Е.Леонтьева:«Мялезе, штоба мокшэрзятнень колга содаль сяда лама ломань»

Колмоце ковсь ни моли, кода ушедсть студенттнень занятиясна. Тонаткшнихть и сувсихть валом-валом оцю вузонь эряфти 1-це курсонь тонафнихне. Конешна, теест тяса сембось од и аф содаф, ушедомок документонь оформляндамать эзда и шумордамак общежитиянь марстонь пуромксса. Тяса студенттненди пшкядема вастокс арси общежитиянь студенческяй советсь. Нюрьхкяняста эсь тевонзон и эряфонц колга тейнек азондсь Н.П.Огарёвонь лемса Мордовскяй госуниверситетонь 4№ общежитиянь студенческяй советть председателец, филологическяй факультетонь 3 курсонь студенткась, мокшень стирсь Елена Леонтьева.
Елена Леонтьева шачсь-кассь Ковылкинскяй райононь Порапа велеса. Васенцеда повсь Саранскяи, мзярда тонафнесь 11 класса. Мокшень содаф поэтсь, Мордовия Республикань Заслуженнай поэтсь Полина Владимировна Алёшина сявондезе сонь од писателень и поэтонь семинарс Печатень куду. Лена эста варчсезень виензон мокшень кяльса стихотворениянь сёрмадомаса. Улема, самай ся пингть мокшень стирть и эвондась мялец самс эряма Саранскяи и сотомс эряфонц Н.П.Огарёвонь лемса МГУ-нь филологическяй факультетть мархта. Васендакиге ёразень максомс документонзон журналистикань отделенияв. Но сяс мес тоса ёфси ашельхть питнефтома вастт, Лена сась мяльс поступамс рузонь кялень и литературань отделенияти.
Студенческяй эряфсь фатязе сонь марнек. Меля арась младшай кураторкс васенце курсонь омба масторонь студенттненди, конат састь тонафнема филологическяй факультету Узбекистанцта. 4№ общежитиянь комендантсь шарфтсь мяль Еленать ответственнайкс улеманц лангс и тердезе сонь общежитиянь студенческяй советти председателькс.
«Васенце задачазе—кирдемс лия студенттнень мяльснон и лездомс синь ётафтомс эряфс. Советсонк эрь направлениять инкса отвечай башка ломань. Старандан лездомс сембонди. Общежитияса сембода мялень салай илакс лувови дискотекась. Октябрть песта актовай залсонк ётафтоме концерт, конань лемдеськ первокурсниконь шити. Артисттнень кочкаськ васенце курсонь студенттнень ёткста. Ушедоськ концертста, казеськ инь активнайхнень, а сяльде ётафтоме дискотека. Карматама старандама тиендемс тяфтама илатнень сяда мялень салайкс, лемдемс синь кодама-бди темас, анокламс фотозонат, тиендемс бардовскяй музыкань концертт и стак тов.
Оцю мяль культурно-массовай секторда башка шарфнетяма спортивнайти. 4№ общежитиясонк ули тренажёрнай зал, тоса ётафнетяма общежитиятнень ёткса пялькстомат»,—азонды Елена Леонтьева.
Мокшень стирсь виденцяй, што аф тёждя и лац тонафнемс, и вятемс студентонь общественнай тефт. Филологическяй факультетса тонафнеманц кельгсы, сембе предметтнень ёткста сембода оцю мяль шарфни рузонь литературати. Кельгома автордонза кафта: Ф.М.Достоевский и А.И.Куприн. Стирсь корхтай, што сяда цебярь лувомс синь марса. Ф.М.Достоевскяень стака психологизманц эзда лездыхть лисемс А.И.Купринонь тёждя и валда произведениянза.
Елена Леонтьева филологическяй факультетть шумордамдонза меле ёрай улемс учителькс. Стирсь шарьхкодьсы, што профессиясь пяк стака, но сяка ёрай тяряфтомс. Тяниень пингть сон получси «Педагогика» направлениять коряс дополнительнай образования.
Ётка пингстонза мокшень стирсь кельгсы фотографиянь тиендемать. «Пяк кенярдень, мзярда тядде тядязе алязень мархта пяшкодезь инь оцю мялезень—рамасть фотоаппарат. Тя тевса стане жа лама шарьхкодема. Аф аньцек кода тиендемс фотографиятнень, но и кода ладямс светть, кода корхтамс ломаттнень мархта»,—мярьгсь Елена.
Аф ваномок сянь лангс, што Лена тонафни рузонь отделенияса, оцю мяль шарфни сембе мокшеннеть лангс. Интернетса лия ошса тонафни ялганзон мархта тяшни и корхни мокшекс. Нльне панчсь Телеграм-канал мокшень кяльса, конань кайгиста лемдезе «Мон корхтан». Тоза тяшнесыне эсь мялензон-арьсеманзон шачема кяльсонза, путни мокшень содаф авторонь произведенияста пакшт, рузонь и мокшень кяльса эсь стихотворениянзон, тись мокшень стикерхт.
«Ужяль, Саранскяйса аф сатомшка лама ломаньда, конатнень мархта улель кода корхнемс мокшекс. Порапав якан шуроста, корхнян шачема кяльсон аньцек тядязень и щавазень мархта телефонца. Пяк оцю мялезе, штоба мокшэрзятнень колга содаль сяда лама ломань. Ёран ушедомс снимандама видеот мокшень кяльса, цебярь камера мархта фотоаппаратозе ули ни, лядсь мумс пинге!»—шумордазе корхнеманьконь Елена.
О.Белкина.