«Бессмертнай автополксь»—Саранскяень ульцятнень эзга

Саранскяйса Великай Сяськомать 79 кизонц шиня ётафтовсь «Бессмертнай автополк» оцю акция. Вов ни колмоце кизось мельцек сонь пуропнесы-ётафнесы «Единая Россия» партиять региональнай отделенияц.
«Сяськомань Шиня арась пара койкс ётафнемс автопробект. Тяфтама мероприятиятне пуропнесамазь марс сембонь минь, эрь-кодама национальностень и верань ломаттнень. Тяни, специальнай военнай операциять ётафтомста, тя сядонга важна. Минь верондатама минь великай Россияньконди, Президентоньконди и сай пингоньконди»,—мярьгсь «Единая Россия» партиять региональнай отделениянц секретарец—партиять Мордовскяй региональнай отделениянц исполнительнай комитетонц руководителец Станислав Тиньгаев.
Акциять эса участвовандама сашендсть общественнай организациянь активисттне и сембе сят, кинь мялецоль лятфтамс-сюконямс аляньконди и атяньконди, конат максозь эряфснон минь воляшиньконь инкса.
Автоколоннась ушедсь пуроптовома Ленинонь проспектса. Омбоце кизось мельцек вятикс теенза арасть «Ночные волки» мотоклубонь региональнай отделениять представителенза.
60 автомобильста и мотоцикласта ащи колоннась, кона мазоптфоль Сяськомань Знамяса и Великай Отечественнай войнань ветераттнень портретснон мархта, ётась ошень сембе микрорайоттнень эзга.