Эряй ломаттнень инкса

Василий Фёдорович Банкаев шачсь Самовольевка велеса, кона эста лувондовсь «Парижская коммуна» колхозть бригаданзон эзда фкакс. Банкаефнень лама идень семьясост ульсть вете шабат—колма стирьхть и кафта цёрат. Василий сембонь ёткста инь ёмласель. Сон кельгозе тонафнеманц, оцю мяльса якась школав.
Сире Драка велень средняй школать шумордамдонза меле поступась тонафнема Краснослободскяень Велень хозяйствань техникуму «Агрономия» отделенияв. Шумордамс тонафнеманц Василиенди ашезь сав—сявозь армияв. Службанц ётазе Монголияса. Служамок срочнайть, поладозе техникумса тонафнеманц. 1977 кизоня диплом мархта специалистть прважазь «Красное знамя» совхозу, кона Атюрьевскяй районца. Кизода ламос работась отделениянь агрономкс. Тяса васьфтезе сай пингонь поланц. Екатерина работась пионервожатайкс школаса.
Ковылкинскяй району састь кафонест ни. Сонь кучезь «50 лет Октября» совхозу агрономкс-семеноводкс, рьванц—Казённо-Майданскяй средняй школать видеса интернату воспитателькс. 1980 кизонь августста рьвяясть. Василий Фёдорович работась Казённай Майданца 10 кизот, меле кучезь главнай агрономкс «Красная Пресня» совхозу. Но кафта кизода меле В.Ф.Банкаевонь путозь КПСС-нь ХХII съездть лемса колхозти руководителькс. Сон од вастсовок маштозь кярьмодсь тевонцты.
1993 кизоня тунда 3№ бригадань труженикне (тя Чепурновкась) азсть мяль явомс колхозть эзда и тиемс башка хозяйства. Тяфтама решениясь примафоль коллективть марстонь собраниясонза. Районть картанц лангса эвондась «Чепурновский» од колхоз.
Василий Фёдорович арась «Клиновский» колхозонь вятикс. Пинкне стакатольхть. Ашезь паннев заработнай платась, обществаса аф сетьмоль—тянь семботь эзда ащесь ломаттнень мяльсна. Эрявсь вешемс лисема васта.
В.Н.Банкаев 1995 кизоня арась «Васильевский» колхозонь вятикс. Тя вастса полафтозе Н.В.Купряшкинонь. Но покодемс ламос теенза ашезь сав. Пяле кизода меле тусь больничнайс. Урмась аф тёждяль, сяс сяда тов работамать квалма ашель месть корхтамс. Пчксесь колма кизот, а меле тага тердезь работама. Тя мезть—Клиновскяй велень Советонь оцюнякс. Тя ульсь 2000 кизоня.
Клиновскяй велень поселениять администрациянц собственнай доходонзон вельде удалась перямс ниле калмаланкт, Самаевка велеса тиемс 870 метрань водопроводти ремонт, полафтомс водонапорнай башнять Чепурновкаса, рамамс легковой автомобиль.
В.Ф.Банкаевонь лац работаманц вельде 2002-2003 кизотнень удалась ётафтомс газ населённай сембе пункттненди, конат сувсихть поселенияти, тяконь лувксса и бюджетнай учреждениятненди. Самаевка станциянь эряйсь Виктор Степанович Чернышев азсь мяль—ладямс поселенияса обелиск ся землякнень лемс, конат шавовсть Великай Отечественнай войнань кизотнень. Сонь ширенц кирдезе Василий Фёдорович. Ломаттне тянемс мяляфтсазь тя пара тевть.
2015-2017 кизотнень «Устойчивое развитие сельских территорий» программать коряс, подряднай организациятнень вийснон вельде ётафтфоль водопровод Самаевка станциять эзга—8 вайгяльбет и Клиновкать эзга, конань кувалмоц 1,8 вайгяльбе. Оцю лезкс макссь Ковылкинскяй райононь эстонь оцюнясь Виктор Иванович Ташкин.
В.Ф.Банкаевонди максфоль «Мордовия Республикань местнай самоуправлениянь Заслуженнай работник» почётнай лем. Сон казьф «За заслуги в ознаменование 1000-летия единения мордовского народа с народами Российского государства», «Трудонь ветеран» медальхнень мархта. Рьванц, Екатерина Николаевнань, мархта марсот пцтай 45 киза. Рьвац тяниень пингть—культорганизатор велень Культурань кудса.
Банкаефнень оцю стирьсна, Людмила, шумордазе Темниковскяй техникумть «Бухгалтерский учёт» специальностьс коре, меле поступась Н.П.Огарёвонь лемса Мордовскяй государственнай университетонь экономическяй факультетонь заочнай отделенияв. Туф рьвакс. Работай Ковылкинскяй межрайоннай бухгалтерияса. Мирдец, Иван Кабаев, покоди Ковылкинскяй горгазса. Касы стирнясна Милана.
Омбоце стирьсна, Анастасия, шумордазе Краснослободскяй медучилищать. Сон—фельдшер-лаборант Ковылкинскяй межрайоннай больницяса. Мирденц, Алексей Калининонь, мархта касфтыхть кафта шабат.
21 мартста Василий Фёдорович васьфтезе сизьгемонь кизонь юбилеенц. Лама пара вал кульсь работас коре ингольдень ялганзон, содафонзон эзда.
Василий Илькаев.