Ханты-Мансийскяй автономнай округть—Юграть и Мордовиять явфнесазь пцтай кафта тёжятть вайгяльбетне, но тя аф шоряй «Мокшень правдань» журналисттненди кирдемс кеме соткст тоса эряй земляконьконь мархта. Фкясь эздост—Рузаевскяй райононь Трускляй велеса шачф-касф мокшалясь Геннадий Наркаев. Геннадий Сергеевич армияса служамда меле тусь эряма Тюменскяй области. Сургутса пуроптсь «МасторАва» мокшэрзянь культурнай общества.
Геннадий Наркаев Мордовияв эрь самстонза сувси «Мокшень правдать» редакцияс. Газетать сёрматфнесы фалу и оцю мяльса морафнесы. И нинге. Подписной эрь кампаниять мокшалясь тиенди казне Трускляй велень школати и Рузаевскяй райононь эряйхненди—тяштьфнесы теест «Мокшень правдать». Сон фалу учсеф инжи редакциясонк. Мархтонза корхнеманьконь оцю мяльса макссаськ Од кизонь номерса.
—Геннадий Сергеевич, лятфтак, пожалуйста, кода и мзярда ушедозе эсь кинц «МасторАвась»—Мокшэрзянь национально-культурнай центрась?
—Региональнай общественнай тя организациясь пуроптовсь 2008 кизоня. Тюменскяй областьса эрямстон удалась улемс Сургутса ётафтф национальнай фестивальса, кона кочказень ламоц национальносттнень представительснон. Нльне аф ламода обжавонь, мес оцю тяфтама мероприятияса ашельхть мокшет и эрзят, ашень куле родной кяльса фкявок вал. А вдь эздонк кельме ширеса аф кржа. Тянь колга мяльсь ашезь тушенда прястон.
—И мезьста ушедыть тевцень?
—Васендакиге, вешине земляконьконь, конат арасть васенце лездыкс. Мордовияса улемстон пачфтень семботь колга Александр Лузгинонди. Александр Степанович эста ульсь Мордовия Республикань национальнай политикать коряс министркс. Сон шназе ушетф тевоньконь, надияфтсь лезнемс. И валонц кирдезе. «МасторАвась» ладясь кеме соткст республикань Правительствать, Саранск ошень округонь администрациять, Финно-угорскяй народонь культурань Поволжскяй центрать мархта. Оцю лезкс тейнек максси Мокшэрзянь народть Межрегиональнай общественнай организациянц председателец Юрий Мишанин. Тняра кизоста ётафтоме национальнай спортивнай спартакиадат, лия мероприятият. Конешна, пингть сонцень вешфксонза, сяс работама тянь мяльса кирдезь.
—Геннадий Сергеевич, «МасторАвать» историянц колга пачфтеть. А мезе азолеть тячиень шинц колга?
—Сургутонь мокшетне и эрзятне пуромкшнихть марс и васьфнихть фкя-фкянь мархта оцю мяльса. Примсетяма субботникнень, национальнай спортивнай спартакиадатнень, национальнай культурань фестивальхнень, студенческяй фестивальхнень эса. Ётафнетяма мужествань урокт, конатнень пингста пачфнетяма земляконьконь, лётчикть-легендать мокшалять Михаил Девятаевонь и сонь подвигонц колга.
Тядде августста тейне удалась улемс Тюменскяй областень Калиновка мокшень велеть 100 кизонь юбилейсонза, коза пуромкшнесть аф аньцек тоса эряйхне, но и Россиять ламоц уженянзон эзда ингольдень эряенза и инжихть. Калиновкась—козя история мархта, мокшень коень-обуцянь ванфты веле. Культурань кудть маласа ётафтф оцю илать пингста кайгсть мокшэрзянь морот, ломаттне оцю мяльса васьфнесть фкя-фкянь мархта, тифнесть лятфнембяленди фотографият. Азонь седиста моли поздравляндамань валхт Россиянь сембе мокшэрзятнень лемста и Мордовия Республикань официальнай лицатнень, Мокшэрзянь народть Межрегиональнай общественнай организациянц лемста. Аноклафоль мялень салай экскурсия, сембе ванозь тематическяй площадкатнень и, конешна, каваняфтольхть мокшень пачаса и бозаса. Калиновкать квалма ули кода азондомс пяк лама, тяконь лувксса и «Мокшень правдаса».
Тунда «МасторАвать» активистонза—мокшетне и эрзятне азсть мяль—тялода меле Сургутонь фкя ульцять эса тиемс аруши: урядамс кархчнень-меснень, пяярьф лопатнень, а нинге—озафнемс шуфтонят. Общественнай национальнай лия организациятне, ошень администрациясь кирдезь ширеньконь и тевть тиеськ.
«МасторАвась» кунара ладясь соткст «Зазеркалье» идень кудть мархта. Рамсеме тостонь стирнятненди и цёранятненди велосипетт. Казнет теест тиенттяма эрь Очижиста.
—Лятфтать Сургутонь национальнай общественнай организациятнень колга. Мзяра эздост?
—Комозьда лама. Мокшэрзянь «МасторАвась», чувашеннесь, мариецоннесь, хантыеннесь, азербайджанецоннесь, узбеконнесь, таджиконнесь, киргизоннесь, дагестанецоннесь, кабардинецоннесь и лиятне. Эсь ёткова кирттяма соткст, тихтяма марстонь тефт.
—Афкуксонь патриотат, палозь-палат минценнеть, национальнайть ванфтоманц, виияфтоманц инкса. Тядде улеть делегаткс Ханты-Мансийскяй автономнай округть—Юграть эзда Мордовскяй (мокшень и эрзянь) народть Межрегиональнай общественнай организациянц YIII съездсонза, кона ётафтовсь 9-11 октябрьста Саранскяйса. Азыть эсь мяльхнень-арьсематнень мокшэрзятнень тя пуромксснон колга.
—Оцю мяльса примань участия съездса, кона ётась «Консолидация мордовского народа и укрепление единства российской нации в условиях современных вызовов» темас коре. Мокшэрзятнень пуромкссост кепсевсть пяк эрявикс кизефкст. Приветственнай эсь валсонза республикань Оцюнясь Артём Здунов башка мяль шарфтсь мокшэрзянь народть культурнай наследиянц ванфтоманцты и тяниень пингонь вызофнень пингста консолидациять эрявиксшинцты.
Съездса ванфтольхть мокшень и эрзянь кяльхнень ванфтомаснон мархта сотф кизефксне. Тяниень пингть, ужяленди, кой-коста уленди стане, што мокшень атятнень-бабатнень, алятнень-тядятнень уноксна, идьсна корхтайхть рузкс. Мес тяфта лисенди? Пади, сяс, мес шачфтыхне-касфтыхне ёмла идьснон мархта «шапихть» рузонь кяльса. Или тянди улихть кодамовок лия туфталхт? Аф эряви пелемс, што, кда ёмлать тонафтомс мокшекс корхтама, сон кармай сяда лафчста содамонза рузонь кяльть. Тя аф ули, кафцьке кяльхнень стирнясь или цёранясь тонадсыне лац. А касомок, сонць арай родной кялень ванфтыкс.
Съездса азфтольхть тяфтама мяльхть: одукс ваномс тонафнихнень родной кяльть и литературать коряс содамошиснон оценкаснон системанц, кирдемс национальнай кяльса книгань ноляйхнень ширеснон, виияфтомс федеральнай и региональнай программатнень эряфс ётафтомаснон коряс общественнай организациятнень работаснон и стак тов. Арьсян, маластонь кизотненди задачатне шарьхкотьфт и эрсь эздонк содасы, мезть лангса работама.
—Геннадий Сергеевич, ламотне содасазь, што макссят лезкс специальнай военнай операциянь участникненди.
—Мзярда ушедсь СВО-сь, Сургутса панчфоль гуманитарнай корпус. Молень тоза, кизефтине семботь. Меле рамаме ярхцамбяльхть, гигиенань средстват, лама мезе лия. Тяфта ульсь несколькаксть. Сяда тов корхтань тянь колга Сургутонь администрацияса, коса кирдезь ширезень, и ушедоме ярмаконь кочкама ошень национально-культурнай общественнай организациятнень ёткса. Кирдеме соткст подразделенияньконь мархта, сяс содаськ, мезе тоза эряви. Рамсеме комплектующайхть, машинат. Тядде нилексть якань гуманитарнай грузонь ускома. Пуроптомасост примасть участия ламоц ломаттне, мезенкса теест оцю спасиба. Удалась прважамс гуманитарнай лама груз. И сай кизоть арьсетяма мольфтемс марстонь эрявикс тя тевть сяда тов. Мзярда якань гуманитарнай груснень пачфтема, сявондень мархтон колма флакт—Сургут ошеннеть, Ханты-Мансийскяй автономнай округоннеть и Мордовия Республиканнеть. Казине синь тоса. Удмуртиянь фкя цёрась няезе Мордовияннеть и мярьгсь, што флагоньке шарфтыхть фкя-фкянь лангс. Меле кизефтемазь: «Мярьгсть, северста сать, а мес Мордовия Республикань флагть ускить?» Азыне: кельме ширеса эряй мокшалян. Кулемок тянь, пачфтезь, што синьцост улихть «Мордвин», «Мокшанин», «Эрзя» позывной мархта боецт.
Гуманитарнай кой-кодама лезкс кучсеме Мордовияв, коста прважафоль Мордовиянь «Аралай» батальону.
—Тяддесь пцтай шумордавсь. Мезе Сургутонь мокшэрзятне кармайхть тиендема сяда тов?
—Минь—«МасторАва» организацияти сувсихне—маластонь пингть пуроптама и ванцаськ, мезе тиеме тядде. И, конешна, арьсетяма платт сай кизонди. Тефт мувихть сембонди.—Малаткшни Од кизоть и Роштувать мархта! Кеме шумбраши и сембе цебярть!
—Спасиба мялень салай корхнеманкса.
Татьяна Альшина.