Азонттама Россиянь Внутренняй тевонь министерствать «Народный участковый-2022» Всероссийскяй конкурсонц региональнай этапонц сяськиенц, заключительнай этапонц Мордовиять эзда участниконц, Россиянь МВД-нь Рузаевскяй муниципальнай районть эзга Отделонь старшай участковайть полициянь уполномоченнайть, полициянь капитанть Сергей Викторович Масловонь колга.
Тячи, 10 ноябрьста, странасонк отмечави Российскяй Федерациянь внутренняй тевонь органонь сотрудниконь шись. Лиякс азомс, Российскяй Федерациянь Внутренняй тевонь министерствань сотрудникнень (1991 кизоти самс—СССР-нь МВД-нь) профессиональнай праздниксна.
1 ноябрьста ушедсь Россиянь МВД-ть «Народный участковый-2022» Всероссийскяй конкурсть заключительнай этапоц. «Комсомольская правда» изданиять сайтсонза тячиень шити (тячивок) ули кода максомс вайгяльцень онлайн режимса инь цебярь участковайть полициянь уполномоченнайть инкса. Мордовиять эзда примай участия конкурсть региональнай этапсонза сяськись С.В.Маслов.
Сяськихнень каземасна кармай 17 ноябрьста—участковайхнень полициянь уполномоченнайхнень шистост.
Мес полициянь капитанць Сергей Викторович Маслов кочказе тя профессиять, кодама тефт участковайхне полициянь уполномоченнайхне ётафнихть населениять мархта дистанционнай мошенничествать инголяманц коряс, мезть старшай участковайсь лувондсы эряфса инь питникс—тянь и ламоть лиять колга пачфттяма газетаса тячи.
Сергей Викторович Маслов 2006 кизонь 23 июньцта сявомок работай Россиянь МВД-нь Рузаевскяй муниципальнай районть эзга Отделса, участковайкс арась 2016 кизонь 8 февральста.
Валонзон коряс, внутренняй тевонь оргаттнень эса служамать колга ушедсь арьсема нинге школаса. Цебярь кепотьксокс теенза арасть тя тевса кинофильматнень эзда милиционерхне, ульсть тяфтама ломатть и раднянзон ёткса.
Рузаевкаса 17№ административнай участкаса, коса старшай участковайкс покоди С.В.Маслов, эряй 4890 ломань. Тядде Сергей Викторович орадсь 6 преступленият и лихтсь лангу 43 административнай правонарушения.
Тячиень эряфсонк эсь колгаст сидеста макссихть содамс мошенникне, конат васькафнихть ломаттнень эса телефоттненди гайфнемста. Азондсазь пряснон полициянь сотрудникокс, банкса работай специалистокс и эняльдихть пачфтемс банковскяй картать номеронц, пин-кодонц, кой-коста пачкотькшни сянди, што сявфнихть кредитт и ётафнефтьсазь ня ярмакнень эсь—мошенниконь счётозост.
Сергей Викторович пачфтезе: тяфтама килькшс повондыхть аф аньцек эряфкшу, но и средняй кизонь, од ломаттне. Тянь инголдаманц инкса старшай участковайсь васьфни участкасонза эряйхнень мархта, семботь лац-ряц теест азонкшнесы, явонды памяткат. Кой-кит синць гайфнихть С.В.Масловонди и эняльтькшнихть максомс ответ тя или тона кизефксть лангс. Сон фалу анок лездомс.
Россиянь Внутренняй тевонь министерствать «Народный участковый-2022» Всероссийскяй конкурсть региональнай этапсонза Сергей Викторовичень инкса максозь вайгяльснон Мордовиянь ламоц эряйхне. Полициянь капитанць азсь оцю спасиба теест.
Полициянь эрь сотрудникть эряфса, кирдемок мяльса профессиянц, лисендсть мяляфтови случайхть. Тянь ули кода азомс и С.В.Масловонь колга. Кой-конатнень пачфтьсаськ газетать лувиензонды.
2019 кизонь октябрьста старшай участковайть служебнай телефонозонза гайфтсь Рузаевка ошень Рубцовонь ульцясонза ащи лавкаста мишендись и пачфтсь сянь колга, што эряфкшу авать салазь кошелёконц, коса ульсь 10000 цалковай. Самок тоза, С.В.Маслов тиезе семботь, штоба содамс муворуть лемонц. Кода корхнихть, тиезе тянь «пси пильгокитнень коряс» следственно-оперативнай группать самс. Салафсь муворгофневить кядьста сявфоль и мрдафтфоль азоронцты, но ворбетлясь кенерсь карьхцямс 500 цалковай. Эряфкшу авась—кошелёкть азоравац, азсь седи ваксста моли благодарностень валхт Сергей Викторовиченди.
2016 кизонь ноябрьста Рузаевка ошень ЦВСИН-цта ворьгодсь омба масторонь гражданинць. С.В.Маслов оперативно-вешендемань тефнень ётафтомста кирдезе сонь и пачфтезе Россиянь МВД-нь Рузаевскяй районть эзга Отделу. Кода содавсь меле, ворьгодись кяшендсь содафонц ширеса Рузаевкаса.
Сергей Викторович Маслов эсь эряфсонза васенце вастти путнесыне работанц и семьянц. Но рьванц и иденц мархта пяк лама пинге аф ётафни, сяс мес сонь сявондьсы кельгома тевоц. Кда удалси, Маслофне марса якайхть ваймама.
Служебнай тефнень седикс-ваймокс пяшкотькшнемаснон инкса Рузаевкаста старшай участковайсь С.В.Маслов казьф Мордовия Республикать эзга внутренняй тевонь министрть Благодарностенц мархта, Россиянь Внутренняй тевонь министерствать «За отличие в службе» III, II степенень медалензон мархта.
«Народный участковый-2022» Всероссийскяй конкурсть заключительнай этапсонза вайгялень максомась шумордави тячи, сяс пинге нинге ули.
Седи ваксста поздравляндасаськ С.В.Масловонь и внутренняй тевонь органонь сембе сотрудникнень профессиональнай иласнон мархта! Арьсетяма кеме шумбраши, паваз.
Т.АЛЬШИНА.