Мокшэрзянь народть культурац козя самобытнай койхнень мархта. Странаньконь сембе уженянзон эса, коса эряйхть мокшэрзянь народть представителенза, кородозь ванфтсазь синь и макссесазь сай пингонь поколениятненди. Татарстан Республикаса эряй мокшэрзянь диаспорать представителензон аф ёмла пялькссна. Вов ни 11 киза Тетюшскяй райононь Кильдюшево велеса ётни «Валда Шинясь» мокшэрзянь культурань республиканскяй илась. Сон лемтьф кизоть ушедоманцты и кизоса шинь инь кувака шить васьфтеманцты. «Валда Шинясь» койс коре арси усковомань вастокс странань ламоц нароттненди—русненди, мокшэрзятненди, татархненди, чувашненди, удмурттненди.
15 июньцта национальнай гуляндаматнень эса ульсть Мордовиянь Оцюнясь Артём Здунов и Татарстанонь Раиссь Рустам Минниханов. Региононь Оцюнятне ванозь площадкатнень и корхнесть «Валда Шинять» участниконзон мархта.
Илань и мокшэрзянь уникальнай культурать атмосферасна тяса азорондасть сембе вастова! «Песнь сквозь века: Защитники земли мордовской» лем ала прологсь главнай сценать лангса пачфтсь ваныхненди геройть колга. Сон семьяста, коса честь максыхть традиционнай питнишитненди, ванфтсазь историять и культурать.
Приветствовандамок илань участникнень, Мордовиянь Оцюнясь Артём Здунов азсь благодарностень валхт Татарстанонь руководствати мокшэрзянь койхненди, кяльти и мокшэрзянь культурати мялень шарфнеманкса. «Тейнек тя пяк эряви и мала седити! Тя эряви и аляньконди-цёраньконди, конат тяни воявайхть фронтса,—консолидацияньке, ялгаксшиньке, синь шарьхкодьсазь, што тяса сетьме, тяса врагсь аф ётай. И минь кирдьсаськ синь ширеснон. Тячи «чёпафттама» мокшэрзянь народть культурас, эряфс, няфтьсаськ, кода уважандасаськ атянь-атяньконь. Фалу тянь колга карматама мяляфтома и макссаськ тянь уноконьконь идьснонды».
«Кенярдезь васьфтьсаськ сембе инжиеньконь, райоттнень, региоттнень, конат састь Тетюшскяй району,—мярьгсь Татарстанонь Раиссь Рустам Минниханов.—Тяса тячи главнай мордвинць, Артём Алексеевич—оцю спасиба, што тон мархтонк. Странаньке лама нациянь, и республиканьковок. Аф кунара ётафтоськ «Сабантуй» илать Мордовияса. Тячи марса ётафтсаськ «Валда Шинясь» мокшэрзянь илать Татарстанца. И тя тиендьсамазь малакс».
«Валда Шинясь» илать мархта Татарстанонь Тетюшскяй райононь эряйхнень и инжихнень поздравляндазень муниципальнай образованиянь оцюнясь Рамис Сафиуллов.
«Валда Шиняти» сайхне варжазь национальнай ярхцамбяльхнень, примасть участия спортивнай пялькстоматнень эса и содафтсть мокшэрзянь народть семьянь питнишинзон мархта. Активносттненди сувсесть интерактивнай площадкатне, традиционнай налхкоматне и народнай промыслань изделиянь ярмаркась. Башка темакс арась СВО-сь—няфтьфоль экспозиция, кона лемтьф Отечествать аралаензонды.
Машты кядь ломаттнень «Тюштянскяй ярмаркасост», кона лац содаф, няфтьфтольхть декоративно-прикладной искусствань предметтне: сувенирхне, шуфтста изделиятне, мазоптомбяльхне и ламось лиясь. Инжихне ванозь мокшэрзянь пирьфть—кунардонь кудть и калонь кунциень пирьфть, конань азоронза оцю мяльса азондсть мокшэрзянь калонь кунцемать эсь лацонь ширензон колга.
Илать пяльксонзон эзда фкясь—национальнай бароцямась, идень мокшэрзянь налхкоматне и спортивнай пялькстоматне.
Конешна, эрсь, кинь мялец, щашендозе эсь лангозонза мокшэрзянь кунардонь костюмть, карьсезень карьхнень, варчсезень эсь виензон крьхця (коромысло) мархта ведьса якамаса и пянакудста ям или лям мархта сяканять таргамаса.
Мордовияста артисттне няфтсть «Валда Шинять» инжиензонды концертнай козя программа. Стане жа сценать лангса выступандасть Татарстанонь, Чувашиянь, Ульяновскяй областень творческяй коллектифне.