Чесменскяй тюремась

7 июльсь Россиянь воинскяй славань шитнень эзда фкясь. Тя шиня ульсь Чесменскяй тюремаса сяськомась.
Чесменскяй тюремась ульсь 1770 кизонь 24-26 июньцта (5-7 июльста) Чесменскяй бухтать ваксса, Анатолиять западнай ширесонза и Хиос островть маласа. Тя вастсь ульсь Османскяй империять и Венецианскяй республикать, российскяй и турецкяй флоттнень ёткса, военно-морской ингольдень ламоц тюремань вастокс. Чесменскяй тюремась арась 1769 кизонь Пелопонесскяй Омбоце восстаниянь пяльксокс.
1770 кизонь июнть песта марс пуромф рузонь эскадрась музе турецкяй флотть Чесменскяй бухтать рейдса. Эскадраса ульсть 9 линейнай корабльхгь, 3 фрегатт, бомбардирскяй корабль, а стане жа 17 лия судна и транспорт, конатнень марстонь вооружениясна ульсь 740 малава орудия. Турецкяй флотсь, конанди оцюнякс ульсь Ибрагим Хусамеддин-паша, ащесь 16 линейнай корабльста, 6 фрегатста, 1430 орудия мархта 50 вспомогагельнай суднаста. Лиякс азомс, туркатнень флотсна кафтонь-крда сяда вииель миннеть коряс.
24 июньцта (5 июльста) шобдава рузонь эскадрась сувась Хиосскяй проливти и главнокомандующайть Алексей Орловонь сигналонц коряс строявсь кильватернай колоннас. «Пряннекс» мольсь «Европа» корабльсь, мельганза—«Евстафий» корабльсь, конань лангса эсь флагонц кирдезе авангардть командующаец адмиралсь Спиридов.
Шить турецкяй корабльхне ушедсть ляцендема рузонь корабльхнень ланга. Спиридов мярьгсь молемс атакас туркатнень «Реал-Мустафа» флагманскяй корабльснон лангс. Абордажнай тюремать пингста «Евстафий» и «Реал-Мустафа» корабльхне сязевсть. Адмиралсь Спиридов кенерсь тумс «Евстафийста».
26 июньцта (7 июльста) веть Грейгонь отрядоц сувась бухтав. Шобдавас плхтафоль и ваяфтфоль 15 турецкяй линейнай корабль, 6 фрегатт, 40-да лама вспомогательнай судна. «Родос» линейнай фкя корабльсь сявфоль пленц. Рузонь флотть кораблень юмафксоц ашель, шавовсь 11 ломань.
Российскяй флотть славнай сяськоманц колга кулясь пачкодсь Петербургу. Адмиралсь Спиридов казьфоль Святой Андрей Первозваннаень орденонц мархта, графсь Фёдор Орлов и командирсь Грейг получазь Святой Георгиень 2-це степенень орденонц.
Тя сяськомать содафокс тиеманц инкса Екатерина II мярьгоманц коряс, стяфтфоль Чесменскяй колонна Царскяй Велеса.