Мокшень стирсь Анна Голынова тядде шумордазе Н.П.Огарёвонь лемса Мордовскяй госуниверситетонь экономическяй факультетонь 2-це курсть. Шачсь-кассь Саранскяйса, тонафнесь 24№ школаса. Но эряфоц кемоста сотф Кадошкинскяй райононь Пою мокшень велеть мархта, коза Аня эрь кизоня якай каникулас щаванц и щятянц ширес. Тостоннет сонь тядяц и аляц. Велеса сембе корхтайхть мокшекс, сяс Анявок вишкста ушедсь шарьхкодемонза кяльть. Тя кизоня сон примась участия «Всероссийскяй студенческяй тунда» фестивальса, кона ётафтовсь 18-22 майста Самараса. Юбилейнай 30-це фестивальсь пуропнесь 5000 малава од ломань Россиянь 85 регионцта, а тяфта жа маластонь странатнень эзда.
Мордовскяй госуниверситетсь региональнай этапта меле кочкась Самарав делегация, эрь коллективсь выступандась эсь направлениянц коряс. Экономическяй факультетть эзда кучфоль «Малина» ансамбльсь, коса морайхть Аня Голынова и нинге 2 стирнят. Синь «Небо Лондона» Земфирать моронц мархта Всероссийскяй этапса сявозь омбоце вастть. Тяда башка, Студенческяй тундаса эрь регионць няфнезе эсь марстонь программанц. Университетоньке няфтсь постановка, конань лемоц «Ошень скомнянят». Инксонза од ломаттне сатозь «За яркий дебют» номинациять.
Минь васетькшнеме мокшень стирть Анна Голыновать мархта и максоме кизефкст фестивальть и творчестванц колга.
—Аня, кодапт лятфнематне Всероссийскяй студенческяй тундать колга?
—Тяфтама фестивальсан васенцеда эряфсон. Программась ульсь козя. Эрь шиня ётафневсть разнай конкурст: морамань, кштимань, актёронь тевонь и лият. Тейнек макссесть питне марнек странаса содаф ломаттне. Жюриса ульсть Владимир Коробка, Сюзанна, Марина Девятова, Вахтанг Каландадзе и лиятне. Конешна, тя сембось мзярдовок аф юкстави.
—Мезень колга «Ошень скомнянят» постановкась?
—Тя постановкась Саранскяйть колга. Скомнянятне азондыхть лама судьбань историят: васедемать, фкя-фкянь эзда аердомать, кельгомать колга. «Ошень скомнянятне» няйсазь аф аньцек ошть, но и марнек Мордовиять эряфонц. Программати сувась и коллективоньконь мороц, конань лемоц «Кельгома мастор». Постановкась кельговсь Мордовиянь ламоц од ломаттненди. Сяс минь нинге весть сонь няфтеськ Тысячелетиянь площадьса 25 июньцта—марнек Россиянь од ломанень шиста.
—Мзярда сотовсь эряфце музыкать мархта?
—Морама ушедонь нинге 7-це класса, шумордайне «фортепиано» классть коряс музыкальнай школать. Тя монь кельгома тевозе, лиякс мярьгомс, хоббизе. Кармань морсема нинге сяда сидеста, мзярда поступань Н.П.Огарёвонь лемса Мордовскяй госуниверситетонь экономическяй факультету. Тя кизонь февральста, мзярда анокламе Студенческяй тундати, шачсь од коллектив, максоме теенза мазы лем—«Малина». Морай ялганень мархта васенда сявоськ васенце вастть университетса, а сяльде омбоцеть—Самараса.
—Мес кочкайть экономическяй факультетть?
—Видеста азомс, школаса тонафнемста ёрань улемс врачекс. Но 11 классти молемс шарьхкодень, што тейне сяда мала бизнесонь и финасовай управлениянь тематикась. Тяфта поступань экономическяй факультету «Менеджмент» направленияти. Цебярьхтольхть ЕГЭ-ть инкса баллне, сяс тёждяста ётань питнефтома васттненди. Университетса тонафнемать шумордамдонза меле ёран работамс эсь специальностезень коряс финансовай кодамовок компанияса. Пингсь няфтьсы.
—Моли студенттнень инь кельгома пингсна—кизось. Кода тон арьсят ётафтомс сонь?
—Июльста 4 недялят улян практикаса. Кучень заявкат «Таврида» и «iВолга» форупненди. Кда ётаса конкурсть, эста молян Крыму и Самарав. Тяда башка, университетоньке ётафты конкурс, конань вельде кочкавихть студентт экскурсияв Санкт-Петербург ошу. Ули мялезе тозовок молемс, ваномс Питерть ялганень мархта. Надиян, кармай пинге молемс Пою вели щавазти и щятязти.
—Стака-аф фкя пингть лац тонафнемс и улемс студентокс-активистокс?
—Мезське аф стака, кда кельгсак сянь, мезе тиендят. Эряви сембонь тиендемс эсь пингстонза, эста эрь тевти муви ётконя.