Февральста ушетфоль специальнай военнай операциясь, а сентябрьста Россиянь Президентть В.В.Путинонь Указонц мархта странасонк азфоль частичнай мобилизациясь. Кирдемок тянь мяльса, аф озадонь седихть ащи ломаттне лама тиендихть мобилизованнайхненди лезксонь максомать инкса. Тянь колга сидеста пачфнетяма «Мокшень правдаса». Донбассу Мордовияста прважсевихть гуманитарнай лезкс мархта машинат, кочксеви ярмак тянди тиф банковскяй счётть вельде и стак тов.
Кепси мяль ся, што аф аньцек ошень эряйхне примсихть участия эрявикс тя тевса, но и аф ляткшнихть эздост и велень ломаттне.
Ноябрьста гуманитарнай лезксонь кочкамась мольфтевсь Рузаевскяй муниципальнай райононь Пайгарма велень поселенияса. Тянь колга пачфтсь Пайгарма велень поселениянь администрациянь оцюнясь Наталья Геннадиевна Романова.
Валонзон коряс, ноябрть омбоце пялестонза ширезонза сашендсь Пайгармань клубть заведующаец Л.В.Яушкина. Любовь Васильевна азсь Н.Г.Романовати тяфтама мяль: марстонь вийса кочкамс гуманитарнай лезкс—посылкат мобилизованнайхненди. Велень поселениянь администрациять оцюняц кирдезе Л.В.Яушкинать ширенц. Арьсефоль, кода тянь колга пачфтемс велеряйхненди и коса панжемс лезксонь кочкама васттнень.
Лезксонь кочкаманди азфтольхть колма вастт: велень кафта лавкатне и Россиянь Почтать Пайгармаса отделенияц, сяс мес тяза эрь шиня сашенды аф кржа ломань.
Посылкатнень кочкамаснон колга пачфтьфоль интернетса, повфтаф объявлениятнень вельде, велеряйхне азондсть тянь квалма фкя-фкянди… Нинге эсь тевдост башка, тянь мархта заняфтольхть лавкаса мишендихне и Почтань отделениять заведующаец Т.Н.Тюрькина. Синь пачфнезь эрь сайти, мезе ули кода кандомс лезксонди, мезсь аф ладяй тя тевонди и стак тов.
Наталья Геннадиевна азозе, што лезксонди примсевсть ламос ванфтови ярхцамбяльхне—ямксне, макаронатне, калонь консерватне, тушёнкась, сгущённай лофцсь, кофесь, конфетатне, чайсь, курокста аноклави шонгаряпне и лиясь. Тяда башка, Пайгарма велень эряйхне кандсть медикаментт, бинтт, жгутт, личнай гигиенань средстват, а стане жа—эсь кядьса кодаф и рамаф носокт, перчаткат, варягат, щапт…
Сембоц кочкафоль 11 посылка (коробка) и фкя кяскав.
Н.Г.Романова азсь оцю спасиба Пайгарма велень поселениянь библиотекать заведующаенцты О.В.Сорокунонди, клубнай формированиять руководителенцты О.Е.Илюшкинати, а стане жа—индивидуальнай предпринимательти М.Г.Ниденталенди, конань кафта лавканза и арасть лезксонь кочкама вастокс, ашезь ляда ширеса азорсновок.
Марстонь вийса кочкафсь марафоль коробкас и ускфоль Рузаевкав Од ломанень центрав, коса тяни гуманитарнай лезксонь кочкамань центрась. Тоста сонь прважасазь сяда тов.
Пайгарма велень эряйхне няфтезь, што тячиень шиня ули кода пуромомс марс эрявикс тевонь тиема. Тянь эса минь виеньке!
Т.Альшина.