3 сентябрьста Россияса ульсь Терроризмать каршес тюремаса солидарностень шись. Пингстонза республикасонк, кода и марнек странаса, ётафтовсь лама аф фкя лацонь мероприятия.
Фкясь синь эздост «Бесланонь зиянць—марстонь сярятьфоньке» лем ала ульсь И.Д.Воронинонь лемса Мордовскяй краеведческяй музейса.
Мялямонь акциять панжезе краеведческяй музейть директороц, филологическяй наукань кандидатсь Дмитрий Фролов. Пуромксса примасть участия Мордовиянь Оцюнясь Артём Здунов, республикань Правительствать Председателенц васенце заместителец Галина Лотванова, культурань, национальнай политикань и архивнай тевонь министрсь Светлана Баулина, культурань и искусствань лия деятельхть, специальнай военнай операциянь участникт и ветератт, студентт и кадетт, школаса тонафнихть.
«Комсь киза ётась ся трагическяй шиста, мзярда ломаттне мольсть школав, надиямок од эряфонь лангс. Минь, панжемок од школа и вятемок тоза васенце классу иттнень, фалу надиятама цебярень лангс. Документальнай кинофильмаса тинь няесть, мезе тисть иттнень и синь учительснон мархта афтерьксне-террористтне.
Минь аф кунара улеме Курскяй областьса, ваноськ, мезе тисть нацисттне Запорожьяса, Донбасса, Новороссияса. Кяжсь тя пингс аськоляй минь моданьконь ланга. Сяс тячиень шить ули кода лемдемс Терроризмать каршес тюремаса солидарностень шикс!
Минь боецоньке, эряфонь апак ужяльтть, эрь шиня тюрихть нацистскяй террористтнень и бандиттнень каршес. Тиендьсазь семботь ня афтерькснень страназонк аф нолдаманкса.
Тейнек эряви содамс: укронацисттнень аноклазь и макс-
сихть теест ярмакт и оружия Западонь ся центратне, конат тяда инголе тяфта жа аноклазь террористтнень, конат шавондозь иттнень и учительхнень Беслан ошень школаса. Мон сембонь серьгятькшнетядязь улемс бдительнайкс, сяс мес эрсь эздонт тячи—тя Родинань ванфты-аралай»,—мярьгсь МР-нь Оцюнясь.
Пуромфненди эсь мялензон азозень СВО-нь участниксь, Мужествань орденонь кавалерсь, «Лектор» позывной мархта спецназонь офицерсь. Геройть валонзон коряс, сембось ащи эсь эздонк. Сяс тейнек вийс коре тиемс семботь Бесланонь зиянть аф нолдаманкса.
Сяльде вал максфоль СВО-нь ветеранти, офицерти Георгий Бабаджановонди. Сон мярьгсь: «Кяжть и терроризмать национальностьсна аш, и синь эрявихть плхтамс псидонга пси кшниса».
СВО-нь ветераттне отвечасть иттнень кизефксснон лангс.
«Бесланонь зиянць—марстонь сярятьфоньке» акциять аделавомста пуромфне кулхцондозь «Россиять инкса!» мороть, конань моразе республикань содаф артистсь Александр Сергеев и ванозь «44-це кизонь августста» кинофильмать.
Владимир Нестеров.