1812 кизонь 8 сентябрсь—Россиянь воинскяй славань ши. Тя шиня рузонь армиясь Михаил Кутузовонь командованиянц ала кирдсь сражения французскяй армиять мархта Бородина велеть видеса.
ТЮРЕМАТЬ УШЕДОМАЦ
Тюремась ушедсь вете частста шобдава Бородина велеть видеса Егерскяй полкть лейб-гвардиянц позициянц лангс Италиянь вице-корольть Э.Богарнень корпусонц пяльксонзон атакаснон мархта. Францусне сявозь тя пунктть, но тя ульсь синь тевда шорси манёврасна. Эсь главнай эрьхтеманц Наполеон тиезе Багратиононь армиянц каршес. Маршалхнень Л.Н.Давунь, М.Неянь, И.Мюратонь и генералть А.Жюнонь корпуссна несколькаксть атаковандазь Семёновскяй флешнень. Багратион ранендафоль.
РАЕВСКЯЕНЬ БАТАРЕЯНЦ ИНКСА ТЮРЕМАСЬ
Флешнень фатямдост меле основной тюремась ушедсь рузонь позициять центранц—Раевскяень батареянц инкса, конань 9 и 11 частста шобдава вииста атаковандазе противниксь. Омбоце атакать пингста Э.Богарнень войсканзонды удалась фатямс серьть, но курокста францусне паньфтольхть тоста рузонь несколька батальоттнень, конатненди оцюнякс ульсь генерал-майорсь А.П.Ермолов, цебярьста ётафтф контратакаснон вельде.
Шить кучкаста М.И.Кутузов кучсь М.И.Платовонь кавалериянц эзда казакт и кучезе генерал-лейтенантть Ф.П.Уваровонь кавалерийскяй корпусонц Наполеононь кержи флангонь войсканзон каршес. Рузонь конницать рейдонц вельде несколька частс кирдевсь рузонь лафчемф центрать лангс француснень од штурмсна. Тя пингть Барклай-де-Толли тись группировка вийхненди и лихтсь ингольце линияти од войскат. Кафта частста шить наполеоновскяй частьтне тяряфтсть колмоцеда фатямс Раевскяень батареянц. Наполеоновскяй пехотать и конницать тевсна вятсть сатфксс, францусне фатязь тя укреплениятьке. Рузонь войскатне потасть, но сяземс од фронтть оборонанц противникти ашезь удала, аф ваномок кавалерийскяй кафта корпуснень тяряфтомаснон лангс.
Сяськомс рузонь армиять стаки ашезь удала. Вов мезе тяштсь отечественнай историксь Е.В.Тарле: «Сяськикс эсь прянц кивок ашезе маря. Маршалхне корхнесть эсь ётковаст, мяльсна колафтольхть. Мюрат азозе, што сон шиньберьф ашезе сотце императорть. Ней мярьгсь, кле, императорсь юкстазе эсь тевонц. Илядьти молемс кафцьке ширде кайгсь артиллериясь и мольсь веронь шудемась, но русне ашесть арьсе аф аньцек ласькомать, но и потамать колга».
Противникнень эзда фкяське ашезе сата путф задачать: Наполеон ашезе тапа рузонь армиять, Кутузов ашезе арала Москуть. Бородинось кандсь Наполеононди мялень колама—тя тюремать шумордамац мезьсовок ашезе лятфне аф Аустерлицть, аф Иенать, аф Фридландть. Французскяй армиять ашельхть виенза панемс противникть мельге. Рузонь армияти, кона воявась эсь территориясонза, нюрьхкяня пингста удалась одукс пяшкодемс рядонзон лувксснон. Сяс питнень максомаса инь видеть азозе сонць Наполеон: «Сембе тюреманень эзда инь пяк кальдявсь ся, конань максыне Москуть ала. Францусне эсонза няфтезь эсь пряснон сяськомать сатоманцты анококс улезь, а русне кемокстазь аф сяськовикс улемань славать».