1945 кизонь 25 апрельста Эльба ляйть видеса Торгау ошса ульсь советскяй и американскяй войскатнень васедемасна. Эльбаса васедемась пяк лац няфтезень антигитлеровскяй коалициянь союзническяй соткснень.
КОДА ТЯ УЛЬСЬ?
23 апрельста Эльбать малас саф передовой частьтненди пачфтьфоль, што пункттнень эса американскяй частть ашельхть. Аньцек 1945 кизонь 25 апрельста, воиноньконь павазснонды, ульсь историческяй тя васедемась.
25 апрельста 13 частста 30 минутаста Стрела районца, 58-це гвардейскяй дивизиянь 173-це гвардейскяй стрелковай полконь 7-це ротань воиттне марса командирть, старшай лейтенантть Григорий Голобородьконь мархта смеказь военнаень группать, кона мольсь Западть ширеста. Миннетне аф ламода эводсть, но курок шарьхкодсть, што инголе аф сят, кинь мархта тюрсть войнать пингста. Сембе сяка, ладямок боевой порядкать, Голобородьконь подразделенияц тусь каршезост. Кода содавсь сяльде, тя ульсь 1-це американскяй армиянь 69-це пехотнай дивизиянь разведгруппась. Сонь вятезе лейтенантсь Альберт Коцебу, сержанттне и солдаттне Д.Полонский, М.Шульман, Г.Ситник (кона сяльде казьфоль Якстерь Тяштень орденца), Форестер и лиятне.
Частта меле Торгауть аймакса 58-це гвардейскяй дивизиянь 173-це гвардейскяй стрелковай полконь 2-це батальононь воиттне няезь, што ошень церькавть колокольняста максси сигнал военнай формаса кодама-бди ломань. Гвардиянь лейтенантсь Александр Сельвашко ёрась пшкядемс теенза немецонь кяльса, но тянь эзда мезевок ашезь лисе. Солдатоньке ляцсть кожфти и кульсть содаф валхт: «Моску—Америка!» Красноармеецне шарьхкодсть: церькавонь колокольняса американец. Тя ульсь 69-це пехотнай дивизиянь солдат.
Сяльде маладсь офицер, кона мярьгсь, што синь 1-це американскяй армиянь 69-це пехотнай дивизиянь разведчикт, и эняльдсь офицероньконди ардомс мархтонза батальононь штабу, кона ащи кеветие вайгяльбень вастса.
Кода содавсь меле, тя ульсь младшай лейтенантть Уильям Д.Робертсононь группац.