Эряфкшу авась цють ашезь ляда ярмакфтома

Кода пачфни «Стопмошенник13» телеграм-каналсь, Россиянь МВД-ть «Ковылкинский» ММО-нь дежурнай части пшкядсть банконь сотрудникне и пачфтсть сянь колга, што 74 кизоса фкя авать ёрайхть васькафтомс мошенникне.
Полициянь сотрудникне содазь, што тяда ингольдень шить эряфкшу авати гайфтсть «900» номерста. Корхтайсь азозе прянц финансовай фкя организациянь сотрудницакс и пачфтсь, што лия банкса панчф счётонц мархта тефне ащихть кальдявста. Лия банконь представительсь несколька минутада меле мессенджерть вельде видеосвязть коряс гайфтсь пенсионеркати. Сон мярьгсь, што мошенникне ёрайхть саламс кочкаф ярмаконц—250 тёжянь цалковайть. Тянь аф нолдаманкса эрявсь валхтомс синь и ётафтомс азф номерти. Шобдава авась сась банкомату, кона ульсь супермаркетса, коса получазень наличнайхнень, мезьда меле ёрась тиемс финансовай операция, но телефононь номерть сёрмадомста нолдаф эльбятьксть инкса тя теенза ашезь удала. Тя пингть пенсионеркать малас сась мишендись и мярьгсь, што сонь, улема, васькафтозь. Но авась ашезе кулхцонда и тусь банку, коса ёрась поладомс ушетф тевонц. Финансовай организацияса клиенткати стане жа пачфтсть каршезонза тиеви преступлениять колга. Но и тяда мелевок пенсионеркась арьсефонц эзда ашезь атказа и тусь лия банкомату. Тя пингть офисонь сотрудницась мольсь мельганза и коль ёрась аерфтомс авать тя тевть эзда. Омбоце банкса авати тага мярьгсть аф тиендемс сянь, мезе ёрай. Но сон киньге ашезь кулхцонда и тусь нинге фкя финансовай организацияв, коза ся пингть састь полицейскяйхне. Аньцек правоохранительхнень мархта корхнемда меле пенсионеркась ушедсь шарьхкодема, што сонь ёрасть васькафтомс. Межмуниципальнай отделонь сотрудникне нинге весть корхнесть эряфкшу авать мархта и мярьгсть улемс сяда осторожнайкс аф содафнень эзда гайфтематнень самстост. Нинге синь азсть благодарностень валхт финансовай организациятнень сотрудникснонды преступлениять инголдамаса лезксонкса.