«Геройхнень пингсна» народнай васенце премиянь лауреатсь, спасательсь, мокшалясь А.И.Безбородов:«Кельгома тевозень тиендьса оцю мяль вельде!»

5 августста Саранскяйса «Саранск Арена» спорткомплексса ётафтовсь «Геройхнень пингсна» народнай васенце премиять финалоц, конань пингста азфтольхть и казьфтольхть сембе номинациятнень эса сяськихне.
«Герой по призванию. Огнеборец» васенце номинацияса сяськикс арась Саранскяйса шачф-касф мокшалясь, спасательсь, внутренняй службань старшай прапорщиксь, ГПС-нь ФПС-ть 5№ пожарно-спасательнай частенц отделениянц командироц А.И.Безбородов, кона тись афкуксонь подвиг—аралазе лама этажень палы кудста авать кафта ковняса иднянц мархта.
Александр Ивановичень мархта корхнемста эстокиге содавсь, што сон—вельф скромнай, эсь колганза лама азондомать аф кельгсы.
Шачсь Саранскяйса Безбородофнень мокшень семьяса. Аляц, Иван Степанович, Инсарскяй райононь Кочетовкаста, тядяц, Мария Михайловна, Торбеевскяй райононь Куликово велеста.
Саша каникуланзон и ваймама шинзон сидеста ётафнезень Кочетовкаса (тя велесь кунара содаф родной кялень, коень-обуцянь ванфты уженякс). Сяс алянц шачема ширесонза Александр сядовок кемокснезень мокшень кяльть содаманц коряс содамошинзон, тиендезе тянь оцю мяль вельде.
Тонафнесь Саранск ошень 9№ школаса. 9-це классть шумордамдонза меле поступась Саранскяень Машиностроительнай техникуму, коса получась «Сварочнай производствать технологияц» специальностть коряс техниконь-технологонь квалификация.
Тонафнемада меле Александр Иванович Безбородов тертьфоль служама армияв артиллерийскяй войскатненди. Ётазе учебкать, а сяда тов киза пяле мархта ульсь Чечняса, коса ся пингть ётафтовсь чеченскяй омбоце кампаниясь, или, кода теенза мярьгихть официальнайста, Северо-Кавказскяй регионть территориясонза контртеррористическяй операциятне. Мокшалясь—боевой действиянь ветеран.
Армияста мрдамдонза меле А.И.Безбородов ёразе ётафтомс родной ширети лажадомать. Онцтонзовок няендезе Мордовиять—Саранскяйть, коса шачсь-кассь, а стане жа Кочетовка и Куликово велетнень. Мекольцеса куду мрдамдонза меле и ваймясь аф ламос. Но тевфтома ламос ашезь ащекшне.
Александр Иванович ушедсь работама пожарно-спасательнай частьса, лиякс азомс, кочказе эряфса инь пелькс ширетнень эзда фкять—толть мархта тюремать. Тяддень 26 августста топоди 20 киза, кода профессиональнай спасательсь Александр Иванович Безбородов тиендьсы эсь тевонц маштозь, аф пелезь.
Тняра кизоста мокшалясь казьфоль Россиянь МЧС-ть «За отличие в службе» I, II, III степенень медалензон, Россиянь МЧС-ть «Маршал Василий Чуйков» памятнай медаленц, Россиянь МЧС-ть «XXV лет МЧС России» медаленц мархта. Улихть и лац покодеманкса Почётнай грамотанза.
Сонь и работас коре ялганзон колга можна азомс: эрь шинь работасна—тя эсь лацонь подвиг.
«Геройхнень пингсна» народнай премияса участиянь примаманц колга Александр Иванович кульсь аф эстокиге. Валонзон коряс, тячемс аф содасы кие сонь азозе тя премияти номинантокс. Народнай вайгялень максомаса профессиональнай спасательсь А.И.Безбородов кочкась 1128 вайгяль. Тянь сявозе мяльс и экспертнай советсь.
И вов «Геройхнень пингсна» народнай васенце премияти итокне тифт! Сембе сяськихне тертьфтольхть каземань церемонияс «Саранск Арена» спорткомплексу.
Васенцекс сценати тертьфоль Александр Иванович Безбородов. Кода азозе корреспондентоньконди мокшалясь, ся пингть эсонза ульсь таколдома. Но содазе, што спорткомплексса семьяц, кона сась ширенц кирдема.
Рьвац, Наталья Ивановна, Кадошкинскяй райононь Адаж велень мокшава. Безбородофнень касыхть кафта стирьсна. Алина 1 сентябрьста моли Саранск ошень 23№ гимназиянь 8 классу, Софья якай идень саду.
Мзярда алясна работаса, стирнятне пяк лажаткшнихть теенза.
А.И.Безбородов «Геройхнень пингсна» народнай васенце премиянь лауреатокс арамдонза меле эсь прянц геройкс аф лувондсы. Оцю мяль вельде, кле, тиендьса кельгома тевозень. И сембе. Нинге азсь оцю спасиба ширенц кирдеманкса.
Поздравляндасаськ мокшалять сяськомать мархта!
Т.Альшина.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...