Стаки пачфнетяма республикань мокшень райоттнень сюреса сёрматф картаснон колга. И тисаськ тянь «Лама нациянь Мордовия» сюреса сёрматф карта» Республиканскяй фестивальть мяльса кирдезь нолдаф каталогста сявф информациять вельде.
Тячи азонттама Атюрьевскяй и Ельниковскяй райоттнень сюреса сёрматф картаснон квалма.
АТЮРЬЕВСКЯЙ МУНИЦИПАЛЬНАЙ РАЙОНЦЬ
Районть сюреса сёрматф картанц пакшец, кона арась республикань оцю картати мозаикань пяльксокс, ащи тя районть эсь лацонь ширенцты келиста и мялень салайста няфтемакс.
Сонь лама нацияста ащемац, койхнень, культурать марс пуропнемасна няфтевихть авторхнень мархта атямъёнгонь композициять вельде, кона ащи кели и тяйня лама тюсонь китькснень марса няфтемаснон эзда.
Композициять кучкаса Покровскяй храмсь. Сон строяф сядода лама кизода инголе и лувови Атерь велень районнай центрати главнай мазоптомакс. Храмсь няфтьф кода райононь сембе велетнень и тяса эряй нароттнень марс пуроптысна.
Основной населениясь—мокшет, сяс сюреса сёрматф картать и творческяй работать лангса «крёзкс» сюреса сёрмадомань техникаса няфтьфт традиционнай мокшень щамонь сёрматфкст, тюст, мотифт.
Районть картанц и творческяй работать тиезь: «Атюрьевский РДК» МБУК-нь швеясь Надежда Яковлевна Манушкина и «Атюрьевский РДК» МБУК-нь костюмернайть заведующаец Ольга Павловна Кулягина. Кураторсь «Атюрьевский РДК» МБУК-ть директороц Елена Викторовна Ведякова.
ЕЛЬНИКОВСКЯЙ МУНИЦИПАЛЬНАЙ РАЙОНЦЬ
Картать и творческяй работать вельде няфтьфт мокшэрзянь орнаментть элементонза, конат сявфт национальнай щамста, татаронь сюреса сёрмадомать эзда элементтне—рушникста, пря лангонь щамста рузонь сюреса сёрмадомаста.
Марнек композициясь аноклаф илань тюсса. Тя няеви якстерь, сенем, сянгяря, тюжя тюснень вельде. Мокшэрзянь и рузонь сюреса сёрматфнень эса инь сидеста васьфневи и кельгови якстерь тюсть ули символическяй лама смузец, вельденза няфневихть кельгомась, мазышись, вийсь, аф пелемась, смелшись, шумбрашись, лямбось, сяськомась, конат пяк эрявихть эряфть сяда тов мольфтемстонза. Сянгяря тюссь кемоста сотф перьфпяльть мархта, сяс няфнесы эряфть ушедоманц и одксшить. Тюжя тюссь няфти кенерьфокс улема, асуши, питниши.
Авторть виень аф ужяльдезь работаманц вельде картась лиссь эрек: козя урожаень максы паксят, вирьхть, Мокша ляйсь, культурнай наследиянь памятникт—Кевонь Бродса Пресвятой Богородицать Покровонц церькавонц, Новоямская Слобода велеса Пресвятой Богородицать Успениянц церькавонц мархта. Музе эсь вастонц ельниковскяй матрёшкась, конань 1980 кизоня Ельниковскяй ДОК-ть сувенирнай цехоц тиендезе туристтненди, конат сашендсть Москуву XXII-це Олимпийскяй налхкоматненди. И, конешна, апак юкстак каньгушанскяй гармониясь.
Районть картанц и творческяй работать тиезь Ельниковскяй муниципальнай райононь «Лицей» Муниципальнай общеобразовательнай учреждениянь технологиянь учительсь (сюреса сёрмадомась) Татьяна Васильевна Кудашкина, изобразительнай искусствань учительсь (эскизсь) Надежда Ивановна Куликова.
Проектть куратороц Ельниковскяй муниципальнай райононь Администрациянь культурань и спортонь, од ломанень тефнень коряс отделть заведующаец Ольга Ивановна Кузина.