—Эшись пяк эряви! Кода велеса эшифтома? Катк ламотнень кудснон ваксса синцень скважинасна, но синь вдь аф максыхть ведь, кда электричества аш. А велеса сиденяста сон аф уленди. То авария линиять лангса, то петемань тефт мольфтевихть… А кда пожар? Ведь сявомс ёфси аш коста кармай, ульцять кувалмос сембе эшинятне таштомсть ни, каладсть, ведсь ламотнень эса рдаскодсь и симомс аф кондясти. Вов тя эшись, конань ваксс шувфоль одсь, тифоль нинге 1960 кизотнень,—азондсь тейне Инсар аймаконь Навлей велень эряйсь Михаил Андреевич Лапаев, ащемок тяшкава ламос учсеф и пцтай анок эшить ваксса.
Кода содавсь, Навлей велень Котовскяень и Ворошиловонь лемса ульцятнень эряйснон аф фкя киза ни пичефтезень-ризнафтозень оржа прябалась—ведьфтома лядомась. Пцтай сембе тяса эряйхне аф од ломатть ни—пенсионерхт, и петемс ульцянь эшитнень ашезь сатне аф ярмаксна, аф вийсна. Пшкятькшнесть велень администрацияв, кона тя пингть фкя Яндовище, Иса пря и Исса велетнень эса. Ответсь фалу фкяль: ярмак аш. Ломаттне кармасть арьсема, месендема сяда тов. Кочксесть подписть, тяшнесть сёрмат райононь оцюняти. И тевсь токавсь вастстонза. Ярмак муфоль. Тялонда сась сивотьф бригада и шувозе эшить. Эряви азомс, сон сатомшка крхка—пцтай кемголмува метра. Бетононь кемгафтува кольца тусь модать алу. Сянкса ведень санць тяса цебярь, ведьта лама, сон ару и танцти. Тяни ульцяряйхне ведьфтома аф лядыхть коське кизостовок.
Михаил Андреевич эсь вийсонза петнесы-цебярьгофнесы эшить. Стяфтсь столбанят, тись вельхкскя, шавозе пирьфонц рейканяса. Кядец алять моли. Сонць пилси шочкста седяфкат, инзетькшнесыне синь и латцесыне коза эряви. Кизефксозень лангс, коса тонадсь тяфтама лац шуфтть мархта покодема, алясь мзолдозь азозе, што сон школада меле Саранскяйса техникумса получась столяронь-плотниконь образования. Эряфоньберьф кондястсть теенза ня маштомошитне. «Эх, минь тяса виреньке аф ни кодамот. Эчке шуфтт эсост пцтай аф васьфтят. А вов тайгаса…»—стакаста куфкстсь алясь и кармась лятфнема одкс пингонц.
М.А.Лапаев 20 лама киза эрясь и покодсь Усть-Илимск ошса, кона ащи Иркутскяй областьса Ангара ляйть маласа. Повсь тоза комсомольскяй путёвкас коре 1974 кизоня. Тозк васьфтезе рьванц, Нина Семёновнань, шачсть шабасна. Сибирьса алясь служась контрактс коре, покодсь водителькс. «Кодама аньцек транспорт ашезь сав вятнемс. Мянь скорай помощьсовок мзярошка пинге арнень,—лятфни алясь ётаф кизонзон колга.—Эряме Усть-Илимскяйса аф кальдявста. Аньцек ваймозе сякокс лажаткшнесь шачема аймакозон—велезон. Лажатфозень янгафнемс лезнесь «Мокшень правда» газетась. Мон фалу сонь сёрматфнине. Страницанзон лангста сотцине республикань сембе кулятнень, бта козонга тяста афи тушендонь».
Мзярда састь 90-це кизотне, эряфсь ламода полафтсь и мирттне-рьвятне Лапаефне стирьснон и цёраснон мархта мрдасть Михаил Андре-евичень шачема ширезонза. Тевонь кельги ломанць стак аф ащи вестенге. Навлейсонга алясь илештень кятть кярьмодсь работати. Мзяра-бди пинге покодсь вирень ваныкс, усксесь автобусса шабат школав. А нинге рамась эстеенза трактор. Эсь кядьсонза кочкась сокамат-месть, тись тракторонцты «каймовок». И тялонда вельденза аропнесы ловть эзда велень кить. Улендсть пинкт, мзярда Михаил Андре-евичта башка тя шири лия тракторхт фалень урядама афи пачкотькшнесть.
М.А.Лапаев велеса кельгома ломань. Нарде азор. Улема, сяс велеряйхне и надияфтозь теенза анок шувф эшить цебярьгофтоманц. Содасазь, Михаил Андреевич тисы семботь, кода эряви. Эшить петеманкса Лапаев ялгась киньге кядьста трёшниковок ашезь сяве, семботь тиезе эсь вийсонза.
«Катк ляды колган цебярь лятфнембялькс»,—мярьгсь алясь корхтаманьконь аделамста.
И.ФАДЕЕВА.