Мокшень стирть Елена Сергеевна Лашмановать эряфса оцю васта занци перьфпяльть ванфтомац. Сон лац шарьхкодьсы—тячиень тевоньконь эзда ащи ся, кодама ули экологиясь мзярошка кизода меле.
Елена шачсь-кассь Саранскяйса, но мокшень ломаттнень и велень эряфть содасы лац: тядяц Ковылкинскяй, а аляц Старошайговскяй райоттнень эзда. Школада меле поступась тонафнема Н.П.Огарёвонь лемса Мордовскяй госуниверситетонь Национальнай культурань институту дизайнань направленияти. Фкя образованиять лангса ашезь лотка. Сон нинге тонафнесь МГУ-нь филологическяй факультетса. Васенда шумордазе бакалавриатть, сяльде—магистратурать. Елена виденцясь, што филфакса тонафнемась мялезонзоль.
Тяниень пингть Елена Лашмановать стакшинза сотфт фотографиянь тиендемать и smm-нь сферать мархта—тяшни текстовай материалхт эрь кодама изданиянди и компаниянди.
—Елена Сергеевна, азк, пожалняста, мзярда эряфце сотовсь экологиять мархта?
—Нинге студентокс работань Од ломанень республиканскяй центраса. Тоса и ушедонь шарфнема мяль экологиянь прябалатнень лангс, примсень участия эрь кодама проектса. Кармань шарьхкодема, што ломанць эсь мельганза кады оцю пильгокит экологияти. Эряви ванфтомс перьфпяльть тячи, штоба ванды шабаньке эряльхть ару масторлангса.
Пяк пара, што ошсонк эрь куд пирьфса улихть аф фкя лацонь контейнерхт. Тянь вельде кархчнень ули кода явомс башка. Кочкаф кархчнень усксазь переработкас и эздост тиихть од паршихть, конатнень тага ули кода нолдамс тевс. Мезенди путнемс тняра вий од сырьёнь тиеманкса, кда можна одкстоптомс таштть!
—Азонтт «Озафтт вирь» Всероссийскяй экологическяй акциять колга, конань эса примат участия.
—Тя акциять мяльса кирдезь минь, од ломаттне, озафнекшнетяма шуфтонят Мордовиянь ся васттнень эса, коса вирсь, кепотьксонди, палсь. Сидеста озафнема сашендыхть семьянь келеса. Пара няемс, кодама оцю мяль вельде тиендьсазь тя тевть шабатне. Касыхть синць—мархтост касыхть озафтфсна, конат лия поколениятненди максыхть ару кожф. Меля сёксенда ашель вешфкс одкстоптомс Мордовиянь вирьхнень. Сяс якань шуфтонянь озафнема Казани, Калугав, Липецк ошу.
—2022 кизонь 2 декабрьста сявомок 4 декабрти молемс Мордовиянь лия активисттнень мархта улеть Вирень волонтёронь Всероссийскяй форумса, кона ётафтовсь Москуса. Мезсь эсонза сембода пяк салазе мяльцень?
—Форумса мяль шарфтфоль 4 тематнень лангс: толонь матомати, вирень одкстоптомати, туризмати и вирень араламати. Программась ащесь образовательнай пяльксста, мастер-класста и экскурсияста. Лекторхнень ёткса ульсть экологическяй организациянь вятихть, вирень хозяйствать вятемаса экспертт, противопожарнай направлениянь представительхть и лият.
Сембода пяк тя форумса салазе мялезень Эко-центрав экскурсиясь, коса няфтезь, кода примави вторсырьёсь. Макссемс переработкас ули кода семботь. Ужяль, тя ули аф сембе региоттнень эса.
—Мезсь сувси «ЭкоЛогика» проектти, конань вятьсасть Мордовияса?
—Аф кунара кярьмодеме тя тевти. Анокламе интеллектуальнай налхкомат школаса тонафнихненди. Вельдест стирнятне и цёранятне содайхть сяда лама экологиять колга. Кеняртьфти, кда васедеманьконь ётафтомдост меле ёмла ялганьке ушедыхть кочксемост кархчнень башка. Тя тевть тиеманцты аф эряви лама вий. Аф стака кочксемс башка батарейкатнень и пластиковай сюлекань панкснень. Сяда тов синь ули кода максомс примамань эрь кодама пункту, ошсонк эздост лама.
—Сембе ня тефнень тиемста мушендат пинге инь кельгома тевцти—путешествияти. Кодама регионца улеть ни?
—Улень Россиянь 56 регионца. Минь пяк оцю странаньке. И эрь регионць аф фкя лацонне. Путешествиятнень пингста сембода мялезон ломаттнень мархта корхнемась. Синь кельгсазь шачема-касома вастснон, оцю мяль вельде азондыхть колганза.
Меля улень Камчатскяй крайса. Салай мяль, што тостонь иттне урокста рисовандайхть вулкатт, ся пингть кода мокшэрзянь шабатне—келунят и кузнят. Корхтайхть, мирсь—тя панжада книга. И мзяра регионца улеть, сняра лопаня лувоть. Ёран улемс Россиянь сембе региоттнень эса, штоба лувомс странаньконь книганц педа-пес.
2020 кизоста сявомок эряфозе сотовсь Байкал эрьхкть мархта. Васенцеда тоса улень «Байкал для каждого» Грантовай проектть вельде. Сонь целец—кочкамс Байкалса од фотографт, штоба сяльде тоса тиф синь работаснон эзда кочкамс фотовыставка и няфтемс сонь Россиянь эрь кодама уженяса. Колма кизода инголе тя проектса улень участникокс. Тяни Иркутск ошень од ломаттнень мархта организаторхнень ётксан. Тяда башка, аноклан и ётафтан коммерческяй турхт Байкалу. Нилеце тяфтама турсь кармай февральть песта. Тейне Байкалсь—тя виень максы васта.
—Лисенди, фотографиянь тиендемась стане жа сотф путешествиятнень мархта?
—Тя нинге фкя кельгома тевозе. Фотографировандама ушедонь 2010 кизоста сявомок. Мялезон ётафнемс семейнай фотосессият, няемс и няфтемс ломаттнень мяльснон-арьсемаснон. Кельгса фотографировандакшнемс перьфпяльть. Путешествияне сотнефт тя тевть мархта. Сидеста примсян участия региоттнень эса ётафневи мероприятияса, коза эрявихть фотографт.
Ули тяфтама программа—лемоц «Больше, чем путешествие». Вельденза ули кода сатомс питнефтома абонемент путешествиянди. Меля, кепотьксонди, тяфта якань Карелияв.