Аф кунара, 24 ноябрьста, минь отмечаськ кельгомада и седиень лямбода пяшксе илать—Тядянь шить, мзярда эрсь эздонк азсь спасибамань валхт эсь тядянцты эряфонь максоманкса, касфтоманкса-тряманкса, виде кис водендаманкса. Улемс тядякс оцюдонга оцю паваз. А кда Шкабавазсь бславасы авать шачфтомс аф фкя, а несколька шаба, эста, шарьхкотьф, паваздовок авать эряфса ули сяда лама.
Газетаньконь тячиень номерсонза минь пара мяльса азонттама мокшавать, кафта стирнянь-кафтаськянь тядять Алевтина Кудашкинать колга.
Героиняньконь эряфоц сотневсь музыкать мархта. Алевтина Михайловна—дополнительнай образованиянь педагог. Вов ни кемголмува киза покоди Саранскяйса Идень творчествань дворецса. Сон тонафнесыне шабатнень домраса и балалайкаса морама. А сонць мокшавась лац содай мянь ниле музыкальнай инструментт. Домрада и балалайкада башка сон нинге морай баянца и фортепианоса.
Шачемас-касомас коре Алевтина Кудашкинась Инсарскяй райононь Мокшень Паёвка велеста. Тястонь школаса шумордась ниле класст, а меле тусь тонафнема Саранскяи Идень музыкальнай школав-интернату. «Эста тейне ульсь аньцек кемонь кизот,—лятфнесы Алевтина Михайловна.—Тядязень-алязень ашель мяльсна нолдамс монь эсь ваксстост, кле, ёфси шабат нинге, рана эрямс родительфтома. Но мон ащень монценнеть лангса и теест ашель мезе тиемс лия, кода согласиндамс мархтон. Фкя пингста музыкальнай школаса-интернатса тонафнемать мархта пуропнень содамошит ошень 19№ гимназияса».
Алевтина Кудашкинась ёт ёмласта кельгозе музыкать. Лиякс ашель кода, вдь сон кассь семьяса, коса пцтай сембе кельгозь морамаснон. Вайгялюволь бабац, Евдокия Григорьевна, мазыель тядянц, Мария Николаевнань вайгялец, сон морась «Поюня» велень ансамбльса. Лия радня ломанензон ётксовок ламоль морамань асуши мархтода. «Мяляфтса, мзярда шабалень, Казанскяйста, а тя велесонк пристольнай ила, и Масланцяста ширезонк пуромкшнельхть сембе радняньке и алязень, и тядязень ширде. И мзярдовок ня васедематне ашесть ётне морофтома. Таргайхть аватне кунардонь пингонь кувака мора, мянь седи куцюняце токсеви. Вов ся пинкнень, улема, кельговсь тейне музыкась. Пяк павазуван, мес мархтонза сотневсь марнек эряфозе»,—азозе мокшавась.
Музыкальнай школать-интернатть шумордамда меле Алевтина Михайловна тонафнесь Л.П.Кирюковонь лемса Саранскяй музыкальнай училищаса, сяльде—М.Е.Евсевьевонь лемса МГПИ-нь (тяни МГПУ) заочнай отделенияса. Нинге студентокс лиссь работама Идень творчествань дворецу.
Алевтина Михайловна виденцясь—шабатнень мархта покодемась аф тёждя, но кда седисот ули оцю кельгома иттненди, стакатне-сталмотне арсихть аф сяшкава няевиксокс. Тняра кизоста педагогсь пуроптсь ни сатомшка опыт, кона лезни сяда тёждяста мушендомс эрь шабать мархта марстонь кяль. Сай стирнясь или цёранясь васенцеда занятияс, Алевтина Михайловна аньцек аф ламос корхни-тии мархтонза и эстокиге шарьхкотькшнесы, кодама сонь характероц, кода сяда пара вятемс мархтонза прянц. Иттне кельгсазь Кудашкинать, занятиянзонды фалу сашендыхть оцю мяльса.
Алевтина Михайловна павазу тядя, сонь касыхть кафта стирнянза. Виктория и Анастасия кафтаськат. Тяни синь якайхть 6-це классу. Тонафнихть лац, мезть мархта аньцек касфнесазь родительснон мяльснон. Стирнятне лама мезьса ни лезнихть тядяснонды: шташендыхть кядьгот, урятцихть куд потма и нльне варчсесазь вийснон пидемаса-панемаса. Марса тядяснон мархта тиендихть пельметть, цёмарат, кельгсазь пиццань пидемаснон. А нинге Кудашкиттне семьянь келеса пара мяльса улендихть катокса и киноса, ваймама шитнень якайхть вели.
«Кодамот идень воспитандамаса секреттне?»—кизефтеськ Алевтина Михайловнань.
«Шабатнень мархта, койсон, эряви фалу корхнемс, штоба синь афольхть пеле панжемс потмоснон, старандама улемс теест аф аньцек тядякс, но и цебярь ялгакс. И нинге мяляфтома: аф эряви тиендемс сравнения эсь и лиянь шабатнень ёткса. Иттне пяк «сярядиста» примсесазь тянь. Аф юкснема, што эрь шабась эсь лацонне. И кда сон мезьса-бди аф шарфты лиятнень лангс, тя аф корхтай сянь колга, што сон сяда кальдяв. Эряви фалу кулхцондомс и кулемс шабать, сявондемс мяльс азфонц. Тяда башка, иттне ёмластокиге тонафтомат трудти, штоба афольхть каса анелькакс»,—отвечась мокшавась.
Азозень героиняньке и эряфса авать вастонц колга эсь мялензон-арьсеманзон. «Авась, васендакиге, од эряфонь максы. Сонь лангсонза фкя инь ответственнай тевсь—иттнень воспитандамасна, семьянь лямботь ванфтомац. И хуш тяниень пингть ламотне аватнень эзда кярьмотькшнихть бизнесонь вятемати, занцихть пря политикать мархта, синь, васендакиге, кельги тядят и рьват»,—мярьгсь Алевтина Михайловна.
Сонць героиняньке кассь лама идень семьяса, коса кородозь малаткшневсь семьянь питнишитненди, мокшэрзянь койхненди-обуцятненди, илатненди. Кудсост фалу кайгсь мокшень кяльсь, ашесть ащекшне арзяса пякстафста национальнай щапне-каряпне. Эсь семьясонзовок Алевтина Михайловна старандай ванфтомс тянь семботь. Стирнянзон-кафтаськанзон мархта илас-коза наряжакшнихть мокшекс, аф юкснесазь родной кяльснон.
Нинге весть поздравляндасаськ Алевтина Михайловнань и сембе тядятнень Тядянь шить мархта. Арьсетяма шумбраши и паваз!
Ольга Евдокимова.