БЕРЛИНСКЯЙ НАСТУПАТЕЛЬНАЙ ОПЕРАЦИЯСЬ

Колмоце рейхть столицанц штурмоц (16 апрельсь—2 майсь). Рейхстагть вельхксса стяфтфоль Якстерь Знамясь.
Великай Отечественнай войнань мекольце сражениякс ульсь Берлинть инкса тюремась, или Берлинскяй стратегическяй наступательнай операциясь, кона ётафтовсь 1945 кизонь 16 апрельста сявомок 8 майти молемс.
16 апрельста 3 частста тостонь пингть коряс ушедсь авиационнай и артиллерийскяй анокламась 1-це Белорусскяй и 1-це Украинскяй фронттнень эса. Шумордамдонза меле тевс нолдафоль 143 прожектор, штоба сокоргофтомс противникть, и атакас тусь пехотась, конанди лезнесть танкатне.
1-це Украинский фронтонь войскатне эрязста шаштсть Берлинти югть и западть ширде. 25 апрельста 1-це Украинскяй и 1-це Белорусскяй фронтонь войскатне шоворсть Берлинть маласа, фатямок «кольцяс» противникть Берлинскяй марнек группировканц.
Берлинскяй группировкать машфтомац мольфтевсь ошса 2 майти. Штурмса сявондевсь эрь ульцясь и кудсь. 29 апрельста ушедсть тюрематне Рейхстагть инкса, кона эрявсь сявомс 1-це Белорусскяй фронтонь 3-це Ударнай армиять 79 стрелковай корпусонцты.
Рейхстагть инкса тюрематне мольсть 1 маень шобдавати. 2 майста 6 частста 30 минутаста Берлинонь оборонать начальникоц артиллериянь генералсь Г.Вейдлинг макссь пря пленц и мярьгсь берлинскяй гарнизононь войскатнень лятксснонды лоткамс тюремда. Шить кучкаста гитлеровецне ошса лоткафтозь сопротивлениять. Тяка шиня машфтфтольхть Берлинть маласа кружаф немецкяй войскань группировкатне.
9 майста 0:43 частста москувонь пингть коряс генералсь-фельдмаршалсь Вильгельм Кейтель, а стане жа немецкяй ВМС-нь представительхне, конатнень ульсть эрявикс полномочиясна Деницонь эзда, Маршалть Г.К.Жуковонь инголе (советскяй ширде) подписандазь Германиять безоговорочнай капитуляциянц колга Актть, мезсь лоткафтозе ниле кизонь войнать. Тя ульсь Сяськома!
1 майста рана шобдава Рейхстагть фронтсонза, скульптурнай группать маласа, либордсь ни Якстерь Знамясь, конань максозе 150 стрелковай дивизиять командиронцты 3-це Ударнай армиять Военнай советоц. Сонь стяфтозь 150 стрелковай дивизиянь 756 стрелковай полконь разведчикне М.А.Егоров и М.В.Кантария, конатненди оцюнякс ульсь батальононь политическяй частьть коряс командирть заместителец лейтенантсь А.П.Берест, а лездыкс—И.Я.Сьяновонь ротаста автоматчикне.
«Берлинть сявоманкса» медальса казьфоль 1100000-да лама ломань, ламонцне эздост—Великай Отечественнай войнать шумордамдонза меле.