Фронтовикть мяляфтсазь

Атюрьевскяй райононь Колапонаня велеста лиссь лама содаф ломаньда. Тястоннет поэттне Р.Р. Федькин, П.К.Торопкин. Тя велеса шачсь и кассь Великай Отечественнай войнань ветеранць Т.М.Федькин. Сон шачсь 1920 кизоня. И нинге войнада инголе сявфоль армияв служама. Эста теенза сембоц ульсь комсь киза. Воявась Тимофей Михайлович 166 стрелковай полкса, ульсь пулемётчикокс-зенитчикокс.1941 кизонь кемонце августста сявомок 1945 кизонь вейхксоце майти самс ульсь Великай Отечественнай войнаса, тюрьсь гитлеровскяй Германиять каршес. Ётась лама оцю и ёмла ош. Аделазе войнать ефрейторонь званияса. Войнада меле Т.М.Федькин пцтай колма кизот нинге служась армияса. И куду мрдась аньцек 1948 кизонь 13 январьста. Родинать инголе боевой заслуганкса Тимофей Михайлович казьф «За оборону Москвы», «За взятие Кенисберга», «За победу над Германией» и лия медальса.
Войнада меле Тимофей Михайлович трудендакшнесь Атерень райпонь заготконтораса. Ломанць пяк трудонь кельгиель, ответственнаель. Эсь тевонц тиендезе совестьс коре. Аф стак тянемс колганза лядсть аньцек лямбе лятфнемат. Ашезь юкста сонь и Колапонаня велеса. Сире поколениянь ломаттне корхнихть колганза аньцек шнама валса. Атерьса эрязьге Т.М.Федькин ашезе юксне эсь шачема-касома веленц. Мзярда ульсь пингоц, сашендсь Колапонаняв. Кда ульсь вийс коре киндивок лездомс, лезнесь. И нят аф шава валхт.
Илья Вешкин.