Эряфонь киге аськоляй мокшень мора мархта

21 июньцта шачема шинц-юбилеенц васьфтезе «Мокшень правдать» кунардонь ялгац, сёрматфниец и морафниец, Ковылкинскяй райононь Сире Борку велеса 1969 кизоня шачф-касф мокшавась, «Эх, мордовочка» Народнай самодеятельнай ансамбльть руководителец, «Азорава» коллективть участницац, блогерсь, активисткась, общественницась Наталья Кувезенкова.

Тя шиня Наталья Тимофеевна кульсь лама лямбе вал семьянц, маластонь ломанензон, ялганзон эзда. Сембе арьсесть мокшавати кеме шумбраши, паваз. Но аф най шачема шистонза-юбилейстонза Наталья Кувезенковась эсь лемозонза куленди седиста моли пара валхт. Москуса эряй мокшавать мархта «Мокшень правдась» соткст кирди кунара. И аф аньцек кода газетать лувиенц. Наталья Тимофеевнань вельде минь ладяме соткст Москувонь и Московскяй областень мокшетнень, мокшэрзянь творческяй коллектифнень мархта. Культурань отделса работамста тейне сидеста сашендови пшкятькшнемс теенза Москуса эряй ялганьконь, тоса ётафневи пуромкснень мархта сотф кизефкснень коряс. И Наталья Кувезенковась мзярдовок аф атказакшни. Сон анок лездомс эрь ломанти. Сяс пара валхт лемозонза ули кода азондомс хуш эрь шиня.
Шачсь родной кялень, коень-обуцянь кельги мокшавась Сире Борку велеса Капаефнень лама идень семьяса, коса васенце вастса фалу ащесть оцюфненди и эряфкшуфненди честень путомась, трудти кельгомась, фкя-фкянь шарьхкодемась и фкя-фкянди лездомась.
Ужяль, но семьянь азорсь, Тимофей Капаев, рана тусь эряфста. Тимофей Кузьмичень куломдонза меле рьвац, Мария Филипповна, лядсь кота идь мархта. Сон и авозец аш ни кода лажнасть-ризнасть семьянь азорть инкса. Ёмла Наташась, кона лувксс коре котоцесель—мекольцесь, лац-ряц ашезе шарьхкотькшне, мезьса тевсь. Мзярда бабац ушеткшнесь цёранц инкса явсема-ольксема, стирняське, кулхцондомок сонь, тиендсь лацонза, хуш смузть ашезе шарьхкотькшне.
Мзярда тонафнесь школаса, тяшнесь «Пионерская правда», «Ленинский путь» районнай газетатненди заметкат. Активистонь асушиц няевсь ни эста.
Рыбкина велень школать шумордазе «нилес» и «ветес». Меле тусь Москуву, коса эрясть аканза и альняканза. Получась кассиронь-контролёронь профессия. Ниле кизот заняфоль мишендемань тевса, а сяльде лиссь рьвакс. Алексей и Наталья Кувезенкофнень шачсть стирьсна Ирина и Мария, тяни ули ни уноконясна Леонид.
Мзярс кассть иттне, Наталья Тимофеевна тевфтома ашезь ащекшне. Шумордазе Ковылкинскяй строительнай колледжть. Тияк варчсезень виензон парикмахеронь тевса. 2008 кизоня аделась эрявикс курст и вов ни лама киза работай массажистокс. Тиендемс ломаттненди цебярь, петнемс шумбрашиснон—тянь Наталья Кувезенковась маштсы пяк лац.
«Эх, мордовочка» Народнай самодеятельнай ансамбльсь—акатнень-сазорхнень Капаеватнень «идьсна». Коллективть руководителец—мокшавась, конань колга азонттама. 2002 кизонь февральста Сире Борку велеть асу, мазы вайгяль стиренза тиезь васенце аськолксть семейнай музыкальнай ансамбльть пуроптомаса. И тевсна удалась.
Аф ваномок Мордовиять эзда ширеса эрямать лангс, Наталья Кувезенковась, Татьяна Чумбаевась, Елена Чинилинась и Анна Ткачёвась морсихть марса тянемс, сяс «Эх, мордовочка» самодеятельнай коллективть содасазь ламотне, тяконь лувксса и республикасонк.
Вов мезе семейнай ансамбльть колга корхтай сонь руководителец:
—Нинге шабакс морсеме морот кода ськамонк, стане и оцюфнень мархта. Касомок, ашеськ юкста тя тевть, меколанкт, сядовок виияфтоськ кельгоманьконь сембе мокшэрзяннети. Эряме Москуса, а седиеньке лажаткшнесть мокшэрзянь масторти—тядянь-алянь кудти, ся киняти-янняти, конань эзга ласькондеме идькс пингстонк, пянакудста аньцек таргаф кшить шиненянцты. И аньцек морось, конань ушеткшнеськ илань шрать ваксса, бта мрдафнемазь Мордовияв, ся кизотненди, мзярда шабатолеме. Москуса эряй ламоц мокшэрзятнень тяфтама лажадомась вятезень «Масторава» общественнай организацияти. Саме мяльс пуроптомс «Эх, мордовочка» ансамбль. Коллективсь ушедозе кинц ёмла аськолксста. Пингонь ётазь колганза кармасть содама кода Москуса, стане и Мордовияса. Ломаттне кулендезь мокшэрзянь, рузонь моротнень, а стане жа няендезь щамоньконь-карямоньконь, сотцесть коеньконь-обуцяньконь, культураньконь мархта. Ансамбльть пяк лама казнедонза.
Творческяй коллективсь семейнай несколькань-крда. Сяс мес участницатнень мирдьсна, шабасна лезнихть теест мезьса маштыхть. Сценать лангс синь аф лисендихть, но фалу анокт лездомс техническяй, организационнай, выступлениянди щамонь анокламань тевса.
Ёмла родинати кельгомась фалу эряй Наталья Кувезенковать и аканзон седисост. «Эх, мордовочка» коллективсь сидеста сашенды Ковылкинскяй райононь Рыбкина вели, коса максси концертт Тройцяста, Масланцяста.
Но аф аньцек «Эх, мордовочка» коллективса морси Наталья Тимофеевна. Вов ни лама киза сон—Российскяй Федерациянь Президентть видеса Мордовия Республикать Постояннай Представительстванц Мокшэрзянь культурань центранц «Азорава» фольклорнай коллективонц участницац. Сон и ульсь «Азоравать» пуроптыензон ёткста фкякс. Коллективть «арзянясонза» кунардонь морот, обрядовай сценкат. Сон—Всероссийскяй ламоц конкурснень и фестивальхнень лауреатсна. Мокшавась пачфни колганза, участницанзон, ётафневи пуромкснень квалма социальнай сетьтнень эса. Лиякс азомс, сафтсы и блогеронь тевсовок. Ламотне азонкшнихть теенза спасиба, вдь интернетть вельде ули кода содамс, ваномс и лувомс мезе ульсь, кепотьксонди, Москуса или хуш масторбеса. Шиста шис касы «Азорава» коллективти лемтьф группатнень и каналхнень подписчиксна.
Кудса Наталья Кувезенковась кельгома рьвя, тядя и щава. Оцю кенярдемакс теенза арась уноконянц Лёнянь шачемац. Кода и сембе аватне, Наталья Тимофеевна кельгсы пидеманц-панеманц. Васенце вастсот, конешна, пачатне, а нинге кода сонць героиняньке, мокшень котлетатне.
Ётка пингста Кувезенковась кярьмотькшни кельгома тевонцты—морамати. Сон, кода «Эх, мордовочка» коллективть руководителец, кштирькс шары пуромксненди анокламста, синь ётафтомстост.
Васенцеда сценать лангс лиссь лама кизода инголе, эста нинге ёмлаль идец. И вов ни несколька кемотть киза эряфонь киге аськоляй мокшень мороть мархта кяденьбецек. Виень-эрьгянь максома вастокс теенза ащи ёмла родинац. Акатне-сазорхне Капаеватне сидеста сашендыхть тядянь-алянь куду, конанди кинясь мзярдовок ашезь вельхнев нардишеса.
Активисткать и общественницать Наталья Кувезенковать пряса фалу эвондакшнихть од мяльхть. И сон арьсефть ётафнесы эряфс!

Татьяна Альшина.

Последние новости

НИЛЬГЕМОНЬ КИЗА МАКССЬ УЧИТЕЛЕНЬ ТЕВТИ

Улема, эрсь мяляфтсы васенце учителенц, кона панжезень теенза содамошитненди...

Мордовиянь мастерхне—Беларусь Республикаса

Июльть васенце пялестонза Беларусь Республикань Могилевскяй областень Шкловскяй райононь...

Атери сашендсь Советскяй Союзонь Геройть Михаил Девятаевонь цёрац

8 июльста Советскяй Союзонь Геройти, легендарнай лётчикти М.П.Девятаевонди топодель...

РЕСПУБЛИКАВ САСЬ ОД ТЕХНИКА

«Экология» нацпроектть «Сохранение лесов» региональнай проектонц эряфс ётафтоманц рамкаса...

ВАНФТОЛЬХТЬ ЭРЯВИКС КИЗЕФКСТ

23 июльста Саранскяйса, Республикань Кудть конференц-залсонза, ётафтовсь Мордовия Республикань...

В Мордовии развивается система оказания первичной медико-санитарной помощи

В Мордовии в рамках национального проекта «Здравоохранение» развивается система...

НИЛЬГЕМОНЬ КИЗА МАКССЬ УЧИТЕЛЕНЬ ТЕВТИ

Улема, эрсь мяляфтсы васенце учителенц, кона панжезень теенза содамошитненди кенкшнень. Тейнек, Порапа велень шабатненди, тяфтама ломанькс арась Анна Николаевна Купряшкинась. Смузю, внимательнай, заботендай, но...

Мордовиянь мастерхне—Беларусь Республикаса

Июльть васенце пялестонза Беларусь Республикань Могилевскяй областень Шкловскяй райононь Александрия агроошкаса—Днепр ляйть трваса ётафтовсь «Купалье»—«Александрия собирает друзей» республиканскяй оцю ила. Эсонза примась участия кафта...

Атери сашендсь Советскяй Союзонь Геройть Михаил Девятаевонь цёрац

8 июльста Советскяй Союзонь Геройти, легендарнай лётчикти М.П.Девятаевонди топодель 107 киза. Шачема уженясонза, Торбеева посёлкаса, ётафтовсь лама интереснай ила. Ульсть панчфонь путомат, мужествань урокт,...