Эсь тевонц тиендьсы совестьс коре

Сидеста улендян Атюрьевскяй райононь Мокшень Козловка велеса. Тястонь эряйхнень эзда кулендян шнамань валхт медсестрать, медицинань ветеранть, мокшавать Т.Ф.Макашкинать колга. Сон козя опыт мархта специалист.
Шачсь мокшавась шабрань Сире Кушка велеса. Татьяна Фёдоровна аделазе васенда Сире Кушкань начальнай школать, меле тонафнесь Мокшень Козловкань средняй школаса. Класснай руководителец Ф.С.Макарова приметазе, што Татьяна Попковать эзда лиси цебярь ломань. Стирнясь аф аньцек лац тонафнесь, но и кельгозе трудть. Кодама тевти ашезь кярьмотькшне, тиендезе совестьс коре. Ашельхть стама тефт, конат теенза афольхть тиев. Кафкса класснень аделамдост меле тусь тонафнема Темникавонь медицинскяй училищав. Получась цебярь содамошит и сась покодема эсь родной районозонза. Киза трудендась Оцяду велеса. А тоса ётафтозь Мокшень Козловкав. Мзяра ломанень эряф аралась. Тевоц лангс ванозь няеви тёждяста, а кда лятфтасыне сембе ётаф кизотнень, мезе аньцек ашель. И вестевок Татьяна Фёдоровна ашезь пеняцякшне эсь эряфонц, работанц лангс. Васенце медицинскяй лезксть макссезе сонць, а кда ни няйсы, што ломанти кальдяв, терди «скорай помощень» машина, прважасы больницяв. Васенда сярядихнень ускселезь Атери, а тяни Торбеевав.
Мекольдень колма кизотне Т.Ф.Макашкинать эряфса инь стакатне. Кулось кельгома мирдец Николай Николаевич. Тя пяк оцю юмафкс мокшавать эряфса. Ня кизотне стакат и сяс, мес ульсь ковидсь. Васенда лац-ряц ашезь шарьхкотькшне, мезе тиема, кода пчкафтомат ломаттне. Да и тянивок лама кизефкста. Но тяни ули ковидть каршес вакцина. Финцне тифтихть прививка, омбонцне атказакшнихть эздонза. Татьяна Фёдоровна корхнесь и тянивок корхни эрь ломанть мархта, азонкшнесы мезьса вакцинать виец. И ломаттне сонь кулхцондсазь, шарьхкодьсазь. Улихть, конешна, атказайхть, но ёфси аф лама.
Тяни Макашкинать участкаса 315 ломань. Тя пропискас коре. Кие сай, кие туй. Но, кда эряви кодамовок лезкс, Мокшень Козловкать инжиензовок сайхть Татьяна Фёдоровнанди. И сон киндинге аф атказай.
Медсестрать участкаса пцтай 100 эряфкшу ломань. И сембонь кирдьсыне мяльса. Кинди уколня нолдай, прививка тии, кинь давлениянц ункстай. Эрь шиц пяшксе тевда.
Аньцек шнамань валхт азома Татьяна Фёдоровнань семьянц колга. Мирдец, Николай Николаевич, трудендакшнесь васенда «Сосновский» совхозса, сяльде вахтань методса якась добувама Москуву. Оцю кельгомаса касфтозь Макашкиттне кафта идьснон. Цёрасна, Владимир Николаевич, аделазе Темникавонь велень хозяйствань техникумть, покоди Москуса. Стирьсна, Мария Николаевна, аделась медицинскяй колледж. Профессияс коре трудендай УФСИН-нь системаса Зубово-Полянскяй райононь Явас посёлкаса.
Эрь шобдаваня Т.Ф.Макашкина эряскоды эсь покодема вастозонза. Лама ломаненди шиньберьф максси медицинскяй лезкс. И тяфта мянь 33 киза.
И.Вешкин.