Кодама пара, мзярда кельгома тевце эждьсы аф аньцек эсь ваймоцень, но и канды цебярь лия ломаттненди. Тяфтама тевонди аф ужяль максомс аф пингцень, аф вийхнень. Тя тевти лажадат, кода мала ломаненди или пара ялганди. Самай тяфтамотнень ёткста и Саранскяень эряйть Светлана Деркаевать, рузкс мярьгомс, хоббиц. Авась котци понань носокт, жилеткат, пряс щамат, вельхтерданят пингта инголе шачф иднятненди, конат касфтовихть кювеснень эса Перинатальнай центраса или идень больницяса. Кой-коста тяфтама шабанятне шачендыхть 500 граммань сталмоса. Теест эряви лямбоня, конань макссазь авань машты кядьса кодаф паршихне.
—Кодама тонадонь нинге школаса тонафнемста, трудонь урокнень пингста. Эста ни тя тевсь пяк тусь мялезон. Мзярда поступань вузу, аф ламос кадондыне тя тевть—пингозе ашезь сатне. Меки вндернятненди кундань, мзярда шачсть монцень шабане. Котцень теест эрь кодама щамнят. А мзярда шабане кассть, кодамать ашель мялезе кадомс,—азозе Светлана Рафаильевна.
С.Р.Деркаевась кодай аф ськамонза. Мзярошка кизода инголе сон сувась «28 петель» клубти. Тя проектсь международнай. Васенце клубсь эвондась Казахстанца 2012 кизоня, а Россияса пуроптовсь 2017 кизоня. «28 петель» клубть отделениянза улихть странань ламоц ошнень эса. Тяза сувси аватне вийс коре лезнихть пингта инголе шачф иднятненди, семботь тиендьсазь питнефтома. Клубть Мордовиянь отделениянцты тячи сувси 50-да лама стирь и ава марнек республикать эзда. Сембода эряфкшути 70 киза. Кодаф щамнятнень пачфнесазь аф аньцек Саранскяень Перинатальнай центрав, шачфтома куду, идень больницяв, но и лия ошнендивок. Кучсесть посылкат и Донецкяи.
—Сембе щамнятнень и вельхтерданятнень иднятненди котцесаськ аньцек натуральнай материалста—понаста кштиртьф сюреста или котфста. Понань носоконятне и жилетканятне аф аньцек эждьсазь атнайнять, синь нинге пяк цебярь массажёрхт. Сембе вдь содасаськ, учань понань сюреста кодафсь сялги. Вов тя сялгомась и цебярьгофнесы санняваст веронь шудемать. А нинге аф максы пингта инголе шачф идняти пяк крхкаста матодовомс и юкстамс тарксемс ваймонц. Лиякс азомс, ня щамнятне, конатнень кодамасна аф сяви лама пинге и вий, афкукс аралакшнесазь атнайнять эряфонц,—мярьгсь С.Р.Деркаева.
Тяда башка, аватне котцихть иднятненди налхкшкат—комфортерхт. Нят пуворяф пильгоня мархта осьминожканят (ванк фототь). Арьсезень ня налхкшнень Данияста фкя тядя, конань идняц тяфта жа шачсь пингта инголе. Комфортерть лама цебярь ширедонза. Васендакиге, пяльтьф пильгонятне мезьса-бди шарфтыхть боконть лангс, кона ащи шабать ваксса, мзярда сон тядять пекса. А сяс кювезса ащемстонга иднясь кяднясонза люпшнесыне ня пильгонятнень и сетьмоси. А нинге ня налхкшне салсесазь шабанятнень мяльснон, и синь аф усксесазь-тарксесазь датчикнень, катеторхнень и трубканятнень, конатнень вельде теест макссеви ярхцамбяльсь и кожфсь. Вдь синць сидеста аф маштыхть нинге аф ярхцама, аф ваймонь тарксема.
—Сембе ня ёмла щамнятне сяда тов ляткшнихть иднятненди и ванфневихть семьясост ламонь киза. Тячи клубсонк аф кржа авада, конатнень синцень шабасна шачсть пингта инголе, конатненди минь макссеме эрявикс щамнят, а мели ни синцьке шоворсть ёткозонк. Сидеста тейнек азонкшнихть оцю сюкпря кода врачне, стане и тядятне-алятне. Тя аф азовомшка питни, эжди седи и максси вийхть аф кадондомс тя тевть сяда товга,—азозе Светлана.
Сюретнень аватне рамсесазь синць. Сидеста мушендовихть и пара вайме ломатть—спонсорхт, конат макссихть тя тевонди ярмакт или эрявикс материалхт. Сюрень рамамать мархта ошсонк кодамовок прябалат аш. Мезе аф сатни, заказакшнесазь интернет-магазиттнень вельде.
Мзярда ушедсь мобилизациясь Светлана кой-кона ялганзон мархта сась мяльс лездомс боецоньконди. Тячити С.Р.Деркаевась кодась ни колмогемоньшка парши Родинань аралайхненди. Нят носокт, балаклават, манишкат, перчаткат и пряс щамат. Кодафонзон макссесыне боецнень семьяснонды, а сят ни мушендыхть пачфтеманди кит, или гуманитарнай лезксонь примамань центратненди. Светланати пачфтезь: ваймонь лямбе мархта кодаф щамонза прважафт ни Ульяновскяйть маласта военнай ошкятненди, коса ётнихть боевой слаживания мобилизованнай аляньке, и ся региоттненди, коса мольфтеви специальнай военнай операциясь.
—Тейне нльне кучсть видеоотзыфт,—мярьгсь Светлана.—Цёратне азондыхть сюкпря лямбе носоконкса или балаклаванкса. Тя сяшкава токай седи, сельмоветтневок аф кирдевихть. И тевсь аф сянь эса, што ня паршихне эждьсазь ронгснон, тя теест, васендакиге, кулянь пачфтема кудста, кода мала ломанень седиень лямбоня. Пяк надиян, што кодафоне лездыхть боецоньконди воинонь аф тёждя тевснон пяшкотькшнемста.
М. СТЕШИНА.