, кабельнай промышленность направлениятнень коряс. Водендаф пцтай пяле миллиард цалковай федеральнай средства.
Строительствась
Артём Здунов азозе, што строительствань объёмтне тядде касфтовсть 6 процентта. Башка контроль ала кирдеви уроз иттнень эряма вастса обеспечендамасна. 2020 кизоста сявомок эрь кизоня касфневи тя целенди средстватнень объёмсна. Колма кизоста максови квартиратнень лувкссна касфтовсь колмонь-крда. Сяда тов темпне эрявихть сядонга касфнемс.
«Безопасные качественные автомобильные дороги» нацпроектть мяльса кирдезь мольфтеви китнень строямасна и петемасна.
Демографиясь
Фкя инь пичефти кизефкссь—демографиясь. Кода мярьгсь республикань Оцюнясь, одс шачихнень и эряйхнень шири тушендомаснон мархта ситуациясь аф простой. Россиянь Президентть поручениянц коряс кемокстаф одс шачихнень лувксснон касфнеманц и шаба мархта семьятнень ширеснон кирдеманц коряс региональнай программа. Сай кизонь 1 январьста тиеви индексация региональнай тядянь капиталти, келептевихть республиканскяй маткапиталть тевс нолямань возможностенза. «Эняльдян Правительствати и предприятиянь директорхненди арьсемс од и студенческяй семьятнень ширеснон кирдеманкса дополнительнай мерат»,—мярьгсь Артём Здунов.
Национальнай культурась и
землячествась
«Российскяй нациять гражданскяй единстванц кемокснемац и Россиянь нароттнень этнокультурнай виияфнемаснон ширенц кирдемац—государственнай национальнай и культурнай политикать фкя инь васенце целенза,—мярьгсь Артём Здунов.—Мокшэрзянь народть VIII-це съездоц, конань арьсекшневи ётафтомс сай кизонь октябрьста, должен арамс Россиянь мокшэрзянь этнокультурнай движениянь марстомомань кепотьксокс».
Республикань Оцюнясь азозе, што тядде ламода кемокставсть Мордовскяй землячествань од ломаттнень мархта сотксне. Марса ётафневи культурнай и деловой лама мероприятия.
Посланиять шумордамста Артём Здунов тердезень сембе пуромфнень «Россия» Международнай форумса Мордовия Республикать шис, кона панжевсь тячи, 30 ноябрьста, Москуса, ВДНХ-са.
Ольга Евдокимова.