И.А.Шукшинонди—70 киза
Иван Афанасьевич Шукшин сувась мокшэрзянь литературав кода идень писатель. Эряфстонза кенерсь нолдамс аньцек фкя азксонь пусмоня. И лиссь сон 1997 кизоня «Шееронь оцязор» лем ала. Эстонь кизотнень Иван Афанасьевичень сидеста лисендсть стихонза, азксонза, пеетьксонза «Мокшень правдаса», «Мокша» журналса. Вузонь содаф учёнайсь, профессорсь М.Г.Имяреков макссь тя азксонь пусмоти оцю питне. «Мокшэрзянь идень литературась» тонафнемань пособиясонза, кона лиссь Н.П.Огарёвонь лемса Мордовскяй госуниверситетса 2003 кизоня, путозе И.А.Шукшинонь фкя рядс мокшэрзянь содаф писательхнень мархта. Сёрмадсь сянь квалма, што сон няфтьсы нинге эсь прянц мокшэрзянь литератураса, сёрмады од произведеният, нолдай стихонь и азксонь пусмот. Тяфта и улель, кда аф пингта инголе куломац. Алянь векоц сонь пяк нюрьхкяняль, сязевсь 51 кизоса. Ёфси одняста кадозе рьванц удавакс, стирец и цёрац лядсть аляфтома. И вов ни кевейхксые киза аш мархтонк Иван Афанасьевич. Но эряфсь ашезь лотка фкя вастс, моли инголи. Рьвац тянемс трудендай. Стирец—музыкант. Цёрац—индивидуальнай предприниматель. А Атерь аймаконь Шяйгужа велеса сёлкфста ащи шачема-касома кудоц. Кой-коста сашенды Москуста Пётр брадоц. Шаронды перьфканза, мезе-бди чакай-покай. Лятфнесыне шачема-касома кудонц эряензон. А эрясть эсонза трудонь кельги ломатть. Афанасий Михайлович и Прасковья Михайловна—трудонь кельги ломаттельхть. Кафцьке трудендакшнесть «Красное знамя» совхозса. И касфтсть синь мянь сисем итть: ниле цёрат, колма стирьхть. Браттнень эзда лядсь аньцек Пётр Афанасьевич. Прасковья и Нина эряйхть Москуса. Анна Афанасьевна лядсь Шяйгужу. Сембе синь шнама ломатть.
И.А.Шукшинонь биографияц тяльги аф оцю кагодонь лопаняс. Шачсь сон 1955 кизонь 23 ноябрьста. Аделазе Од Кярьгань кафкса кизонь школать. Средняй образования получась Стрельникова велеса. Аф лама пинге покодсь «Красное знамя» совхозса. Служась армияса. Тонафнесь Мордовскяй госуниверситетонь филологическяй факультетонь мокшэрзянь отделенияса. Стихонь сёрмадома ушедсь нинге кафксоце класса тонафнемста. И синь печатлакшневсть «Мокша» журналса ноляви «Якстерь тяштеня» приложенияса.
Вузонь аделамда меле сявозь покодема «Мокшень правдав». Лама киза трудендась сёрмань отделса печатень ветеранть Д.А.Любимкинонь мархта. Тоса содаф писательть М.С.Моисеевонь мархта вятезь литературань и искусствань отделть. А мзярда Михаил Степанович арьсесь тумс пенсияс, вастонц занязе Иван Афанасьевич. Но отделонь вятикс покодсь аф ламос, сяс мес пингта инголе кулось.
Сембе тя пингть Иван Афанасьевич ашезь юкснев. Лемозонза литературнай илат ётафневсть шачема-касома уженясонза: Атерень и Оцяду велень библиотекатнень эса, Оцядувонь основной общеобразовательнай школаса. Тя школать сёлгомдонза меле илатне кармасть ётафневома Мокшень Козловкань средняй общеобразовательнай школаса. Тяса эряйхть сонь творчестванц кельгиенза Н.Н.Гераськина, Л.Н.Трегулова. Илас сашендыхть фалу сазороц Анна Афанасьевна мирденц, Иван Трофимовичень, мархта. Мзярда шисоль Темникавса эряй брадоц Михаил Афанасьевич, Сснга рьванц, Ирина Алексеевнань, мархта сашендсь лятфнемань илатненди. Синь пингстост кайгихть стихт, лятфнемат, морот. Иттне путнихть сценкат.
—Иттненди эрявихть содамс районца шачф-касф писательхне,—корхтай педагогическяй трудонь ветеранць Н.Н.Гераськина.—И.А.Шукшинонь лятфнемань иласонзовок шабаньке няфтезь кода маштыхть стихонь лувома, морама, сценкань путома. И тя аф кальдяв.
23 ноябрьста И.А.Шукшинонди топодель 70 киза. Калмаф сон Рузаевскяй райононь Пайгарма вели. Тя вастть сон пяк кельгозе. Тяса ётафнезень сембе ваймама шинзон. Тяса дачацоль. Кельгозе сон и Шяйгужа веленц. Мзярда мушендсь пинге, сашендсь родителензон варжама, теест кудонь тевса лездома. Тянемс сонь Шяйгужа велеса мяляфтсазь.
—Тя монь идькспингонь ялгазе,—корхтай велеряец В.И.Путяйкин.—Шабакс марса якаме школав, налхксеме войнаняса. А свадьбастон ульсь почётнай инжикс. Мзяра киза тяза ёта, сяка тейне аф юкстави. Ломанць пяк цебярель. Мзярда сашендсь вели, вестевок ашезь ётне кудозень вакска. Фалу сувсесь. Най корхнеме мархтонза седикс-ваймокс.
Илья ВЕШКИН.
ЦЕБЯРЬ ЯЛГА
Петькань удоманц колазе кудонголе калдордомась, меле панжевсь кенкшсна и марявсь Алда бабань казяма вайгялец:
—Вай! Тя мезе тяфтамсь! Тага кафта сараз лефксоне повафт… Кирттяда пине, а мельганза аф ваттада.
Тя пингть ингольдень куду сувась тядяц, и сонь кяжи ванфонц коряс цёранясь шарьхкодезе, теенза сави явомс Полканонц мархта. Но тяряфтсь араламс пиненц:
—Тядяй, Полканць аф токсесыне сараз лефкснень.
—Монга тяфта арьсян,—ляпоняста мярьгсь тядяц,—пиненьке аф тяфтама, но лефкскятне вдь ашет… Пади, и пиненьке муворусь. Архт, цёрай, сотк Полканть.
Шись аньцек кеподсь пиче вирть фталда и лямбе сюролдаса косьфнезе летьке модать. Полканць матфоль шинять каршес. Лиссь Петька. Пинесь увазевсь и кармась перьфканза ёладома. Цёранясь лихтсь кши кочамня и венептезе Полканти, меле кувакаста таргазе ваймонц и аф мяль вельде сотозе сонь шякс. Пинесь равжа сельмоса ванць цёранять лангс и бта кизефнесь: а мезенкса?..
—Мезе, Полкан, тият? Мярьгсть. Содаса, аф муворуват, но оцюфне кулхцондомат.
Полканть ашель мялец ащемс сотфста, сон сувсь, нотфнезе цинзерть, сускондозе, но шавос.
Лоткасть юмсемда и Алда бабань лефксонза.
—Мезе корхтань,—мярьгсь Петьканди, меле поладозе,—и сяда товга шякса киртьк, кда мяльце мархтонза аф явомс.
«Или афкукс Полканць тяса муворусь?—арьсезевсь цёранясь,—кда тя тяфта, Полканти сави нюрьксемс сотфста, а кда нолдаса, ёфси юмафтса».
Полканть тяни ашезе кельге марнек юромсь, сембода пяк бабатне. Кати лефксонь повайкс лувондозь, кати кяжиста уваманц инкса. А Петькати сон ужялель.
Илять салава тядянц эзда нолдазе пинеть воляс. Полканць, мярьгат, тянь учсезе, эстокиге комотсь и кармась перьфке арнема, а меле чёпафтсь шобдати и юмась. Кувать учсесь цёранясь пинеть эса, но сон ашель и ашель.
Конашкава кенярдсь, мзярда шобдава няезе Полканонц, сон матфоль куцеманяснон ваксс шинять каршес.
—Веньберьф ласькондеть, вов и пара, а тяни меки сотомс эряват,—но эстокиге сускозе кяленц.
—Тя тон ноляйть пинеть?—кудста лисембачк корхтазевсь тядяц,—тага ламотнень сараз лефкссна повсефт. Мезе тяни ломаттненди корхтама?
Петька муворуста нолдазе прянц.
Обедть малас пуромсть Алда бабань пяли тя ширдень пцтай сембе бабатне. Корхтасть, яфиезь кядьснон, кинь-бди сюцесть, эвфнесть милицияса.
Петька ащесь пиненц ваксса нолдаф прят. Сон ашезь веронда Полканонц муворушинцты, но лац шарьхкодезе, кодама оцю зиянц повсь пинец, а мезьса теенза лездомс—ашезе сода.
—Эряви велень Совету молемс жалобама. Катк пинеснон коза мяльсна тисазь,—марявсь Алда бабань вайгялец.
Маладсь Катуж атя.
—Мезенте аф явови?! Пуромоде бта базару.
Няезень поваф сараз лефкснень, куфкстась…
—Да тинь, улема, сараз ёратада пидемс? Эка, мзяра эздост!—а меле поладозе:—Кальдяфт тевоньке, эряви инекуй прясь шавомс.
—А мон мезе корхтан!—кирдезе ширенц Алда баба.
Сидеста, сидеста тотназевсь Петькань седиец, вов-вов туйхть сельмоведенза, кргапарезонза бта пиже марь повсь и кодавок аф нилеви.
—Сон, инекуйсь, тязк, пирьфса, вешема,—киньге лангс апак ватт атясь кармась сюволяма кшнинь байдексонза торфонь марть.
—Алда! Мзярошка киза ни торфне ускфт?
—А мезенди тейть?!
А Катуж атя стаки пезфнезе байдеконц торф марти. Тя пингть тоста лиссь хорёк и юпадсь шири.
—Мезе сельмонтень тетькость?! Шавость куроконе!..
Но мзярс бабатне охиесть и ахиесть, хорёксь чёпафтсь перетнень шири, а Полканць мельганза.
—Эх, нолдасть инекуйть,—абонтфста пшкядсь атясь, а меле поладозе,—вов кие сараз лефкснень эса лочай…
Полканць мрдась аф лама пингта меле, кургсонза поваф хорёксь.
—Вов кие разбойникть пенц сатозе,—корхтазевсь атясь, а тон, Алда баба…—«пинесь, пинесь муворусь». Штайть лацкас сельмотнень, ватт,—и няфтсь байдекса хорёкть шири.
Иван ШУКШИН.