Эряфоньберьф лезни ломаттненди

Любовь Александровна Шишкаевать марнек трудовой киц сотф социальнай араламань системать мархта. Покодемста лама вийда и эрьгада путни ськамост эряй, сире ломаттнень и инвалиттнень мельге якамати.
Пцтай колмогемонь киза Любовь Шишкаевась работай населениять социальнай араламань системаса. И хуш шачсь сон Порапаса, эряфонц оцюшка пяльксонц ётафтозе Ковылкинаса. Якась Ковылкинань 1№ средняй школав, сяльде, 9-це класста меле, поступась Краснослободскяй медучилищав «Сестринскяй» отделенияв. Получамок диплом, лиссь покодема медсестракс Ковылкина ошень Самообслуживаниянь центрань шинь отделенияв. А вете кизода меле арась тя отделенияти оцюнякс.
Лама должностьса савсь покодемс Любовь Александровнанди. Фкя пингть—пцтай кемонь кизот нльне ульсь «Мордовия Республикань Ковылкинскяй районть эзга населениять социальнайста араламац» государственнай учреждениянь директорти социально-бытовой кизефкснень коряс заместителькс. Сембе вастова Любовь Шишкаевась няфнезе прянц ответственнай работникокс, кона курокста решандакшнезень населениять социальнай ширде араламань кизефкснень.
2017 кизонь апрельста социальнай араламань системаса эвондась од структура—«Долголетие» автономнай аф коммерческяй организация. Довериясь вятемс тя стака участкать максфоль Любовь Александровна Шишкаевати.
—Тевдонза Любовь Александровнань пяк лама,—мярьгсь «Мордовия Республикань Ковылкинскяй районть эзга населениять социальнайста араламац» государственнай казённай учреждениять ингольдень директороц Л.П.Резяпкина.—Сон работай шабатнень, пенсионерхнень и инвалиттнень, аф дееспособнай ломаттнень мархта, сидеста уленди семьятнень эса. Лангозонза фалу ули кода надиямс.
Любовь Александровнань козя методическяй и профессиональнай арсеналоц. Сон эрь кизоня аноклакшни информацият учреждениять сайтозонза, максси консультацият ломаттненди телефононь пачк, примси активнай участия покоди ялганзон мархта учебно-тематическяй семинаронь ётафтомаса.
Коллективса сонь оцю авторитетоц. Любовь Александровна машты лиянь кулхцондома и шарьхкодема, сон ответственнай и паронь арьси. Теенза спасибамань валхт азонкшнихть сядот ломанць, конатненди мзярда-бди сашендовсь пшкятькшнемс соцзащитав и получамс лезкс.
Седикс-ваймокс покодеманкса Любовь Шишкаевась казьф Российскяй Федерациянь Социальнай араламань и социальнай вииякшнемань министерствать Почётнай грамотаса, Мордовия Республикань Правительствать Почётнай грамотанц мархта.
Василий Илькаев.