Атери сашендсь Советскяй Союзонь Геройть Михаил Девятаевонь цёрац

8 июльста Советскяй Союзонь Геройти, легендарнай лётчикти М.П.Девятаевонди топодель 107 киза. Шачема уженясонза, Торбеева посёлкаса, ётафтовсь лама интереснай ила. Ульсть панчфонь путомат, мужествань урокт, шра ваксса седикс-ваймокс корхнемат. Мероприятиятнень эса примасть участия Торбеевскяй муниципальнай райононь оцюнясь С.Ф.Шичкин, Советскяй Союзонь Геройть цёрац, медицинскяй наукань докторсь А.М.Девятаев рьванц мархта, лия содаф ломатть.
Мзярда шисоль Михаил Петрович, мокшэрзянь крайса улемстонза вестевок ашезь ётне и Атюрьевскяй районть вакска. И тя аф стак. Атерьса, районнай больницяса, трудендакшнесь Михаил Петровичень племянникоц, Пётр Васильевич. Сон содаф хирурголь. Меле эрясь Саранскяйса. Атерьса ётафтозе эряфонь мекольдень кизонц и Геройть тядяц, Акулина Дмитриевна. Трудонь кельги тя мокшавась шачфтсь 14 идь. Финцне кулсесть ёмласта вачашить и урматнень эзда. Омбонцне шавовсть, юмасть куляфтома Великай Отечественнай войнаса. Уноконц, Пётр Васильевичень, ширеса мокшавась и эрясь. Тяста и прважазь мекольце кис.
М.П.Девятаев пяк ламоксть ульсь Атюрьевскяй районца. Васьфнесь Атерь велень 1№, 2№, Стрельниковань средняй школань коллектифнень мархта. Ня васедематне ётнесть Атерень киносетень, Культурань кудонь, школань зданиятнень эса, ульцяса, ару кожфса. Школань инь цебярь комсомолецнень, пионерхнень мархта озафнесь шуфтонят. Кой-конат ванфтовсть тячемс.
И вов лама кизонь ётазь, Атерь велень эряйхнень мархта васьфтсь Советскяй Союзонь Геройть цёрац А.М.Девятаев. Тя васедемати лац аноклафоль. Атерень библиотекань покодихне семботь тиезь сянкса, штоба сон ёталь мялень салайста, лямбоста, куватьс мяляфтоволь. Аноклафтольхть выставкат, конат азондсть Советскяй Союзонь Геройть Атерьса улендеманц, ломаттнень мархта васетькшнеманзон колга. Ламоль книгада, фотографияда, газетань публикацияда, конат азондсть сонцень Михаил Петровичень и мзярдовок аф юкстави подвигонц колга.
Атерень библиотекась аф кунара петьфоль, одкстоптфоль. Библиотекань азоравась Н.И.Марфина ётафтсь Казаньцта, Торбееваста саф инжихненди экскурсия. Азондсь сянь колга, кода эряй-ащи тячи Атерень районнай бибилотекась, кодама илат-мероприятият ётафневихть.
А.М.Девятаев—содаф учёнай, медицинскяй наукань доктор, профессор. Сон аф кельгсы кудса ащекшнеманц. Ётазе марнек странать. Гордостень марязь лятфни-азонкшни алянц, Михаил Петровичень, колга. Иласа отвечась пуромфнень кизефксснон лангс, казьсь библиотекати алянц колга книгат.
Стрельникова велень поселениянь оцюнясь С.З.Кильдеев лятфнесь сянь колга, кода 1975 кизоня М.П.Девятаев васьфнесь школань тонафнихнень, велеряйхнень мархта.
Ульсь Советскяй Союзонь Геройсь и Теньгушевскяй райононь Шокша велеса, генерал-майорть, общественнай деятельть Н.С.Шароновонь родинасонза. Аляц, Семён Маркович, историянь учитель, сембе эряфонц лемдезе школати. Сон нолдась книга, коса ули лятфнема и М.П.Девятаевонь Шокшу сашендоманц квалма. Тя книгать Н.С.Шаронов казезе А.М.Девятаевонди.
Тя илас сашедсь и Торбеевань М.П.Девятаевонь кудонц-музеенц заведующаец Н.Б.Бегаева. Сон лама азондсь Девятаефнень семьяснон колга. Тердезень иттнень, илань участникнень самс музеи, кона одкстоптовсь-петевсь, коса эвондасть од экспонатт.
Н.М.Кондрашкин шачсь и кассь Атерьса, но марнек эряфонц ётафтозе Торбееваса. Иласа азсь мялень салай лама предложения.
Мяльхть-арьсемат азсь и Атерень храмть настоятелец, протоиерейсь С.Г.Большаков.
Инжихненди эсь работанзон казезень содаф художниксь Н.Н.Шумкин.
Васьфтемась ётась мялень салайста. И тянкса шнамань валхт азомат библиотекаса покодихненди Н.И.Маркинати, Л.К.Вешкинати, Е.В.Шкушинати, Т.К.Канинати и лиятненди.
Илья Вешкин.
Снимкаса:
васедемать пингста.