АРХЕОЛОГИЯСЬ АРАСЬ ТЕЕНЗА КЕЛЬГОМА ТЕВКС

Археологиясь—наука, кона тонафнесыне кунардонь нароттнень эряфснон-ащефснон ванфтф памятникнень коряс. Кой-кит арьсихть, што теенза сяда оцю мяль шарфнихть тя тевса оцю опыт мархта эряфкшу кизонь ломаттне. Но тя аф тяфта. Археологиять кельгиензон и тя наукать мархта работайхнень ёткса аф кржа стирьда и цёрада. Фкясь эздост—Рузаевкаса шачфсь-касфсь Максим Валерьевич Бакаев.

Машина ки лангса работайхнень ошсост сон шумордазе 7№ школать, тонафнесь художественнай школаса. Сяльде аделазе Н.П.Огарёвонь лемса Мордовскяй государственнай университетонь Национальнай культурань институтть. Тонафнезе живописть, керамикать, качествать, академическяй рисункать… Кода шарьхкодесть, Максим—цёрась творческяй и фалу ащи вешендемань киса. Дипломть получамдонза меле служась армияса Президентскяй полкса. Воинскяй эсь лацонь частьса удалси служамс инь достойнайхненди. Максим тянемс лямбоста лятфнесы Президентскяй полкса служаманц. Тоза повомать инкса теенза савсь ётамс оцю конкурс. Мяльс сявовсь сембось—серьсь, шамапуткссь, физическяй ширесь и стак тов. Армияста мрдамда меле Максим Бакаев ётась компьютернай визуализациять коряс курст. И вов самай тя пингть эряфоц сотовсь археологиять мархта. И лиссь тя апак учсек. Тядянц, Мордовиянь содаф художникть Юлия Станиславовна Бакаевать, эзда цёрась кулезе, што Рузаевскяй районца кармайхть мольфтевома археологическяй раскопкат. Кинь строямста Левжа велеть маласа строительхне музь тостонь эряйхнень пяк кунардонь калмоснон (ся вастти мярьгихть Калмаляй). Тянь колга пачфтьфоль вяре вастса ащихненди. Культурнай наследиять ванфтоманц мархта сотф законть коряс, кунардонь калмотнень эрявсть тонафнемс. Мзяра пингта меле Левжав састь тевонь содай археолокт. Азфоль, што археологическяй раскопкатнень ётафтомс кочкавихть волонтёрхт. Тянь и азозе цёранцты Ю.С.Бакаева. Тяфта Максим повсь специалисттнень-реставраторхнень, реконструкторхнень, антрополокнень ёткс. Эрть эздост ульсть сонцень тевонза.
Могильникть шувомста цёрати васенда макссесть аф пяк стака тефт—секторхнень разметкаснон тиемаснон, аруяфтомать. Мзярда Максим Бакаев азозе, што машты чертёжень-мезень тиема, теенза отвечасть, што тяни ули заняф черчениять мархта.
М.В.Бакаевонь васенце экспедицияц эста удалась. Сон мялень салаель и пингстонза цёрась касфтозень содамошинзон археологиять коряс. Работась пяк цебярь коллективса и условияса. Могильникста удалась лама мезе мумс, а кой-коста вдь стане уленди, што раскопкатне шумордафт, а няфтемс аш мезе. Левжаса эрь калмось искусствань произведенияль.
Археологическяй раскопканзон М.В.Бакаев ушедозень Левжань экспедициять эзда. Сяда тов тяка организациять мархта кафта кофт шувондсь Пермь ошса, меле кафта недялят—Нижегородскяй областьса.
Тяда меле лия организация мархта раскопкат мольфтсь Калининградскяй областьса, коса работась 2,5 ков. Сяльде васенце организациять мархта тага тусь Перми, меле—Калугав. Калугаса, кле, пяк козя культурнай слойсь, сяс экспедициясь удалась. Калугада меле Максим тага якась Перми (мархтонза корхнемста самай тосоль).
Мордовияса шувфоль кунардонь могильник, Пермьса и Калугаса ульсть ошень археологическяй, Нижегородскяй областьса—паксянь раскопкат.
Мзярда эняльдень азомс, мезе удалась мумс—пачфтемс несколька кепотьксонь колга, Максим отвечась, што муфкста пяк и пяк лама. Пермьса—кшнинь кунардонь ярмакт, оцязоронь пингонь клянцеконь сюлекат, колаф фарфор, 19-20 веконь керамика, лама мезе лия. Калугаса удалась шувомс шуфтонь шаваня, кладонь ляткст, сёвонень кукшень—кулган. Нижегородскяй областьса васьфневсть XIII веконь муфкст!
Калининградса шувсть «ранняй кшнинь векть» эса. Муфкста аф ни кода ламоль, но ётксост аф кржаль керамикада.
Тяни моли Башкортостанца ётафтови раскопкатненди анокламась.
Максим Бакаев пяк кельгсыне историять и нумизматикать. Археологиясь лездсть теенза сюлмамс марс кельгома тевонзон.
«Археологиясь—эряфонь тевозе. Раскопкатнень ётафтомста эрь шиня васьфнян историять и сидеста—нумизматикать мархта, касфнесайне корязост содамошинень. Тяни, кепотьксонди, тонафнесайне клянцеконь кядьготнень. Азома сявок, што археологиясь—тев, кона трясамань»,—мярьгсь Максим Валерьевич.
Чертёжникть-археологть М.В.Бакаевонь мялец ётамс и ваномс марнек Россиять. Рузаевкаста цёрась ащи цебярь кепотьксокс од ломаттненди. Теенза васенце вастса археологиясь—кунардонь ётай пингть эсь кядьса муф паршихнень вельде тонафнемац.
Семботь тянь, а стане жа экспедициятнень эса няйфть и кульфть колга сон мялень салайста пачфни Telegram социальнай сетьса эсь блогонзон эса. Фкять лемоц Дневник Археолога, омбоцеть—Блог Максима Бакаева.
Максим Валерьевич Бакаев надияй, што мзярдовок археологическяй раскопкат кармайхть ётафневома Саранскяйса. Валонзон коряс, тя ошть пяк козя культурнай слоец, сяс ули мезе тонафнемс.
Т.АЛЬШИНА.

Последние новости

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть...

«Варяг» крейсерть подвигоц

9 февральсь—Россиять военнай историясонза мяляфтови дата. Тя шиня 1904...

Мазыхть мокшень стиреньке

Кельгома морафтыеньке! 2025 кизоня «Мокшень правда» газетась сяда тов...

Рославльскяй Краснознамённай 326-це стрелковай дивизиясь пуроптфоль Саранскяйса

Тядде васьфтьсаськ оцюдонга оцю илать—Великай Сяськомать 80 кизонь топодеманц....

Эрявикс кизефксненди—башка мяль

Ётай недялять Саранскяйса, Республикань Кудса, ётафтовсь Мордовия Республикань сисемце...

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя Администрации Главы Республики Мордовия и Правительства Республики Мордовия – руководителя Пресс-службы Главы Республики Мордовия Елены...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть эзга 4№ полициянь отделу пшкядсь ошень 65 кизоса авась, кона пачфтсь вете тёжяньда лама цалковаенц...