Аралай Родинаньконь эса

Ковылкинскяй райононь лама од аля, цёра примайхть участия СВО-са. Ламотне эздост казьфт боевой орденца и медальса. Фкясь синь эздост А.В.Белов.
Анатолий Викторовичень лемоц лац содаф аф аньцек Ковылкинскяй районца, но и сембе республикаса. Васенце класста сявомок ушедсь якама спортивнай секцияв. Аляц, Виктор Алексеевич, вятсь школаса радиокружок. А эсь цёранц арьсесь сёрматфтомс боксонь тренерти В.В.Чукаровонди. Кизода меле кармась якама лия тренеронди В.Д.Илькаевонди. Котоце класста сявомок Анатолий примсесь участия Мордовиянь турнирхнень, чемпионаттнень эса. И эрть эса лисендсь сяськикс.
1995 кизоня А.Белов поступась тонафнема Н.П.Огарёвонь лемса Мордовскяй госуниверситетонь юридическяй факультету. Но спортть ашезе када. Меколанкт, кармась аралама университетть честенц кодама повсь пялькстоматнень эса. Кизода меле ни Анатолий пяшкодезе Россиянь спортонь мастеронь нормативть. Сон кафксть кемокстазе тя оцю званиять: васенцеда Москуса панжада чемпионатса, омбоцеда студенттнень ёткса чемпионатса Екатеринбургса. Ня пялькстомань результаттнень коряс, Белов ётась Россиянь чемпионатти. Университетса тонафнемста сон ётась пяле страна. Ульсь Тюменьца, Саратовса, Самараса, Казаньца и лия вастса.
Ашезе када спортть и университетть аделамдонза меле. Од векть ушетксста А.Белов вятсь Порапань школаса боксонь секция, коза якась колмогемонь шаба. Кода полициянь сотрудник, примсесь участия Россиянь МВД-нь чемпионатса. И тоста сашендсь аф шавонь кятть. Специальнай военнай операциясовок сон сембоса пример, аралай Родинаньконь и вандыень шиньконь эса.
Василий Илькаев.