«Геройть партац»

7 ноябрьста Саранск ошень округонь Ялгинскяй общеобразовательнай школаса торжественнайста панжевсь «Геройть партац», кона лемдевсь Россиянь ФСБ-нь пограничнай службань майорти, Якстерь Знамянь орденонь кавалерти В.В.Мещеряковонди.
Мероприятияса ульсть региональнай УФСБ-нь сотрудникне, Саранск ошень округонь оцюнясь Игорь Асабин, Виктор Мещеряковонь удавац—Людмила Сергеевна, безопасностень органонь и пограничнай службань ветераттне, педагокне, юнармеецне и тонафнихне.
Пуромфненди азфоль Виктор Мещеряковонь трудовой и боевой кинц колга. Сон ульсь Афганистанца боевой действиянь участникокс, вятезе десантно-штурмовой маневреннай группать. Примась участия 100-да лама боевой операцияса, конатнень пингста подразделениясь ашезь юмафта фкявок боец. Няфтьф мужестванкса и героизманкса майорсь В.В.Мещеряков казьф Якстерь Знамянь и Якстерь Тяштень ордеттнень, «За храбрость» и «За боевые заслуги» медальхнень, а стане жа «Слава» и «За храбрость» афганскяй ордеттнень мархта.
Почётнай правась васенцекс озамс «Геройть партанц» ваксс максфоль отличникненди—10 классонь тонафнити Ксения Марычевати и 9 классонь ученикти Андрей Шпилевонди.
Сяда тов «Геройть партанц» ваксс кармайхть озсема школьникне, конат сяськондихть олимпиадатнень эса, кинь улихть оцю сатфкссна спортса, кит аф лядондыхть ширеса тонафнемань учреждениять общественнай эряфонц эзда.