17 октябрьста Мордовиянь Оцюнясь Артём Здунов примась участия «Эрявиксть колга корхнемат» урокса, кона ётафтовсь Саранскяень «Тавла» образованиянь центраса—17№ школаса. Тя урокс республикань руководительть тердезе рузонь кялень и литературань учительсь, «Учитель года-2022» Всероссийскяй конкурсонь лауреатсь Евгения Макарова.
Лятфтасаськ, што «Эрявиксть колга корхнемат» лем ала урокне тонафнемань тя кизоста сявомок ётафневихть эрь недяляня странань сембе школатнень и колледшнень эса Россиянь Президентть Владимир Путинонь инициативанц коряс. Занятиятне лемтьфт Россияти, сонь ётай, тяниень и сай пингонцты и водендафт патриотизмать ви-ияфнеманцты.
Мордовиянь Оцюнять участиянц мархта эрявиксть колга корхнематне лемдевсть од, но оцю значениянь илати—Алянь шити. Уроксь ушедовсь 10Б классонь тонафнихнень эсь планцнон, профессияснон и ломанень качестватнень колга азондомаснон эзда. Учительснон кизефксонц лангс: «Кода арьсетяда, мес Россиять лемнесазь Отечествакс?», стирнятне-цёранятне фкя мяльса азозь: «Сяс мес тя аляньконь модасна!» Именна «аля» валти путфт и поколениятнень историческяй мялямсна, и эсь семьяти и Родинати кельгомась.
Артём Здунов мярьгсь: «Мзярда-бди и минь тяниень пингоньконь колга кармайхть корхнема кода историянь квалма. Тячи тинь гордостень марязь азондоде эсь планонтень колга. Мзярошка пингта меле тинь тинцьке аратада тядякс-алякс. Мезе кармайхть корхнема колгант шабанте? Тянди ушеткссь путневи тячи ни, тяконь лувксса и ся работать мархта, конань вятьсасть школаса.
Тинь содасасть, што РФ-нь Президентсь примась решения пуроптомс шабань и од ломанень марстонь организация. Кеман, што Россияса сон кармай кеме. Мялезе, штоба тинь афоледе лядонда ширеса тя оцю тевть эзда. Аф обязательна улемс тя движениянь активистокс, но эрти эсь вастсонза ули кода тиендемс мезевок пользань канды. Тяниень пингть пяк важна кирдемс ширеснон ся боецнень семьяснон, конат тусть специальнай военнай операциянь ётафтомань васттненди. Минь машттама тянь тиема, волонтёрскяй организацияньконь цебярь опытсна. Ётай ваймама шитнень минь налхкоме футболса ся шабатнень мархта, конатнень аш тядясна, аш алясна. Няевсь, што тя васедемась-корхнемась кандсь теест сняра павазда! Арьсезевода, кодама кржа эряви, штоба ломанць улель павазу! И тя стане жа работа, стане жа участиянь примама. Тиендеда пара тефт и ванфнесть эсь Родинантень, эсь алянтень мялямснон. Курок тинь поколениянте полафтсамазь минь, и эздонт ащи, штоба историческяй мялямоньке козовок афоль ту».
Шабатне макссесть региононь Оцюняти лама кизефкс, тяконь лувксса кизефтезь кинь Артём Здунов лувондсыне тяниень пингонь геройкс. «Семьяса, государстваса васенце вастса ащи ответственностсь. Сяс тяниень пингонь геройкс лувондсайне сятнень, кие сявонди ответственность эсь и ломанень целай группатнень инкса»,—мярьгсь сон.
Азондомок шабатненди тяниень пингть лама информациянь улемать и историческяй мялямть колга эсь мялензон-арьсеманзон, Артём Здунов китькстазе, што тячи надиямс и верондамс ули кода аньцек проверяф, авторитетнай источникненди, васендакиге—тядятненди-алятненди. Шарьхкодемс видексонь информациять лездыхть и пуроптф содамошитне. «Содамошитне кармайхть ванфнемонт и тячи, и сяда тов. Цебярть и кальдявть каршек ащемасна кармай фалу, тяфта ладяф эряфсь, но тинь содамошинте, тяконь лувксса историять колга, лездыхть примамс видексонь решения»,—азозе Мордовиянь Оцюнясь.
«Эрявиксть колга корхнемат» урокть шумордамста стирнятне-цёранятне марса Артём Здуновонь мархта странаньконь героензон колга лятфтаманкса сотнесть российскяй флагонь тюсса лентанят келувонь тараткяти—Россиять символонцты. «Странась маряй гордость эсь героензон—алянзон инкса. Ули кода азомс лама кепотькста. Минь школасонк тонафнихть полковникть, Мордовияса шачфть-касфть Виктор Иванович Исайкинонь шабанза. Сон шавовсь специальнай военнай операциять пингста. Алятне ламонкса кирдихть ответственность. Синь вернайхть эсь Отчизнаснонды!»—меколи мярьгсь Евгения Макарова.
Сяльде Артём Здунов тифтсь лятфнембяленди фотографият шабатнень мархта.