ЭРЯФОНЬ КИЦ ПАЧФТЕЗЕ ОРЕНБУРГСКЯЙ ОБЛАСТИ

Коза аньцек аф пачкотькшнихть мокша ломаттне. Любовь Серафимовна Чупринать эряфонь киц пачфтезе мянь Оренбургскяй областень Грачевскяй райононь Ероховка вели. Сон трудендакшнесь иностраннай кялень учителькс. Педагогическяй трудонь ветеранть лама казнедонза.
Аф ваномок 68 кизонзон лангс, Любовь Серафимовна отькорь, трудонь кельги. Пяк кельгсы содаф васттнень эзга якаманц. Уленди монастырьхнень, храпнень, музейхнень, театратнень эса. Ероховка велеса кельгома и шнама ломань. Колмогемоньда лама киза велень иднятненди сон ульсь аф аньцек учителькс, класснай руководителькс, но и омбоце тядякс. Коса аньцек аф эряйхть и покодихть мокшавать учениконза.
Шачсь-кассь педагогическяй трудонь ветеранць Атерь велеса, Крылофнень трудонь кельги оцю семьяса. Тядянзон-алянзон, Софья Денисовнань и Серафим Васильевичень, мянь кефкие идьсноль. Сон васенце шабасель семьяса. Сембоса лезнесь сазоронзонды, дуганонзонды.
Аф ваномок оцю семьять и заняфшить лангс, Люба Крыловась мушендсь пинге тонафнемс. Школанц аделазе аньцек «ветес». Атерь велень 1№ средняй общеобразовательнай школаса ульсь гордостекс и прянь шнафтома вастокс. Примсесь участия олимпиадатнень, пялькстоматнень эса. Районца и республикаса занцезень васенце васттнень, лисендсь сяськикс и призёркс. Фотографияц фалу ульсь школань «Почётонь доскаса».
Любовь Серафимовна тянемс аньцек шнамань валса лятфнесыне школань учительхненди Н.Н.Боронинонь, Ф.Н.Стяпинонь, П.А.Чикинать, И.И.Аверяскинать, М.В.Кондрашкинонь, Е.И.Корчегановать и лиятнень, конат сембоса теенза ульсть кепотьксокс.
Аф ваномок оцю семьять лангс, родителенза сембонь тиезь сянкса, штоба Люба тонафнель вузса. Тяфта и лиссь. Саранскяйса мокшень стирсь аделась вуз, получась иностраннай кялень учителень профессия. Вузть аделамдонза меле трудендакшнесь Торбеевскяй райононь Варжеляй велень средняй общеобразовательнай школаса. Тясовок лядсь лама учениктонза, учитель ялгадонза, конат тянемс кельгсазь и мяляфтсазь.
Эряфонь киц Л.С.Чупринать пачфтезе мянь Оренбургскяй области. Кефкие идьснон эзда аньцек Владимир и Надежда эряйхть Атерьса. Лядыксне срадсть странаньконь разнай уженянзон эзга.
Крылофне фкя-фкянь аф юкснихть, сидеста васьфнихть.
Тяни Л.С.Чуприна—почётнай пенсионер, педагогическяй трудонь ветеран. Оренбургскяй областьста сидеста Атери аф сават, но шачема-касома уженянц аф юкснесы мзярдовок. Мзярда ули возможностец, сашенды Атери, васьфни раднянзон, велеряензон мархта. Коса афоль эря мокшавась, кодама предметт афоль вяте школаса, инь кельгома кялец ульсь и ляткшни мокшеннесь.
Илья ВЕШКИН.
Снимкаса: Крылофнень оцю семьясна (Любовь Серафимовна тядянц, Софья Денисовнань, ваксса види ширде).