Артём Здунов васетькшнесь Россиянь Геройть Давид Малыйкинонь и сонь семьянц мархта

Декабрь ковть ушетксста минь земляконьконь, Дубёнскяй районца шачфть-касфть, Давид Малыйкинонь содазе марнек странась. Мужестванкса и героизманкса, конат няфтьфтольхть специальнай военнай операциять пингста, сон казьф «Золотая звезда» медальса. Ляйть туркс уемста гвардиянь ефрейторсь артиллерийскяй и танковай ляцендематнень ала машфтозень неонацисттнень кафта танкаснон и лихтезень танкатнень ляцендемаснон алда ранендаф 8 ялганзон. Россиянь Геройти казнеть максозе РФ-нь Президентсь Владимир Путин.
20 декабрьста Давид Алексеевич рьванц и шабанзон мархта сась емла Родиназонза—Дубёнскяй району. Тоса землякснон васьфтезь лямбоста и кенярдезь, депутатонь советть решениянц мархта геройти максф Дубёнскяй райононь Почётнай гражданинонь лемсь.
Мордовиянь Оцюнять Артём Здуновонь мархта васедемась ётафтовсь Республикань Кудса. «Пара мяльса васьфнетядязь Мордовияса,—приветствовандазень инжихнень региононь вятись—Сембе минь марятама гордость подвигцень инкса, Давид Алексеевич! Республикань пяк лама эряйть мяльсноль корхнемс мархтот. Надиян, тон муят пинге васедемс од ломаненьконь—кадеттнень, юнармеецнень мархта. Теест тя ули афкуксонь событиякс!»
Тяниень пингть Давид Малыйкин семьянц мархта эряй Псковса. Срочнай службада меле 2015 кизоня сон кемокстась ВДВ-нь Псковскяй дивизияса военнай службать ётаманкса контракт. Тоста тусь Украинав: лувозе, што служамс Отечествати тяфтама стака пингста—сонь священнай долгоц кода гражданинонь и солдатонь.
«Минь марятама гордость аляньконь инкса, теенза аф стак максф тя оцю казнесь»,— азозе рьвац Ольга Малыйкина.
Давид Алексеевичень подвигоц ашезь ара апак учсек кулякс сонь работай ялганзонды и радня ломанензонды: од ломанць эряфоньберьф няфнесь кеме характер.
«Минь пяшкодьсаськ путф задачать и машфтсаськ нацистскяй заразать, кона тяряфни явфтомс народоньконь и тапамс марстонь историяньконь. Сяськомась ули минь мельганк!»—мярьгсь Давид Малыйкин Кремляса «Золотая звезда» медальть получамста.