Мокшень стирняти Ангелина Лушкинати 13 ноябрьста топодсь колма кизонят. Шачема шинц мархта сонь поздравляндазь тядяц, аляц, акац, щавац, тядянц акац, лия раднянза.
Ангелинась тядянзон-алянзон мархта эряй Саранскяйса, но пяк сидеста уленди тядянц, Елена Борисовнань, ёмла родинасонза—Старошайговскяй райононь Лемдяй мокшень велеса, коса сонь фалу учсазь кельгома щавац, сире щавац, тядянц акац. Сембе синь—мокшень щамонь-карямонь кельги и канни ломатть. Башка мяль шарфнихть коеньконди, синь ванфтомаснонды и содафокс тиемаснонды. И арьсихть, што тяфтамкс касфтомат иттне и унокне. А тя сатови, мзярда кепотьксокс эрь шабати улихть оцю ломаттне.
Ангелина ёфси ёмланяль нинге, а сонь ни эвондасть мокшаванянь щамонза: панарняц, нуланяц, сёконянза, крганянза… Кой-мезть оцюфне стафтозь, кой-мезть аноклазь синць. Эхянь няканякс няфти стирьнясь, мзярда наряжасазь мокшекс. Васенце Тройцянц и Очижинц васьфтезе мокшаванякс. Очижиста Лемдяйса якась алонь кочкама тяфта щафста-каряфста.
Но аф аньцек оцю илатнень пингста Ангелина и сонь раднянза щашендыхть мокшень щапт. Сидеста синь тянь тиендьсазь, мзярда пуромкшнихть марс. Стирнясь кенярдезь учи, мзярда соньге щамнянзон таргасазь и тага арай мокшень баяраванякс.
Весть, няемок, кода тядяц и тядянц акац повфтасть кргазост крганят, маладсь теест и ушедсь кядьса няфнема: моньге, кле, тямасть юкста, повфтада тяфтама мазыши. И сят, конешна, пяшкодезь Ангелинань эняльдеманц. Тясовок, кода шарьхкодьсасть, башка васта занясь оцюфнень кепотькссна.
Саранскяйса стирнясь якай идень саду. Касомок, кармай азондома ялганзонды Лемдяйть, тоса эряй раднянзон и, конешна, мокшаванянь мазы щамонзон колга.