Ащихть кепотьксокс идьснонды

Атерь велеса шнамань валса корхнихть Ивашкиттнень семьяснон колга. Сергей Николаевич аделазе Рузонь Велязьмань основной общеобразовательнай школать, меле тонафнесь Зубова Полянань педагогическяй колледжса. Аделамдонза меле поступась тонафнема М.Е.Евсевьевонь лемса МГПИ-нь филологическяй факультетонь мокшэрзянь отделенияв. Татьяна Андреевна аделазе Атерь велень 1№ средняй общеобразовательнай школать. Тонафнесь тяка вузонь филологическяй факультетонь рузонь отделенияса. Кафцьке получасть учителень профессия.
Татьяна Андреевна пцтай колма кизот покодсь Саранскяень Идень и од ломанень библиотекаса, вятезе краеведениянь отделть. Лац покодеманкса Мордовия Республикань Культурань, национальнай политикань и архивнай тевонь министерствась азсь Благодарность.
Татьяна Андреевна мрдась Саранскяйста Атери. Сявозь покодема райцентрань 1№ средняй общеобразовательнай школав. Тяни сон работай 1«Б» классть мархта. Сонь кельгсазь иттне, родительхне. Оцю авторитетоц учитель ялганзон ёткса.
2014 кизоста сявомок Сергей Николаевич и Татьяна Андреевна марсот.
Сергей Николаевич 17 киза трудендай УФСИН-ца.
Ивашкиттнень семьяса фалу ладяма, кельгома и фкя-фкянь шарьхкодема. Касыхть колма идьсна. Виктория тонафни 3-це класса, Александр—1-це класса. Аннати колма кизонят, якай идень саду.
Ивашкиттне активнай ломатть. Аш стама ила, коса афольхть прима участия. Кда идень садса кодамовок ила, синь васенцетнень ётксот. Кда школаса кодамовок мероприятия, тосовок примайхть активнай участия.
—А кода лиякс,—корхтай Татьяна Андреевна.—Семьясь васенце вастса. Родительхненди эряви улемс и спортсменкс, и учителькс, и психологокс, и сембоса кепотьксокс.
Сергей Николаевич и Татьяна Андреевна ащихть цебярь примеркс идьснонды. Марса ётафнесазь ваймама пингснон, лездыхть фкя-фкянди кудонь тевса.
Илья ВЕШКИН.
Снимкаса: Ивашкиттнень семьясна.