Аноклайхть тонафнемань од кизоти

Малаткшни тонафнемань 2025-2026 кизось. Чамзинскяй муниципальнай райононь оцюнясь Андрей Сазонов ётафтозе районнай антитеррористическяй комиссиять заседаниянц. Панжемок сонь, комиссиянь председательсь отмечазе, што тонафнемань кизоть ушедомста райононь образовательнай учреждениятне сявомат кеме контроль алу. Фалу кирдемат мяльса ся мератне, штоба школатнень эса, иттнень и тонафтыхнень ёткса афоль ётафнев эряфс терроризмань идеологиясь.
«Сембонь минь инголенк ащи фкя задача, тиемс семботь сянкса, штоба райононь населениясь афоль повонда деструктивнай организацияс, перяма тянкса кись и тиема сембось сянкса, штоба синь афольхть прима участия диверсионнай действияса, террористическяй и экстремистскяй направленностень преступленияса»,—отмечазе Андрей Сазанов.
Штоба районца аф нолдамс мероприятиятнень пингста террористическяй и экстремистскяй проявлениятнень, тянкса улихть и вийхть, и средстват. Тянь колга корхтасть райононь правоохранительнай структурань вятихне.
Райононь тонафнема заведениянь директорхне заседаниянь участникненди пачфтезь, кода аноклафт школатне тонафнемань од кизоти, кодама мерат примафт образованиянь объекттнень эса терроризмать каршес оцю мероприятиятнень ётафтомаснон пингста. Корхтамась моли 1 сентябрть, Содамань шить, терроризмать каршес тюремань марстонь шить, 3 сентябрть колга. Образованиянь учреждениянь руководительхненди башка мяль мярькфоль шарфтомс ся афсатыкснень машфтомаснонды, конатнень лихтезень лангс комиссиясь. Тяфта жа нинге весть путфоль задача провермс оповещаниянь и эвакуациянь систематнень, внутренняй тевонь оргаттнень мархта экстреннай связень средстватнень. Кда ули кодамовок пелькс, эстокиге пачфтема правоохранительнай структуратненди. Тонафтыхнень ёткса тиема дежурства. Школань тонафтыхнень мархта эрявихть ётафтомс дополнительнай занятият. Кда эвондай кодамвок чрезвычайнай ситуация, штоба маштольхть экстреннай мерань примама.
Заседанияса кепотьф кизефкснень коряс комиссиясь примась конкретнай решеният, путсь ответственнайхть синь эряфс ётафтомасост.