Стаки мольфтеви «Сембось Сяськомать инкса!» проектсь. Мордовияса касы эсонза участиянь примайхнень лувкссна. Аф кунара гуманитарнай лезкс Народнай фронтть региональнай отделениязонза пачфтсть Мордовия Республикать эзга Федеральнай налоговай службать Управлениянц сотрудниконза.
Благодарностень валхт азондовихть сембонди, кит апак кошартт, эсь мяльснон вельде примайхть участия военнослужащаеньконди, конат тяни передовойсот, гуманитарнай лезксонь кочкамаса.
Аф кунара сисемцеда прважафоль гуманитарнай лезкссь, конань пачфтема якась Народнай фронтть региональнай штабонц сопредседателец Игорь Павлович Еремкин.
Гуманитарнай лезксса ульсть эрявикс медикаментт, гигиенань средстват, термобельё, носокт, пильгс шаматненди лямбе стелькат и ламос ванфтови ярхцамбяльхть.
Региональнай штабть сопредседателец Л.Н.Нарбекова азсь мяль С.Д.Эрьзянь лемса Изобразительнай искусствань музейть и Мордовиянь Художниконь союзть эзда прважамс Донецкяй народнай республикав мокшэрзянь художникнень 13 картинаснон, а Донецкяень и Мелитополень библиотекатненди—искусствать коряс книгат. И тя сембось стане жа сувафтфоль гуманитарнай лезксть ёткс.
Тяда башка, Ромодановскяй райононь Свято-Троицкяй Чуфаровскяй алянь монастырьста монахне макссть Белгородонь госпитальхнень эса пчкси боецненди 90 литра медь.
Ётай недялять гуманитарнай лезкссь пачкодсь ни эрявикс васттненди. Чуфаровскяй алянь монастырьста медть Народнай фронтть региональнай штабонц сопредседателец И.П.Еремкин Белгородскяй РИК-ста работас коре ялганзон мархта максозь Белгородскяй и Волоконовскяй военнай госпитальхненди.
«Арт-Донбасс» художественнай музеи пачфтьфтольхть мокшэрзянь художникнень картинасна и искусствоведческяй и художественнай литературась. Книгат прважавихть и Запорожскяй областень Мелитополь ошу.
«Сембось Сяськомать инкса!» Народнай фронтть проектонц эса участия ули кода примамс эрти эздонк. Тяфта минь кирдьсаськ земляконьконь, конат араласазь странаньконь од региононзон, ширеснон.
Материалть аноклазе Т.Альшина.