Эряфоньберьф служай Родинати

Зубово-Полянскяй райононь ветеранонь-пограничниконь Советть председателец, мокшалясь Юрий Михайлович Беляев ёрась сотомс эряфонц пограничнай войскатнень мархта нинге армияв тумда инголе. Бзновка (Новые Выселки) велеса шачф цёрась школада меле тусь тонафнема Краснослободскяй зооветеринарнай техникуму. Комиссиять ётамста Юрий Михайлович фалу корхтась, што ёрай служамс пограничнай войскаса. Тяфта и лиссь. Советскяй пингть ня войскатненди повомс ульсь аф тёждя. Но мокшень цёрати тя удалась комсомольскяй путёвкать вельде. Служась Забайкальяса. 3 кофт ульсь тонафнемань пунктса, а сяльде кучфоль Кяхтинскяй пограничнай отряду. Кода азозе Ю.М.Беляев, эряфса теенза удалась—фалу служась именной заставаса.
Сяда тов отличия мархта шумордазе сержантонь школать, мезьда меле эстокиге получась сержантонь лем. Арась отделениянь командиркс, сяльде—боевой подразделениянь заставати старшинакс.
«Служама пингстон лама мезе ульсь. Ломаттне арьсихть, што границаса сембось сетьме. Аф фалу тяфта, сяс и, улема, цёратне-пограничникне тянемс эряйхть кеме ялгаксшиса фкя-фкянь мархта. Пограничникне ванфтсазь Родинаньконь рубежензон и васенцетне примасазь тюрематнень. Ня ломаттне вестевок аф потайхть фталу»,—мярьгсь Юрий Михайлович.
Армияда меле мокшень цёрась поступась вузу, тонафнесь зооинженеркс. Рьвяясь. Кафта кизот работась Бзновкань колхозса зоотехникокс. А мзярда колхозсь ушедсь срадома-каладома, Юрий Михайлович тусь служама внутренняй войскатненди—служебнай пинень инструкторкс. Сяльде ётафтозь милицияв, коса 12 киза работась участковайкс. Тяньге лангс Родинати служамац ашезь шумордав. Ётафтозь работама районнай УФСИН-у, коса сон ульсь отрядонь начальникокс, оперативнай дежурнайкс. 18 кизода меле тусь пенсияс колониянь начальниконь помощниконь вастста, майоронь званияса. Тяни Юрий Михайлович Беляев—Зубово-Полянскяй райононь ветеранонь-пограничниконь Советть председателец.
Тя организациясь панжевсь ётай кизоть. Юрий Михайловиченди пшкядсть ДОСААФ-ста, кле, пара улель панжемс районцонк пограничнай братства. Тячиень шити тоза сувси 25 ломань, конат кемоста ащихть фкя-фкянь инкса, лездыхть фкя-фкянди стака пингть. Марса васьфнихть илат, примсихть участия районнай мероприятиятнень, митинкнень эса, ётафнихть спортивнай пялькстомат.
Аф кунара организациясь примась участия пограничнай войскань Всероссийскяй оцю форумса, кона ётафтовсь Саратовса. 12 августста сявомок 14 августти молемс Советскяй Союзонь Геройть В.В.Талалихинонь лемса кадетскяй школав-интернату странань 30 регионцта пуромкшнесть Россиянь пограничнай службань 300 ветеран и общественнай организациянь представитель. Мордовияста тоза якасть 4 ломатть: Ю.М.Беляев, Н.Н.Ватанин, П.П.Чекуров и Н.В.Шалашов. Сембе синь Зубово-Полянскяй районцта.
«Оцю сюкпря райононьконь оцюнянцты Владислав Алексеевич Поршинонди ширеньконь кирдеманкса и ярмакса лездоманкса. Форумть программац козяль. Васенце шиня содафтоме Россиянь пограничниконь лия братстватнень мархта. Омбоце шиня официальнайста панжемда меле тейнек макссть именной флаг, конанди тяштьфт «Ветераны пограничных войск. Зубово-Полянский район Республика Мордовия» валхт. Сяда тов сявомазь Победань парку, коса ётафтовсть спортивно-массовай мероприятият. Кой-кона делегациятнень эса ульсь 30-40 ломань. Минь ниленектолеме. Но, арьсян, сяда тов лувксоньке касы. Пяк тусь мялезонк военно-патриотическяй моронь фестивальсь, кона лемтьфоль васенце геройть-пограничникть А.М.Бабушкинонь подвигонцты. Тя форумсь шарфтф од поколениять военно-патриотическяй воспитандаманцты, Россиянь пограничнай братстватнень ёткса соткснень кемокстамаснонды, Президентоньконь и специальнай военнай операциянь участникнень ширеснон кирдемаснонды. Кизоста кизос форумсь аськоляй Россиянь региоттнень эзга. Сай кизоня ётафтови Ульяновскяйса, сяльде—Дагестанца. Оцю мяль вельде тага приматама участия»,—мярьгсь мокшалясь.
Беляефнень семьяснон лангста ули кода сявомс кепотькс лиятненди. Юрий Михайловичень рьвац, Елена Степановна, вяти мокшень кялень и мокшэрзянь литературань урокт Ново-Выселскяй средняй школаса. Кафцьке стирьсна врачт. Оцюсь, Людмила, акушер-гинеколог. Мзярошка киза работась шачфтома кудса заведующайкс Торбеевань больницяса. Тяни семьянц мархта эряй и работай Москуса. Ёмла стирьсна, Татьяна, шумордазе Самарань Медицинскяй институтонь стоматологическяй отделениять. Работай терапевтокс-стоматологокс Москуса.
Юрий Михайлович сембе илатнень эса инь учсеви инжи. Сонць морай гармонияса, и вайгялецка цебярь. Мора мархта, видешиса марнек эряфонц лемдезе Родинати служамати!
О. Белкина.